Iniciativa Qytetare Për Malishevën (IQPM), ka reaguar pas “dezinformatës” së kreut aktual të Malishevës, Isni Kilaj, për gjoja dëmtimin e veturave dhe pengimin e fushatës zgjedhore në fshatin Damanek, duke drejtuar gishtin kah IQPM dhe kandidati i saj Veton Kastrati.

“IQPM bën me dije tërë opinionin publik dhe të gjitha organet shtetërore, Policinë e Kosovës dhe Komisionin Komunal Zgjedhor se kjo është një e pavërtetë e madhe”, duke shtuar se kandidati i saj për kryetar, Veton Kastrati, ka qenë në fushatë me IQPM në fshatrat Magjarë dhe Shkozë gjatë asaj kohe.

“IQPM dhe të gjithë anëtaret e saj nuk janë fare të interesuar të merren me asnjë subjekt politik garues në Malishevë e aq më pak me grupin qeverisës tanimë të dështuar, ne do të merremi vetëm me popullin dhe qytetarët e Malishevës, të cilëve do t’ua kthejmë dinjitetin”, thuhet në komunikatë të IQPM.

IQM po ashtu shkruan se ia bën me dije skenaristit të ngjarjeve të shëmtuara në të kaluarën, i cili siç duket prapë është aktivizuar për skenarë të tillë që janë të dëmshëm dhe të rrezikshëm për Malishevën, se ka ardhur koha që çmimin e merituar ta marrë më 3 nëntor, përmes votës së lirë e demokratike.

“Jemi të sigurt që qytetarët e Malishevës e dinë fortë mirë se kush është ai i cili është mësuar të gjuajë gurin dhe të fshehë dorën, dhe prapë të përfitojë pushtetin, duke ngritur kurthe për bashkëpunëtorët e tij të ngushtë e deri te kundërshtarët politikë. Por është fundi i këtij grupi tërësisht të dëmshëm dhe destruktiv për  skenën politike në Malishevë”.

Pos tjerash, IQPM i bën thirrje Hashim Thaçit që të marrë masat e duhura për të futur nën kontroll këtë grup të degjeneruar në Malishevë, i cili ka uzurpuar institucionet lokale dhe degën e PDK-së në Malishevë, edhe pse “konsiderojmë se e gjithë kjo është e orkestruar nga dy individë, nga Hashim Thaçi dhe Isni Kilaj, të cilët i ka verbuar mbajtja e pushtetit me çdo formë”.

IQPM iu bën thirrje qytetarëve që ta ruajnë qetësinë dhe të mos bien pre e provokimeve dhe kurtheve që cilat po i ngre grupi joformal dhe dega e PDK-së në Malishevë./PrizrenPress.com/

Në Kosovë është politizuar edhe emërimi i drejtorëve në sektorin parauniversitar, thonë udhëheqës të Sindikatës së arsimit dhe ekspertë për çështje të kësaj fushe, duke shtuar se kriter për zgjedhjen e drejtorëve, është afërsia me akëcilën parti që udhëheq komunën.

Kreu i Sindikatës së Bashkuar për Arsim, Shkencë dhe Teknologji, Ali Shabani, thotë për Radion Evropa e Lirë, se emërimi i drejtorëve të shkollave në baza partiake dhe pa kritere, është bërë i zakonshëm në këtë sektor.

“Kjo çështje shihet haptas, se nëpër komuna, kryesisht drejtorë të shkollave emërohen militantë të partive. Fatkeqësisht është kjo, edhe pse në komuna aty-këtu ka ndonjë drejtor të partive tjera, në mënyrë që të kamuflojë situatën, ose janë njerëz të afërt, të cilët për shkak të nepotizmit, edhe mbahen në krye të institucioneve arsimore”, thotë Shabani.

Edhe Dukagjin Pupovci, nga Qendra për Arsim e Kosovës, pohon se nuk merret për bazë aftësia profesionale e kandidatit potencial, por prioritet në konkurse mbetet dëgjueshmëria dhe përfaqësimi i interesave të partisë në pushtetin lokal.

Ai, madje, shprehet se shpeshherë drejtorët e shkollave emërohen me idenë se ata do të jenë menaxherë të qendrave të votimit dhe jo menaxherë të një institucioni edukativo- arsimor.

“Unë mendoj se arsyeja qëndron në faktin se komunat duan të kenë kontroll mbi shkollat, pasi ato janë në varësi të komunave. Shkollat, përveçse punësojnë një numër të caktuar të kuadrit, që janë punonjës publik dhe bartës të komunës, ato janë edhe qendra votimi”.

“Nëpërmjet shkollave në shumë zona, konkretisht në ato rurale, bëhen ndikime te popullata, ato vlejnë edhe si qendra të komunitetit, ku njerëzit mblidhen, takohen, bisedojnë e kështu me radhë. Dhe, në këtë kulturën tonë është shumë e zakonshme që komunat të shprehin vullnetin për të ushtruar një farë kontrolli mbi shkollën”, pohon Pupovci.

Ndryshe, Ali Shabani thotë se SBASHK-u ka kërkuar nga autoritetet kompetente që kjo dukuri të parandalohet.

“Ne kemi kërkuar disa herë që politika të jetë larg shkollës, sepse shkolla do profesionalizëm dhe jo politikë, por fatkeqësisht një gjë e tillë ekziston sot. Aktualisht, ka shumë ushtrues detyre të drejtorëve dhe pritet 3 nëntori të dëshmojnë veten ata në zgjedhjet lokale, ose të ndodhë e kundërta”, konsideron Shabani.

Në anën tjetër, udhëheqës të Ministrisë së Arsimit, theksojnë se nuk mund të përjashtohen raste të tilla, por që ankesa për këtë çështje, nuk arrijnë në Ministri të Arsimit.

Alush Istogu, drejtor i Departamentit të Administratës së Arsimit Parauniversitar, thotë se emërimi i drejtorëve të shkollave nuk është kompetencë e Ministrisë, por e kryetarit të komunës.

Megjithatë, ai shprehet se në raste të parregullsive dhe ankesave eventuale të paraqitur, ministria kontrollon situatën se a janë respektuar procedurat, dhe jep rekomandime, por prapë vendimin e merr kryetari i komunës.

“Nuk besoj se ndodh kjo, edhe pse nuk përjashtohet rasti, por ne si ministri, nuk marrim ankesa të tilla. E kemi Departamentin e Inspeksionit”.

“Natyrisht, Inspeksioni shkon e incizon gjendjen dhe shikon se a janë respektuar procedurat dhe jep vlerësim, ai mund të japë rekomandime, ndryshe nuk ka të drejtë të marrë vendime, sepse vendimin e nxjerrin organet komunale në bazë të Ligjit për arsim”, potencon Istogu.

Sidoqoftë, në bazë të Ligjit për arsimin parauniversitar në Republikën e Kosovës, drejtorët dhe zëvendësdrejtorët e institucioneve arsimore, mësimdhënësit, asistentët dhe instruktorët, zgjidhen përmes një konkursi publik në bazë të meritës personale, pa asnjë lloj diskriminimi të drejtpërdrejtë apo të tërthortë për arsye reale apo të supozuara që ka lidhje me gjininë, racën, gjendjen martesore, orientimin seksual, përkatësinë etnike, nevojat e veçanta, pasurinë, vendin e lindjes, pikëpamjet politike ose filozofike apo rrethanat e tjera.

Autoritetet që bëjnë emërimet, siç përcaktohet në këtë ligj, krijojnë procedura të drejta, të hapura dhe transparente për angazhim bazuar në kualifikimet dhe nevojat e postit.

Partisë Demokratike e Kosovës (PDK) Dega në Malishevë, mbrëmë ka mbajtur një tubim në fshatin Damanek. Kandidati i PDK-së për kryetar të Komunës së Malishevës, Isni Kilaj tha se realizimi i projekteve, nuk është meritë vetëm e tij, ose e qeverisë komunale, por në radhë të parë, është meritë e banorëve të Damanekut.

“Edhe Qeveria e Kosovës, e udhëhequr nga kryeministri Thaçi, i ka përkrahur të gjitha projektet për Malishevën dhe të gjithë së bashku, kemi arritur ti realizojmë të gjitha që ju kemi premtuar. Edhe sonte ju them se të gjitha projektet për katër vitet e ardhshme, si në infrastrukturë, bujqësi dhe të tjera, do të realizohen, pasi kemi projekte konkrete dhe të planifikuara nga ekspertët tanë”, tha Kilaj.

“Ne jemi PDK-ja e vërtetë, e fjalës, e punës, për qytetarin dhe shtetin. Ne nuk kemi fjalë boshë, premtime boshe, por të realizueshme. Ashtu sikur kemi arritur që ti bëjmë të gjitha këto në katër vitet e fundit, ashtu do ti realizojmë premtimet në katër vitet e ardhshme”, tha në fund Kilaj, duke ju bërë thirrje për fushatë të qetë, pa fyerje.

Edhe Naser Krasniqi, ju bëri thirrje të gjithë qytetarëve të Malishevës dhe Damanekut, që ta votojnë PDK-në. “Unë kam vendosur ta përkrahi PDK-në, pasi këtu e gjej veten, tek vlerat e mirëfillta, te respekti që ka ndaj qytetarit dhe për punën që PDK e bën në të mirë të qytetarëve të Malishevës. Andaj, votoni për Isni kIlaj dhe PDK-në, për të vazhduar qeverisjen e mirë, për Malishevën Evropiane”, tha Krasniqi.

Edhe bartësi i listës së PDK-së për Kuvendin e Komunës së Malishevës, Adem Berisha, bëri thirrje për ta votuar Isni Kilaj dhe për kandidatët e PDK-së, pasi sipas Berishës, “këtu janë vlerat”. “Me votën për Isni Kilaj dhe për PDK-në, ju votoni për ta vazhduar qeverisjen e mirë. Për të votuar kandidatët e PDK-së, ju votoni për më të mirët, pasi 34 kandidatët tanë, janë profesioneve dhe të moshave të ndryshme, përmes së cilëve, të gjithë qytetarët, do të kenë mundësi ti realizojnë kërkesat e tyre”, tha Berisha./PrizrenPress.com/

Kandidati i LDK-së për kryetar të Komunës së Malishevës, Salih Morina ka vizituar banorët e fshatit Shkozë, i cili theksoi se me qeverisjen e LDK-së, Shkoza do të trajtohet ndryshe. Ai tha se dera e kryetarit të Komunës do të jet gjithmon e hapur për qytetar.

“Do ketë qeverisje transparente e cila do të punoj me përkushtim për të përmirsuar jetën e qytetarit, do të ketë zhvillim ekonomik, do të ketë menaxhim të drejtë të buxhetit, do të përmirsojm gjendjen në shëndetësi në mënyrë që të ofrojëm shërbime më të shpejta dhe më të mira për qyetarët. Prioritet i veqantë për LDK-në do të jetë rinia, ne do të ofrojmë më shumë mundësi për ta”, tha Morina.

Ai ju premtoi banorëve funksionalizimin e ujësjellësit, përfundimin e kanalizimeve si dhe ndërtimin e rrugëve të lagjeve në Shkozë.

Duke kërkuar mbështetje të fuqishme, Morina ju bëri thirrje banorëve të Shkozës që sa më shumë të dalin në zgjedhje dhe të votojnë për LDK-në dhe kandidatin e saj, si dhe kandidët për Këshilltar Komunal.
Kurse, kryetari i Degës së LDK-së në Malishevë, Januz Kastrati, duke kërkuar mbështetje të fuqishme nga banoret e Shkozës, ai tha se me LDK arsimi ne Malishevë do të jet ndryshe do tu kthehet dinjiteti i humbur i mësuesve, me këte rast ai përmendi darkat që pushteti ne ikje po i jep vetëm para fushatës elektorale.

“Në Malishevë LDK-ja do të fitoj bindshëm dhe pa balotazh sepse kandidati i LDK-së për kryetar komune Salih Morina si dhe kandidatët e LDK-së për asamble komunale jan më të mirët”, tha Kastrati.

Ndërkaq, kryetari i Nëndegës së LDK-së në Shkozë, Besnik Bytyqi, njëherit edhe kandidat për asamble komunale nga radhët e LDK-së foli për ngecjet dhe dështimet e projekteve në fshatin Shkozë, si dhe mos gadishmërinë e pushtetit aktual për ti përfunduar këto projekte./PrizrenPress.com/

Debati i organizuar mbrëmë nga televizioni publik, RTK, me kandidatët për kreun e qytetit të Prizrenit ishte pa dy kandidatët kryesor të kësaj komune, Ramadan Mujën të PDK-së dhe Eqrem Kryeziu e LDK-së.

Këta të dy, nuk brengosen për faktin që nuk kanë qenë pjesë e këtij debati.

Kryetari i Prizrenit, Ramadan Muja, tha për Indeksonline, se debatet televizive nuk janë në plan të parë për të.

“Mospjesëmarrja ime ka qenë angazhimi në punë të tjera dhe skam pasur mundësi të marrë pjesë. Jemi në fushatë dhe është aktiviteti shumë dinamik”, tha Muja.

Kurse për debatet e tjera, ai nuk premton që do të jetë prezent.

“Unë kam punë me qytetarin e komunës së Prizrenit, nuk kam nevojë me u reklamu aty në televizionet qendrore”, tha Muja.

Sipas të parit të Prizrenit, zotimet e tij duhet të jenë për qytetarin e Prizrenit e jo të Prishtinës.

Kurse kandidatit për kryetar të Prizrenit nga radhët e LDK-së, Eqrem Kryeziut, nuk i intereson kjo pyetje.

“Aaaaa… pa’i jo, nuk i komentoj ato gjana që kanë kalu”, theksoi Kryeziu.

Gjithashtu edhe në debatin e parë të në RTK, të organizuar për kryetar të Prishtinës, ka munguar Isa Mustafa

Raportohet se në një kafiteri në rrugën “Brigada 123” në Suharekë, në njërën prej kafiterive të qytetit ka pasur një mosmarrëveshje në mes të dy grupeve.

Prej gjashtë të dyshuarve meshkujve, ka ardhur deri te rrahja në mes tyre, me ç’rast lëndime trupore kanë pësuar dy prej tyre, transmeton Indeksonline

Këta të fundit janë dërguar për tretmanë mjekësorë në spitalin rajonal të Prizrenit, njofton Policia e Kosovës.