Kryekuvendari Jakup Krasniqi është njeriu i parë nga institucionet e vendit që ka përshëndetur lirimin e Fatmir Limajt dhe ish bashkëlutëtarëve të tij.
“Me rastin e lirimit të Fatmir Limajt dhe të tjerëve nga akuzat e padrejta, të liruesve ju dëshiroj më të mirat në jetë, punë e familje! Urime!”, ka shkruar Krasniqi në Facebook./PrizrenPress.com/
Kryeministri i Republikës së Kosovës, Hashim Thaçi përshëndet vendimin për shpalljen të pafajshëm të komandantit të UÇK-së, Fatmir Limaj dhe bashkëluftëtarëve të tij.
Kryeministri Thaçi tha se me këtë proces gjyqësor u dëshmua edhe një herë pastërtia e luftës së drejtë të Ushtrisë Çlirimtare të Kosovës. “Qeveria e Republikës së Kosovës, që nga fillimi i këtij procesi ndaj komandantit Fatmir Limaj dhe pjesëtarëve të tjerë të UÇK-së ka besuar fuqishëm në pafajësinë e tyre dhe në drejtësinë e luftës së Ushtrisë Çlirimtare të Kosovës”, është thënë në deklaratën e kryeministrit Hashim Thaçi.
Një i ri 25 vjeçar me inicialet B.K. nga fshati Balincë e Malishevës ka bërë vetëvrasje me litar dje në mesditë. Të afërm tashmë të ndjerit kanë bërë të ditur për Kosova Sot se ai është gjetur i vetëvrarë në shtëpinë e tij nga familjarët, por kanë thënë se për momentin nuk dinë asgjë më shumë, e as motivet që e kanë shtyrë të riun të vetëvritet.
Ndërkaq, pak para se të vetëvritej, i riu nga Balinca në rrjetin social Facebook ka shkruar: “kerkoj falje prej krejtve qe um kan dasht edhe qe i kum dasht :*:*:*:*:*”.
(E Plotësuar) Fatmir Limaj, Arben Krasniqi, Naser Krasniqi, Nexhmi Krasniqi, Behlul Limaj, Refki Mazreku, janë shpallur të pafajshëm në rastin “Kleçka” nga trupi gjykues i këtij procesi gjyqësor, i kryesuar nga Malkom Simons.
Ndërkohë është duke u marrë vendimi për të tjerët, raporton ‘Epoka e re’.
Përveç Fatmir Limajt, në rastin “Kleçka” kanë qenë të përfshirë edhe Arben, Naser e Nexhmi Krasniqi, Behlul Limaj, Refki Mazreku, Naser, Sabit e Shaban Shala si dhe Besim Shurdhaj.
Vitin e kaluar Gjykata e Qarkut në Prishtinë, tani Themelore, kishte shpallur të pafajshëm të gjithë të akuzuarit për rastin “Kleçka”, mirëpo në po të njëjtin vit Gjykata Supreme kishte marrë vendim ta kthejë komplet në rigjykim rastin “Kleçka”.
Sot vendoset për rastin “Kleçka”
Gjykata Supreme sot vendos nëse ish komandanti i UÇK-së, Fatmir Limaj dhe nëntë ish luftëtarët e tij janë fajtorë për veprat për të cilat akuzohen nga Prokurori Mairizio Salustro ose jo.
Avokatët mbrojtës vlerësojnë se nëse do të respektohet drejtësia, atëherë do të jetë vetëm një aktgjykim, ai lirues për Fatmir Limajn dhe të tjerët. Derisa, ekspertë ligjor thonë se duke parë lëndën dhe provat e paraqitura, patjetër se për të akuzuarit e rastit “Kleçka” do të duhej të vinte vetëm aktgjykimi lirues.
Tomë Gashi, avokati i Fatmir Limajt, shprehet i bindur se duke i marrë për bazë provat e administruara në rigjykimin e këtij rasti, dhe nëse respektohet drejtësia, atëherë do të jetë vetëm një aktgjykim për Fatmir Limajn dhe nëntë ish bashkëluftëtarëve të tij, e ai është lirues.
Gashi thotë se prokurori e ka thënë vet se e gjithë aktakuza është ndërtuar mbi bazën e një dëshmitari dhe deklaratave të tij, duke provuar t’i mbështesë me dëshmitarë të tjerë, por që gjithë i kanë ndërruar deklaratat e tyre, në seancën gjyqësore, nga ato të cilat i kanë dhënë tek prokurori, duke deklaruar se kanë qenë të kërcënuar, të shantazhuar nga prokurori, gjë të cilën e ka thënë edhe vet dëshmitari kryesorë Agim Zogaj.
“Ne, përfundimisht, nëse respektohen dispozitat ligjore dhe nëse respektohet drejtësia në parim, po ashtu, edhe provat gjatë këtij rigjykimi, atëherë presim vetëm një lloj të aktgjykimit, dhe përfundimisht do të ishte aktgjykim lirues për Fatmir Limajn, por besoj edhe për nëntë ish bashkëluftëtarët e tij që janë me vite të tëra duke u përballur me këto akuza dhe përfundimisht do të duhej të mbyllej ky kapitull i ndjekjes penale për Fatmir Limajn për krime lufte për të cilat nuk ka asnjë provë që ka mundur të jetë i involvuar për këto çështje për të cilat prokurori është duke e akuzuar permanent”, ka thënë Gashi për Kosovapress.
Ndërsa, profesori Riza Smaka, i cili thotë se e ka përcjell me vëmendje këtë proces, shprehet se asnjë vendim tjetër nuk duhet të jetë në këtë proces, përveç atij lirues.
“Unë e konsideroj këtë proces juridiko penal të inspiruar politikisht. Unioni Evropian e ka një politikë absolutisht subjektive dhe tendencioze dhe të papranuar. Sepse tenton ta bëjë një barazim mes palës serbiane dhe shqiptare, kosovare, do të thotë ta bëjë një balancë, se ata kanë bërë krime, ne paskemi bërë krime, që absolutisht nuk qëndron. Sepse ne ishim viktimë, populli ishte i paarmatosur, nuk ishte agresor, aq sa ka mundur të mbrohej është mbrojtur në pragun e vet, në trojet e veta, ndërsa Serbia ishte agresori, hegjemoniste, që bënë krime të papara e që për çudi pikërisht Unioni Evropian i mohojnë apo abstrakojnë”, ka thënë Smaka për Kosovapress.
Ndërkohë, në fjalën përfundimtare të tij, Prokurori Mairizio Salustro ka këkruar që të akuzuarit të shpallën fajtor për veprën për të cilën akuzohen.
Sot, në orën 14:00, trupi Gjykues i përbërë nga dy gjyqtarë të EULEX-it dhe një gjyqtare vendore, do të shpallin aktgjykimin përfundimtar për të akuzuarit në rastin “Kleçka”, pas rigjykimit që ka zgjatur me shumë se gjashtë muaj dhe mbajtjes dhjetëra seancave gjyqësore./Kosovapress/
Janë edhe nëntë subjekte politike, të cilat e presin vendimin e Komisionit Qendror të Zgjedhjeve për certifikim për pjesëmarrje në zgjedhjet lokale të 3 nëntorit. Zyra për regjistrimin e partive politike ka shqyrtuar dokumentacionin e 5 partive politike dhe 4 nismave qytetare, ndërsa tani i mbetet KQZ-së që të vendos për certifikimin e tyre. Zyra për certifikimin e partive politike nuk bën të ditur se çfarë ka rekomanduar për Listën qytetare “Serbia”, ndërsa në KQZ thonë se nëse kjo listë i përmbush kushtet do të certifikohet. Kushti kryesor është ndryshimi i emrit të saj.
Deri më tani Komisioni Qendror i Zgjedhjeve ka certifikuar 92 subjekte politike për pjesëmarrje në zgjedhjet lokale që do të mbahen më 3 nëntor. Kanë mbetur edhe nëntë subjekte për certifikim, në mesin e të cilave edhe Lista qytetare “Serbia”, raporton RTK.
Udhëheqësja e Zyrës për regjistrimin e partive politike, Miradije Mavriqi thotë se është KQZ-ja ajo që do ta thotë fjalën e vetë në mbledhjen e radhës për certifikimin edhe të nëntë subjekteve të fundit që kanë mbetur pa u certifikuar.
“Zyra e ka shqyrtuar dokumentacionin vetëm kemi rekomandimet për nëntë subjekte politike, jemi në procedurë, do të thotë sot ose nesër kur do të mbahet mbledhja e radhës e KQZ-së janë për pesë parti politike dhe 4 iniciativa qytetare”, tha Mavriqi për Radio Kosovën.
Mavriqi nuk dëshiron të jap ndonjë koment lidhur me rekomandimin që kjo zyre do të jap për listën “Serbia”.
Nga ana tjetër, anëtari i KQZ-së, Ilir Gashi thotë se vendimi i KQZ-së do të jetë në bazë të rekomandimeve që jep Zyra për regjistrimin e partive politike. Ai thotë se nëse i plotëson kushtet, edhe kjo listë qytetare do të certifikohet. E një prej kushteve kryesore në rastin e Listës qytetare “Serbia”, është ndryshimi i emrit të saj.
“Të gjitha subjektet politike, emërtimet e tyre duhet t’i kenë në harmoni me frymën ligjore në Kosovë. Kështu që njëra nga to ka qenë edhe në rastin e Listës Serbia dhe ne presim që të gjitha rekomandimet do të plotësohen edhe do të kthehen dhe vetëm atëherë kur të verifikojmë që rekomandimet tona janë të plotësuara atëherë edhe mund të marrim vendim për të certifikuar të gjitha subjektet politike, edhe për rastin konkret”, tha Gashi për Radio Kosovën.
Ndryshe, nga 105 subjekte që kanë aplikuar për certifikim në KQZ, 2 janë tërhequr nga gara, ndërsa 92 janë certifikuar deri më tani. Kanë mbetur edhe 9 subjekte për t’u certifikuar, 5 parti politike dhe 4 nisma qytetare. Hedhja e shortit për renditjen e subjekteve politike në fletëvotim do të bëhet të enjten më 19 shtator.
Kryeministri i Republikës së Kosovës, Hashim Thaçi, mori pjesë në takimin e dytë të ekipit negociator për Marrëveshjen e Stabilizim-Asociimit. Në takimin e sotëm kryeministri kërkoi nga resorët përkatës qeveritarë që të angazhohen maksimalisht në përmbushjen e obligimeve që dalin nga procesi i negocimit të marrëveshjes së Stabilizim-Asociimit me Bashkimin Evropian.
Kryeministri Thaçi në fjalën e tij theksoi se i tërë procesi është i bazuar në tri shtylla, për të cilat theksoi se duhet të kenë vëmendjen gjatë gjithë procesit: e para: efiçienca kohore; e dyta: negociatat duhet të bazohen në fakte dhe në statistika; dhe e treta: llogaridhënia.
“Tanimë kemi folur për rëndësinë e kësaj marrëveshje për shtetin tonë. Jam i sigurt që është për të gjithë individët dhe institucionet e përfshira në këtë proces, rëndësia e madhe e kësaj marrëveshje për çka edhe jemi duke punuar maksimalisht.
Marrëveshja ka implikime praktike e konkrete në përmbushjen e qëllimeve tona në procesin e integrimeve evropiane. Na ka mbetur edhe pak kohë, deri në hapjen e negociatave dhe duhet të sigurohemi që të ndërmarrim me kohë hapat e nevojshëm për të siguruar një proces të shpejtë dhe kualitativ të negociatave me Bashkimin Evropian” tha Thaçi ndër të tjera./PrizrenPress.com/
Kryeministri i Republikës së Kosovës, Hashim Thaçi ngushëlloi presidentin amerikan Barack Obama dhe popullin amerikan, pas ngjarjes tragjike, ku u vranë dhe u plagosën disa qytetarëve amerikanë.
“Me dhembje mësuam lajmin për ngjarjen tragjike në Uashington, me ç’rast kanë humbur jetën dhe janë plagosur disa qytetarë amerikanë.
Vrasja në Navy Yard ka shkaktuar pikëllim tek miqtë e Shteteve të Bashkuara të Amerikës, dhe ngjithashtu në Kosovë po përjetohet rëndë.
Populli i Kosovës dhe institucionet e tij solidarizohen me administratën e SHBA-ve me popullin amerikan dhe veçanërisht me familjet e viktimave.
Shprehim besimin dhe shpresën se SHBA do të gjenë forcë për ta përballuar këtë tragjedi, duke gjetur fajtorët dhe duke ndëshkuar në mënyrë meritore shkaktarët e krimit.
Në emër të Qeverisë së Republikës së Kosovës dhe qytetarëve të Kosovës, ju shpreh ngushëllimet më të thella”, thuhet në telegramin e ngushëllimit./PrizrenPress.com/
Ministria e Arsimit, në bashkëpunim me Shoqërinë Gjermane për Bashkëpunim Ndërkombëtar (GIZ), po organizojnë Konferencën Ndërkombëtare për Ekonominë e Arsimit në Kosovë – “Ecim tutje – Arsimimi për Zhvillim Ekonomik”.
Rritja e cilësisë së arsimit dhe përshtatja e kurrikulave me nevojat e tregut të punës, janë çështjet kryesore, të cilat po diskutohen në konferencën dy ditore.
Në Konferencën Ndërkombëtare për Ekonominë e Arsimit në Kosovë, e para në rajon, po diskutohet për konceptet më relevante akademike të ekonomisë së arsimit si dhe shqyrtohen sfidat në sektorin e arsimit dhe tregun e punës në Kosovë.
Në hapje të konferencës, Ministri i Arsimit, Ramë Buja, tha se kjo ngjarje po ndodh pas arritjeve të rezultateve të shumta në zhvillimin e reformave të legjislacionit dhe infrastrukturës shkollore, raporton RTK. Gjithashtu janë identifikuar nevoja të mëdha për zhvillimin e mëtejshëm të arsimit, tha Buja.
“Kosova është një vend i vogël dhe me buxhet jo të mjaftueshëm për investim në arsim për aq sa do të duhej. Mirëpo, me burimet që kemi, si vend me popullsinë më të re në Evropë, ne mund të themi se kemi një pasuri e cila duhet të përgatitet profesionalisht për kërkesat në rritje nga sektori i biznesit, të cilën nëse nuk mund ta menaxhojmë dhe ta përgatisim mirë për të ardhmen, mund të na shndërrohet në sfidë serioze”.
Ambasadori gjerman në Prishtinë, Peter Blomeyer, tha se qasja universale në arsimin fillor është një nga synimet e zhvillimeve të mijëvjeçarit. Arsimimi cilësor është çështje kyçe për zhvillimin ekonomik dhe për rritjen ekonomike, tha Blomajer, duke theksuar se arsimimi i brezave të ardhshëm nënkupton investim.
“Sot Kosova e gjen veten në një situatë të veçantë, papunësia rritet veçanërisht në mesin e të rinjve dhe ne po diskutojmë sa i përket emigrimit për shkaqe ekonomike, që po e dobëson edhe më tej këtë shtet të ri. Tani është koha për të reflektuar se si t’u ofrohen atyre mundësitë dhe stimulimi që të qëndrojnë këtu dhe të kenë perspektivë në shtetin e tyre”.
Zëvendësministri i Financave, Ramadan Avdiu, tha se investimet në arsim garantojnë cilësi të fuqisë së ardhshme punëtore si dhe rritje të shpejtë e të qëndrueshme ekonomike.
Në konferencë, punimet e së cilës do të zgjasin edhe nesër, po marrin pjesë përfaqësues të Qeverisë së Kosovës dhe vendeve të rajonit, përfaqësues të institucioneve të ndryshme të vendit, udhëheqës të institucioneve të arsimit publik e privat, përfaqësues të shoqërisë civile, ekspertë të arsimit nga vende të ndryshme të botës.
Ministri i Punëve të Jashtme i Republikës së Kosovës, Enver Hoxhaj i ka dërguar një telegram ngushëllimi sekretarit amerikan të Shtetit të Shteteve të Bashkuara të Amerikës, John Kerry, pas ngjarjeve tragjike që ndodhën dje në Washington Navy Yard.
Në emër të qytetarëve dhe institucioneve të Republikës së Kosovës, ministri Hoxhaj ka shprehur shqetësimin dhe pikëllimin e madh për ngjarjen, e cila, sipas informacioneve të deritashme, ka shkaktuar disa viktima dhe të plagosur.
Hoxhaj në telegram ka shprehur ngushëllimet dhe solidaritetin e plotë të qytetarëve të Republikës së Kosovës me familjet e viktimave dhe me popullin e SHBA-ve.
“Populli dhe Qeveria e Republikës së Kosovës bashkëndjen në çdo moment dhembjen dhe pikëllimin me familjet të cilat kanë humbur të dashurit e tyre, duke iu bashkuar lutjeve me popullin amerikan që të plagosurit të shërohen sa më shpejt”, thuhet në letër.
Ministri Hoxhaj ka shprehur konsideratat më të larta për autoritetet amerikane për punën e jashtëzakonshme që po bëjnë për tejkalimin e situatës së krijuar.
Kandidati për kryetar të Komunës së Prizrenit, Fadil Kryeziu, ka deklaruar se kjo komunë ka nevojë të qeveriset me mentalitetet të ri.
“Në Prizren ka ardhur koha të qeverisin gjeneratat e reja, të cilat kanë mentalitet të ri dhe që nuk janë të ndikuar nga mentaliteti i së kaluarës. Tash në Kosovë duhet të ndërtojmë institucione krejtësisht demokratike, të përgjegjshme dhe të dinjitetshme, të cilat do të jenë në shërbim të qytetarëve”, ka deklaruar Kryeziu për “Epokën e re”. Në këtë kontekst, ai ka thënë se kandidati i PDK-së, Ramadan Muja dhe ai i LDK-së, Eqrem Kryeziu, janë të moshuar, prandaj duhet ta gëzojnë të drejtën e pensionit që u takon. “Në Kosovë ka një ligj për pensionim, sipas të cilit, njerëzit mbi moshën 65 vjeç shkojnë në pension. Ata të dytë e kanë kaluar këtë moshë, prandaj duhet ta gëzojnë pensionin. Qeverisja lokale jo vetëm në Prizren, por edhe në nivel vendi mendoj se e ka kohën e vet që të ketë diçka të re. Duhet të ketë zhvillime të reja për arsye se Kosova po ecën shtigjeve të reja. Edhe Prizrenit i duhet mentalitet i ri qeverisës”, ka thënë Kryeziu.
Ai ka thënë se nuk ia ka frikën konkurrencës për të parin e komunës pavarësisht se përballë ka bashkëpartiakun e dikurshëm Eqrem Kryeziu dhe kryetarin aktual të Prizrenit, Ramadan Mujën, i cili ka fituar besimin e qytetarëve për të qeverisur dy mandate rresht. “Demokracia është shans për të gjithë, e tillë do të jetë edhe për garën për kryetar të Komunës së Prizrenit. Nuk ka këtu kurrfarë arsye për t’u frikësuar jo vetëm nga Kryeziu, por nga askush tjetër. Si shtet i ri që jemi po mundohemi të ndërtojmë një demokraci, e cila gjithnjë e më shumë po shkon duke u rritur. Pavarësisht një të kaluare jo të vogël që e kemi pasur bashkë me Kryeziun, tashmë pikëpamjet tona ndahen dhe do të kemi një konkurrencë korrekte”, është shprehur Kryeziu, duke shtuar se Prizreni ka nevojë për qeverisje të re. “Prizreni është një qytet i cili meriton shumë më shumë sesa që ka fituar me qeverisjet e kaluara. Ka nevojë për më shumë zhvillim të kulturës, të sportit, të ekonomisë dhe të infrastrukturës. Deri më tani pothuajse të gjitha subjektet politike në një farë forme kanë qeverisur bashkë, kurse tash qytetarët kanë nevojë të shohin edhe konkurrentë të tjerë. PDK-ja ka qenë në pushtet me koalicionin e saj qeverisës, por edhe LDK-ja duke mos e luajtur rolin e saj opozitar i ka ndihmuar kësaj qeverisje. Prandaj ka ardhur koha për një qeverisje ndryshe, për një qeverisje të re”, ka deklaruar Kryeziu.
Ai ka thënë se më 3 nëntor qytetarët do të votojnë për alternativën më të mirë për Prizrenin. Sipas tij, Nisma Qytetare për Prizrenin është oferta më e mirë për qytetarët e kësaj komune. Po ashtu, ai ka thënë se kjo nismë do të sjellë freski në Prizren. “Qytetarët do të zgjedhin më të mirën më 3 nëntor për të ardhmen e tyre dhe të qytetit të Prizrenit. I kemi hyrë garës duke shpresuar dhe duke besuar se do ta marrim mbështetjen e qytetarëve. Do të sjellim diçka të re, një freski për qytetarët e Prizrenit. Besojmë se qytetarët janë të interesuar për diçka të re në qytetin tonë”, ka theksuar ai, duke shtuar se gara do të jetë sfiduese dhe arritja e fitores do të jetë e vështirë në rundin e parë. “Do të fitojmë për arsye se ne do të ofrojmë atë që është civilizuese, atë që është qytetare për qytetin e Prizrenit. Kjo garë është sfiduese sepse ne kemi ardhur më ndryshe në këto zgjedhje. Synimi ynë është fitorja, por demokracia në Kosovë lejon edhe balotazhin. Prizreni ka një përvojë për balotazh. I kemi hyrë kësaj gare për të fituar dhe jemi duke punuar për çdo ditë për të arritur këtë fitore në zgjedhjet lokale të 3 nëntorit”, ka thënë Kryeziu.
Ai ka deklaruar se edhe fushata zgjedhore do të jetë më interesante kësaj here për dallim nga zgjedhjet e kaluara. “Është interesante se partitë e mëdha që konkurrojnë në këto zgjedhje shkojnë me kandidatë të cilët tashmë do të duhej të ishin të pensionuar, mirëpo duke pasur parasysh se nuk kanë çka të bëjnë, ata po futen në këtë garë. Prandaj, sfida është interesante sepse, përveç këtyre dy kandidaturave të pensionuara, ka edhe kandidatura të reja të cilët kanë çka t’i ofrojnë qytetit të Prizrenit. Në këtë mes edhe unë, njëri nga ta, mendoj se do t’i jap një kuptim shumë më pozitiv kësaj gare sesa që mund t’i japin kandidati i PDK-së dhe i LDK-së”, ka deklaruar Kryeziu, duke shtuar se Nisma Qytetare për Prizrenin do të zhvillojë fushatë në bashkëbisedim me qytetarët, duke shpalosur programin qeverisës në detaje. “Fushata jonë nuk mbështet në atë se cilin e kemi kundërshtar më të fortë apo më të vështirë. Ne do të punojmë me qytetarët. Qysh tash kemi filluar të kontaktojmë me njerëzit veç e veç, por edhe në grupe në mënyrë që të shpalosim atë që ne ua ofrojmë atyre, pa pasur shumë përqendrim në atë se kush është përballë nesh. Nuk dëshirojmë të humbim shumë kohë duke u marrë me kandidatët e tjerë”, ka thënë Kryeziu. Ai ka treguar se nuk është larguar nga “Lista Dr. Ibrahim Rugova”, por për të marrë pjesë në zgjedhjet lokale të 3 nëntorit u është dashur të regjistrohen si Nisma Qytetare për Prizrenin.