Prokuroria e Kosovës, gjatë muejit prill ka ngrit 30 raste ndaj 60 personave të dyshuem për korrupsion.

Ndërkaq që nga 4 nantori 2013 deri me 30 prill 2014, janë trajtue 520 raste ndaj 1679 sa ishin në tanësi.

Në mesin e t’akuzuemeve për korrupsion, janë edhe 3 ish-deputetë të Kosovës.

Koordinatorja Nacionale kundër Korrupsionit, Laura Pula tha se në 6 mujorin e fundit, janë ngrit 216 aktakuza për korrupsion.

Në prezantimin e të dhanave të prokurorive për periudhën brenda Nantorit të vitit të kaluem dhe Prillit të këtij viti, Pula tha se në mesin e personave ndaj të cilëve janë ngrit aktakuza për afera korruptive, gjenden edhe 3 deputetë të legjislacionit në ikje./java/

Kryeminsitri i vendit, dhe njëherit kreu I Partisë Demokratike të Kosovës, Hashim Thaçi, ka thënë se partia e tij, do të hyjë e vetme në zgjedhje, të cilat do të mbahen më 8 qershor.
I pari i PDK-së, në një prononcim për Indeksonline, është shprehur i bindur në fitoren e partisë së tij.

Ndryshe edhe partitë e tjera politike në vend, do të futen të vetme në zgjedhje.
E vetme në zgjedhje do të hyjë edhe Lidhja Demokratike e Kosovës. Ndërkaq drejtues të Lëvizjes së Albin Kurtit, patën thënë se do të garojnë me programin e saj politik, dhe se për koalicion mund të flitet vetëm pas zgjedhjeve.
Njejtë do të veprojë edhe AKR-ja e Behgjet Pacollit dhe AAK-ja e Ramush Haradinajt./Indeksonline/

Në një takim të veçantë, në selinë e partisë, kryetari i Aleancës për Ardhmërinë e Kosovës, Ramush Haradinaj, ka mbledhur sot strukturat drejtuese të partisë, për të diskutuar çështjet thelbësore drejt zgjedhjeve të ardhshme nacionale në vend.
Kryetari Haradinaj ka thënë se AAK hyn më e mobilizuar se kurrë më parë në këtë proces zgjedhor, me bindjen e plotë për t’i fituar zgjedhjet nacionale të 8 qershorit dhe për të udhëhequr, siç ka thënë ai “duke i dhënë drejtim të ri vendit”.

Sipas tij, “garancë është platforma politike e AAK-së dhe lista zgjedhore, me njerëz kompetentë, ekspertë të shquar dhe personalitete të dëshmuara me punën e tyre, sot dhe në të kaluarën, me vizion e përkushtim për të ardhmen e vendit”.

Ndërkaq, në prezentimin para medias, nënkryetari Ardian Gjini, ka folur për angazhimet e AAK-së në këtë periudhë në ndërtimin e listës zgjedhore dhe hartimin e platformës, më të mirës prej të gjitha partive, në garën për zgjedhjet e ardhshme.

Gjini ka potencuar faktin se, veç tjerash, ajo që e bën të veçantë AAK-së në këtë garë zgjedhore, është fakti se për herë të parë që prej zgjedhjeve të viti 2004, në krye të AAK-së dhe në garën zgejdhore, është kryetari dhe ish-kryeministri Ramush Haradinaj, mungesa e të cilit ka qenë vështirësia dhe sfida kryesore e AAK-së, në të gjitha zgjedhjet e fundit nacionale në vend. /Telegrafi/

Malisheva, shumë shpejt, do të bëhet me çerdhe për fëmijë, pasi deri më sot, ky qytet dhe kjo komunë, nuk ka trashëguar asnjë çerdhe për fëmijë. Sot, edhe zyrtarisht ka filluar ndërtimi i çerdhes për fëmijë, në lagjen “Mirëdita” në Malishevë, ndërsa vendosjen e gurëthemelit të çerdhes, e bëri i pari i Malishevës, Ragip Begaj.

Në vënien e gurëthemelit, përveç zyrtarëve komunal, kanë marrë pjesë edhe shumë gra të punësuara dhe që punojnë në Malishevë, në sektore të ndryshme, si mësuese, në shëndetësi, administratë, organizata joqeveritare dhe të tjera.

“Të gjitha ato nëna që punojnë, tani do të kenë kushte më të mira për rritjen dhe kujdesin për fëmijët. Ka qenë e domosdoshme kjo për Malishevën, qysh moti, pasi asnjëherë këtë nuk e ka pasur Malisheva. Ne e kemi ndërprerë tenderin e parë, pasi ka qenë e paraparë me kapacitet për 50 fëmijë, ndërsa tani e kemi rritur për 80 fëmijë, e nëse është nevoja do ta rrisim dyfish kapacitetin, në mënyrë që ju nëna e motra tona, të keni mundësi më të mira dhe të mos pengesa në punë”, tha mes tjerash Begaj, në ceremoninë e vënies së gurëthemelit të çerdhes për fëmijë në Malishevë.

Sipas drejtorit për urbanizëm, Urim Kastrati, kjo çerdhe ka një hapësirë prej 500 metrash katror të objektit, ndërsa hapësira me gjithë oborr, është katërdhjetë ari. Kapaciteti i çerdhes është për 80 fëmijë dhe planifikohet të përfundoj, sipas planit dinamik të punës për 90 ditë.

Ndërtimi i çerdhes financohet nga Komuna e Malishevës dhe ka një shumë prej 130 mijë euro. Punëkryes është N.T.P. “Beli”. /PrizrenPress.com/

Kryetari i Lidhjes Demokratike të Kosovës, Isa Mustafa, tha sot se partia e tij do të jetë fituese e zgjedhjeve të përgjithshme që do të mbahen me 8 qershor. Ai ka thënë se LDK tashmë i ka bërë të gjitha përgatitjet që të shkojë në zgjedhje të lira.

Mustafa ka bërë të ditur se është i hapur për mundësinë e koalicioneve pas zgjedhjeve për të qeverisur me vendin, derisa ka kritikuar qeverisjen e Hashim Thaçit në shumë fusha.

“Unë në emër të Lidhjes Demokratike shprehë bindjen e plotë se Lidhja Demokratike do të jetë fituese e këtyre zgjedhjeve, dhe se humbës i këtyre zgjedhjeve do të jetë partia e cila deri më tani e ka qeverisur vendin e që ka shumë vërejtje në qeverisje, në shumë fusha, në të cilat ne domosdoshmërish dëshirojmë t’i korrigjojmë”, raporton Lajmi.net.

“Ne tani po i bëjmë të gjitha përgatitjet që të shkojmë në zgjedhje të lira, do të punojmë si Lidhje Demokratike me përkushtimin më të madh që zgjedhjet të jenë zgjedhje transparente, të sigurojmë pjesëmarrje të madhe të qytetarëve në këto zgjedhje, që rezultatet e zgjedhjeve të dalin nga votat e qytetarëve dhe të burojnë nga vullneti i drejtpërdrejtë i qytetarëve të Republikës së Kosovës dhe që këto rezultate të jenë të pranueshme edhe për fituesit e zgjedhjeve edhe për humbësit e zgjedhjeve”, tha ai.

Mustafa po ashtu tha se shkuarja në zgjedhje me ligjin e vjetër zgjedhor, nuk do të paraqes ndonjë problem në organizimin e tyre.

Ndryshime në zhvillimin ekonomik, ulje të papunësisë, reforma në arsim e shëndetësi, në administratë, në forcimin e shtetit ligjor dhe qeverisje efektive për qytetarët thotë se janë prioritetet e kësaj partie.

Njohësit e integrimeve evropiane dhe përfaqësuesit e subjektive politike mendojnë se procesi zgjedhor dhe konstituimi i institucioneve të reja do të ndikojnë në ngadalësimin e agjendës evropiane për këtë vit.

Analisti Emrush Ujkani dhe ish-kryetarja e Komisionit Parlamentar për Integrime Evropiane, Vjosa Osmani, kanë deklaruar se Kosova duhet të ketë kujdes në organizmin e këtyre zgjedhje, më pas duhet të fokusohet më shumë në forcimin e rendit dhe të ligjit. “Absolutisht se zgjedhjet do të ndikojnë në agjendën evropiane të Kosovës për këtë vit dhe jo vetëm. Me gjasë zgjedhjet do të ndikojnë në gjithë jetën institucionale dhe publike në vendin tonë, sepse do të mungojë pushteti politik, i cili legjitimohet nëpërmjet zgjedhjeve, ndërsa ai administrativ do të mundohet të bëjë aq sa është e mundur”, ka thënë Ujkani për “Epokën e re”.

Ai ka bërë me dije se deri kah muaji tetor nuk do të ketë institucione efikase të cilat do të mund të merreshin në mënyrë serioze me agjendën evropiane. “Tash i kemi zgjedhjet që priten të përfundojnë në muajin qershor. Pastaj konstituimi i institucioneve të reja me gjasë nuk do të mund të ndodhë deri në fillim të vjeshtës së këtij viti. Respektivisht institucione efektive do të kemi vetëm prej tetorit të këtij vitit, prandaj duhet të marrim parasysh se sa institucionet do të kenë legjitimitet për të vepruar karshi sfidave që i ka përmendur z. Fyle”, është shprehur Ujkani.

Ai ka treguar se për institucionet e Kosovës do të jetë mjaft vështirë t’i përmbushin porositë e komisionarit për Zgjerim të BE-së, Stefan Fule, të cilat i ka dhënë gjatë vizitës në Kosovë. “Këto nuk janë kushte të reja që i vendosen Kosovës, por sado të arrihen ato apo sado të kompletohen ato, nuk është e mundur të kompletohen deri në fund të vitit, por është e mundur të përmirësohen deri në fund të vitit. Sundimi i ligjit është një kriter i cili kërkon angazhim më serioz. Dihet se Kosova vazhdimisht ka çaluar në vendosjen e sundimit të ligjit në gjithë territorin. Prandaj, mendoj se ka mundësi të përmirësohen ato, por jo të plotësohen të gjitha”, ka thënë Ujkani, duke shtuar se reforma në fushën e sundimit është kriteri që lidhet drejtpërdrejt me procesin e liberalizimit të vizave.

Ndërsa ish-kryetarja e Komisionit Parlamentar për Integrime Evropiane, Vjosa Osmani, ka vlerësuar për “Epokën e re” se vetëm një qeveri e përgjegjshme pas zgjedhjeve do të mund ta kompensonte kohën e humbur me punë efikase. “Institucionet e rendit dhe ligjit do të kenë mundësinë ta dëshmojnë veten gjatë zgjedhjeve të ardhshme, duke mos lejuar manipulim të vullnetit të qytetarëve. Natyrisht se zgjedhjet dhe krijimi i institucioneve të reja marrin pak kohë, mirëpo nëse krijohet një qeveri e përgjegjshme, ajo kohë mund të kompozohet nëpërmjet punës efikase”, është shprehur Osmani. Sipas saj, sundimi i ligjit duhet të jetë objektiv i përhershëm i institucioneve të Kosovës. “Fatkeqësisht, qeveria e tanishme ka dëshmuar jo vetëm mungesë të vullnetit politik për të avancuar në këtë fushë, por vetë është bërë pjesë e aferave korruptive e kriminale që kanë rezultuar me regres në sundimin e ligjit. Një aspekt tjetër është ndërhyrja e vazhdueshme politike e qeverisë në institucionet e sigurisë dhe të drejtësisë, fenomen ky që urgjentisht duhet të luftohet”, ka thënë Osmani.

Qeveria e ardhshme, sipas saj, që do të udhëhiqet nga LDK-ja, do të jetë ndryshe nga qeveritë e deritashme. “Qeveria e ardhshme, e udhëhequr nga LDK-ja, do të ketë prioritet luftimin e dukurive të tilla negative dhe në këtë mënyrë do të kontribuohet në krijimin e një shteti ku sundon ligji dhe ku askush nuk është mbi ligjin”, ka deklaruar Osmani.

Komisionari për Zgjerim i BE-së, Stefan Fyle, gjatë vizitës në Kosovë, një ditë më parë, pati deklaruar se agjenda e Kosovës drejt integrimit evropian për këtë vit sillet rreth tri çështjeve kryesore. “Së pari duhet të vazhdohet procesi i normalizimit të marrëdhënieve me Serbinë. Së dyti, përfundimi i zgjedhjeve të përgjithshme, që do të mbahen së shpejti, kështu më thanë. E treta, nevoja që të vazhdohet puna me reformat në sundimin e ligjit, gjë që është theksuar në Studimin e Fizibilitetit dhe në Raportin e kaluar të Progresit”, ishte shprehur Fyle.