Pas takimit të sotëm të mbajtur midis tre liderëve të koalicionit LDK-AAK-Nisma, i pari i Nisma për Kosovën, Fatmir Limaj, ka bërë të ditur se po vazhdojnë konsultat me grupet punuese, e gjithashtu po vazhdojnë edhe diskutimet me Vetëvendosjen për përafrim të mëtutjeshëm qëndrimesh, në mënyrë që të vazhdojnë me hapa konkret drejtë formimit të institucioneve të reja.

Duke mos dashur të komentojë shumë rreth idesë për paraqitjen e Jahjagës në Gjykatën Kushtetuese, në rast se ajo bën shkelje kushtetuese duke e vonuar nominimin e mandatarit, ai ka thënë se secilit person që e shkelë kushtetutën do t’i duhet të përballet me pasojat e veprimeve të veta.

Në anën tjetër, për sa i përket Vetëvendosjes, Limaj ka deklaruar se ende po bisedohet për përafrime të mëtejshme, dhe ka thënë se ka ende kohë për bisedime, përafrime dhe një marrëveshje eventuale.

Zyra e Presidentes, Atifete Jahjaga u është përgjigjur disa paralajmërimeve të kandidatit të bllokut LDK, AAK dhe Nisma për kryeministër, Ramush Haradinaj në lidhje me çështjen e nominimit të mandatarit për formimin e qeverisë së ardhshme.
“Duke kërkuar nga të gjitha palët vetëpërmbajtje nga presionet politike, Zyra e Presidentes thekson se kandidati për kryeministër do të nominohet, në respektim të kushtetutshmërisë dhe ligjshmërisë dhe bazuar në vendimin e Gjykatës Kushtetuese për vlerësimin e përputhshmërisë së nenit 84 (14) dhe nenit 95, si dhe në pajtim me procedurat dhe afatet e parapara me Kushtetutë”, thuhet në reagimin e Zyrës Jahjagës.

Zyra e Presidentes “rithekson faktin se vendimet e Gjykatës Kushtetuese janë të obligueshme për të gjitha institucionet e vendit dhe se do t’i zbatojë me përpikëri ato”.

Sqarimet nga Presidenca pasuan deklaratën e Haradinajt ku thuhej se presidentja po rrezikon ta shkel kushtetutën.

“Ka mundësi që ne ta pyesim Gjykatën Kushtetuese a ka vepruar drejtë Presidentja që nuk e ka ushtruar të drejtën e vetë për ta nominuar mandatarin, pasi që ka ndodhë seanca. Presidentja po rrezikon që ajo vetë të shkelë kushtetutën”, kishte deklaruar haradinaj.

Ai e kishte paralajmëruar Jahjagën se veprimi i bllokut LDK, AAK dhe Nisma mbetet çështje e hapur, në rast se ajo nuk e shfrytëzon kohën për nominimin e mandatarit.

Hajnat kanë arritur që në një shtëpi në Prizren të vjedhin 10 mijë euro. Zëdhënësi i PK-së, Hazir Berisha tha se rasti ka ndodhur në rrygën “Gucia” në Prizren.

“Në një shtëpi private në rrugën “Gucia” ka ndodhur një vjedhje e rëndë. Sipas informatave që ia ka dhënë policisë pronari i shtëpisë thuhet se dikush ka hyrë në shtëpi dhe nga aty ka vjedhur para të gatshme rreh 10.000 euro”.

“Policia ka kryer hetime në vendin e ngjarjes mirëpo ende nuk dihet kush është autori i kësaj vjedhje”.

Drejtoria Rajonale e Policisë në Prizren u bënë thirrje qytetarëve që të jenë më të kujdesshëm me kursimet e tyre dhe gjësendet e vlefshme siç janë stolitë e ndryshme të arta.

Tri pistoleta janë konfiskuar nga Policia e Kosovës.Zëdhënësi i PK-së në Prizren, Hazir Berisha tha se rastet janë proceduar në Prokurori.
“Policia e Malishevës, në vazhdën e hetimit të një rasti kishte shkuar në fshatin Novoselë të Malishevës për të biseduar me një qytetar dhe pasi i njëjti ishte gjetur, policët kishin vërejtur se i dyshuari posedonte një armë në brez”.

“Menjëherë i dyshuari është arrestuar, ndërsa arma e llojit pistoletë me pesë fishekë në karikator është sekuestruar”.

“Lidhur me rrjedhën e rastit është informuar prokurori, i cili ka sugjeruar që poseduesi i armës të lirohet pas procedurave intervistuese, ndërsa provat materiale dhe shkresat e lëndës t’i kalojnë Prokurorisë sipas procedurës së rregullt”.

Sipas tij, po ashtu edhe në Prizren janë sekuestruar dy pistoleta
“Rasti i parë ka të bëjë me sigurimin e një informacioni, i cili ka rezultuar me konfiskimin e një pistolete tek një i dyshuar, ndërsa rasti i dytë ka të bëjë me të shtëna në dasmë”.

“Për të dyja rastet është informuar prokurori i shtetit i cili ka sugjeruar që shkresat e lëndës dhe provat materiale t’i kalojnë prokurorisë sipas procedurës së rregullt”./PrizrenPress.com/

Në kuadër të projektit të monitorimit të transparencës së ekzekutivit komunal të Mamushës, “EC Ma Ndryshe” gjatë muajit korrik ka shqyrtuar të gjeturat e Raportit të Auditimit për Pasqyrat Financiare të Komunës së Mamushës në vitin 2013, me një vështrim retrospektiv edhe në raportet e viteve 2012, 2011, 2010 dhe 2009.

Konkluzioni i përgjithshëm i Auditorit është se administrimi dhe raportimi financiar brenda kësaj komune vazhdon të përballet me dobësi marrë parasysh faktin se qeveria komunale nuk i ka zbatuar rekomandimet e mëhershme të ZAP-it. “Komuna nuk i ka adresuar rekomandimet tona nga vitet e shkuara. Komuna nuk ka ndërtuar një proces të fortë që do të siguronte zbatimin e plotë dhe në kohë të rekomandimeve tona”, thuhet në raportin e ZAP-it.

Ky autoritet shtetëror ka konstatuar se gjatë viteve të fundit, komuna e Mamushës ka adresuar vetëm pjesërisht rekomandimet e ZAP-it lidhur me nenin 16 – Shpalosja e pasurive dhe pagesat nga palët e treta – dhe rrjedhimisht kjo fushë vazhdon të paraqesë një rrezik domethënës, pasi si pasojë e natyrës së regjistrimeve bazë dhe mungesës së dokumenteve mbështetës ekzistojnë disa pasiguri lidhur me të drejtat e pronësisë, plotësinë dhe vlerësimin e pasurive, objekteve dhe pajisjeve.

ZAP prej vitesh tërheq vërejtjen se komuna ende nuk ka një sistem automatik faturimi për të gjitha llojet e të hyrave vetanake dhe llogarive të arkëtueshme lidhur me to, ndërkohë që edhe ekzekutimi i buxhetit mbetet një nga fushat kryesore ku nevojiten më shumë përmirësime.

Auditori po ashtu ka nënvizuar se mospajtimet e identifikuara në prokurime lidhen me klasifikimet e gabuara të shpenzimeve dhe në tejkalimin e buxhetit për to. Si një shqetësim tjetër paraqitet edhe mos krijimi i një Departamenti të Auditit të Brendshëm dhe Komitetit të Auditit, që po ashtu është rekomandim që përsëritet vit pas viti nga ZAP-i.

Në raportin e fundit, ZAP konstaton se komuna e Mamushës nuk e ka zbatuar asnjërin prej 9 rekomandimeve të dhëna për vitin financiar 2012, përderisa prej 11 rekomandimeve të dhëna për vitin 2011, vetëm 1 është zgjidhur dhe 3 pjesërisht janë zgjidhur. Ndërkohë prej 6 rekomandimeve të dhëna për vitin financiar 2010 komuna ka adresuar vetëm një në tërësi dhe një tjetër pjesërisht, duke injoruar 4 të tjera.

“EC Ma Ndryshe” vlerëson se mos adresimi i rekomandimeve të ZAP-it nga ana e komunës së Mamushës ka bërë që administrimi dhe raportimi financiar të përballet me probleme që rrezikojnë qeverisjen e mirë të buxhetit komunal.

Duke i marrë parasysh të gjitha këto të dhëna, “EC Ma Ndryshe” rekomandon Komunën e Mamushës që:

– Të nisë zbatimin e menjëhershëm të të gjitha rekomandimeve të ZAP-it;
– Të ndërmerr veprime serioze për përmirësimin e administrimit dhe raportimit financiar, në të gjitha fushat e identifikuara nga ZAP-i;
– Të rris transparencën në vendimmarrje me qëllim të menaxhimit më të mirë të parasë publike;

Gjithashtu, EC Ma Ndryshe rekomandon anëtarët e Kuvendit Komunal të Mamushës që të ushtrojnë presion më të madh te ekzekutivi komunal për zbatimin e rekomandimeve të ZAP-it. /PrizrenPress.com/

Kryetari i Komunës së Malishevës, Ragip Begaj, mbrëmë ka shtruar iftarin tradicional, që komuna organizon për çdo vit, në muajin e madhërishëm të ramazanit, për familjet e dëshmorëve të kombit nga Komuna e Malishevës, ku edhe janë bërë lutje për dëshmorët dhe janë kënduar pjesë të Kuranit, nga ana e hoxhallarëve në kuadër të Bashkësisë Islame të Malishevës.

“Është obligim i yni, i të gjallëve, që ti kujtojmë dëshmorët e kombit, pasi falë tyre ne sot gëzojmë shtetin tonë të lirë. Jemi në muajin e shenjtë të ramazanit dhe kam dashur të bëjmë një darkë së bashku dhe të bëjmë lutje për dëshmorët. Shumë respekt për të gjithë dëshmorët dhe familjet e tyre”, tha Begaj, duke folur më pas për rëndësinë e sakrificës së dëshmorëve dhe veprën e tyre në luftën për liri.

Për sakrificën e dëshmorëve, foli edhe kreu i Bashkësisë Islame në Malishevë, mulla Xhevat Kryeziu, përderisa ka falënderuar edhe Komunën, për këtë organizim tradicional. Pas kësaj, hoxhallarët, kanë bërë lutje dhe kanë kënduar pjesë Kurani.

Në këtë iftar, përveç familjeve të dëshmorëve, ishin të pranishëm edhe krerët e Bashkësisë Islame në Malishevë, hoxhallarë dhe asamblistë të Komunës së Malishevës. /PrizrenPress.com/