Kryetari i Lëvizjes Vetëvendosje, Albin Kurti, mbajti një ligjëratë në Universitetin Amerikan të Kosovë me temë “Sfidat e Politikës së Jashtme në Republikën e Kosovës”, në të cilën ai ka paraqitur tetë teza kryesore si parime dhe prioritete të politikës së jashtme.Politika e jashtme duhet të jetë e lidhur ngushtë me politikën e brendshme dhe duhet të shërbejë si zgjerim i saj. Vetëm atëherë kur të kemi një shtet të pavarur, kemi mundësi të bëhemi partner i mirëfilltë për t’u bërë të ndërvarur, pra për t’u integruar, ka thënë Kurti duke prezantuar tezën e parë të prioriteteve të politikës së jashtme të Kosovës.

Më tej Kurti ka thënë se “Marrëdhëniet me shtete e tjera duhet të bazohen në dy parime bazë: njohja dhe respektimi i ndërsjellë i lirisë dhe vetëvendosjes, dhe interesi reciprok për bashkëpunim”.

“Republika e Kosovës ende nuk ka arritur njohje të plotë ndërkombëtare dhe vazhdon të mos ketë ulëse në OKB, prandaj raportet bilateral mbesin më të rëndësishme për shtetin sesa ato multilaterale. Në këto rrethana, ato janë më të rëndësishme për shkak të përfitimit më të shpejt për shtetin tonë. Të gjitha shtete që e kanë njohur Kosovën duhet të vendosen në funksion të avancimit të Republikës së Kosovës drejt institucioneve multilaterale në të cilat janë pjesëmarrëse edhe vendet që ende nuk na kanë njohur”, prezantoi Kurti tezën e katërt.

“Kosova duhet të përqendrohet në mishërimin dhe materializimin e njohjeve të deritanishme e jo vetëm në rritjen e numrit të njohjeve. Sigurisht që zhvillimi i një vendi nis nga brenda por ai mund të ndihmohet edhe nga jashtë. Përmes bashkëpunimit me shtetet që na kanë njohur në fusha të ndryshme si: bujqësia, arsimi shëndetësia etj. Kosova mundëson zhvillimin socio-ekonomik të vendit”, tha lideri i VV duke prezantuar tezën e pestë të prioriteteve të politikës së jashtme.

“Marrëdhëniet e Kosovës me shtete e tjera përcaktohen edhe nga qëndrimi i tyre ndaj pavarësisë, sovranitetit dhe integritetit territorial të Republikës së Kosovës, ndaj shqiptarëve dhe çështjes shqiptare në përgjithësi. Angazhimi jonë është që Kosova të mos ketë armiq, por jemi të vetëdijshëm se kjo është vështirë e arritshme. Prandaj, politika jonë e jashtme duhet të ketë hierarki të miqve dhe niveli i bashkëpunimit me ta do të zhvillohet duke pasur parasysh këtë hierarki”.

Duke prezantuar tezën numër gjashtë Kurti tha se “Tregtia e jashtme është pjesë e politikës së jashtme. Në politikën e jashtme është i domosdoshëm dallimi i shteteve mike dhe atyre jo-mike varësisht nga politika e qëndrimet e tyre shtetërore”.

“Politika e jashtme e Republikës së Kosovës në rajon duhet të përqendrohet në marrëdhëniet me shqiptarët që jetojnë nëpër vendet që na rrethojnë. Ajo duhet të përpilohet varësisht nga gjendja dhe pozita e shqiptarëve në ato vende”, tha Kurti.

Ndërsa në tezën e fundit, nukër tetë, Kurti tha se “Kontributi i mërgatës së Kosovës për thellimin e raporteve bilaterale është i pashmangshëm dhe asaj duhet t’i jepet mundësia që, përmes koordinimit të punëve me ambasadat e shtetit, të ndihmojë substancialisht në avancimin e këtyre raporteve. Qeveria e Kosovës duhet ta shtojë bashkëpunimin me ato shtete ku është më e madhe mërgata shqiptare si: ShBA, Gjermani, Britani e Madhe, Zvicër, Itali, Turqi etj”.

Pas parashtrimit të tetë tezave të tij për politikën e jashtme të Kosovës, Kurti iu përgjigj pyetjeve të ngritura nga studentët.

Kryetari i Kuvendit të Kosovës, Jakup Krasniqi, nuk ka dashur të deklarohet rreth mbajtjes së zgjedhjeve të Serbisë edhe në territorin e Kosovës.

Pas mbledhjes së Kryesisë së Kuvendit, Krasniqi tha se për çështjen e zgjedhjeve duhet të pyetet Kryeministri dhe ata që kanë qenë të përfshirë në bisedimet e Brukselit.

“Marrëveshjen e kanë bërë Qeveria, ekzekutivi i vendit. Ne e respektojmë çdo vendim të cilin e merr Qeveria dhe Qeveria duhet ta t’i marrë vendimet konform Kushtetutës dhe ligjeve që janë në fuqi”.

I pyetur se a është shkelje e sovranitetit, mbajtja e këtyre zgjedhjeve në Kosovë, Krasniqi thotë se ai është vetëm për respektimin e Kushtetutës dhe ligjeve në fuqi.

“Unë nuk jam këtu që të jap përgjigje se a është shkelje. Po, unë e thash, respektimin e Kushtetutës dhe ligjeve dhe me këtë unë e thash mendimin tim”.

“Për marrëveshjen pyeteni Kryeministrin, zëvendëskryeministrin që kanë qenë në bisedime”.

Sa i përket vendeve të rezervuara, Krasniqi i quan të paarsyeshme kërkesat e minoriteteve.

“Unë për këtë çështje kam dhënë mendimin tim dhe se kam asnjë arsye që ta ndryshojë. Unë konsideroj që kërkesat e minoriteteve pakicë janë të paarsyeshme, janë jo konform Kushtetutës, janë kundër dokumentit gjithëpërfshirës të Presidentit Ahtisaari, në të cilin i kanë edhe vendet e rezervuara dhe ata duhet ta dinë se në asnjë vend të rajonit dhe të Europës nuk ka as vende të rezervuara dhe as vende të garantuara, por i nënshtrohen një procedure të votimit”.

“Në këtë aspekt janë të avancuara të drejtat dhe liritë e komuniteteve pakicë dhe çka është më kryesorja, kështu siç janë të garantuara është dëmtim i proceseve demokratike në Kosovë dhe një kërkesë e tillë është e paarsyeshme”.

Për këtë arsye Krasniqi thotë se minoritetet nuk kanë arsye që t’i bllokojnë ndryshimet Kushtetuese, siç do të jetë ai për shndërrimin e FSK në FAK.

“Sikur vendimi ose ndryshimi që do të bëhej të ishte kundër marrëveshjes ndërkombëtare të Vjenës, dokumentit gjithëpërfshirës të Ahtisaarit, ata kanë të drejtën ta bllokojnë. Por, gjithçka që është konform atij dokumenti nuk kanë të drejtë ta bllokojnë, pra as ndryshimet kushtetuese që i duhen Kosovës”.

Krasniqi ka bërë të ditur se ende nuk ka arritur në Qeveri ligji për zgjedhjet, në mënyrë që të procedohet me futjen e tij në rendin e ditës të seancës së ardhshme të Kuvendit.

“Ligji ende nuk është kthyer nga Qeveria. Nëse kthehet nga Qeveria dhe partitë politike në Kuvend janë të gatshme ta respektojnë Rregulloren e Kuvendit mund të shkojë duke e votuar paraprakisht anashkalimin e rregullores me 80 vota të deputetëve. Mund të hyjë në rend dite nëse është vullneti i grupeve politike”.

Në lidhje me temën aktuale për krijimin e një Tribunali për krime të luftës në Kosovë, Krasniqi shprehet:

“Konsideroj që institucionet e Kosovës në përgjithësi, politika e Kosovës në veçanti duhet ta shikojë dhe rishikojë mirë funksionimin e sistemit të drejtësisë, se a është duke funksionuar sipas Kushtetutës dhe ligjit”.

“Përndryshe, Tribunali i Hagës, nëse veç precizohet për luftën, unë jam i bindur se nuk ka nevojë se edhe ashtu ishte një Tribunal i Hagës”.