Vizita e sotme e kryeministrit të ri të Shqipërisë, Edi Rama, padyshim Fillon një traditë të bashkunimit vëllazëror dhe fqinjësor midis Republikës së Shqipërisë dhe Republikës së Kosovës, si dy vende të pavarura.

Ekziston një traditë e ngjashme edhe tek dy vende fqinje këtej Atlantikut, në mes të SHBA dhe Kanadasë. Vizita e parë që bëhet jashtë Amerikës nga një president amerikan është në Kanada. Këtë traditë e kanë respektuar të gjithë presidentët në tri dekadat e fundit, përveç George W. Bush (i riu) i cili ‘prishi’ rregullin dhe vizitoi fqinjin jugor, Meksikën, transmeton RTK.

Presidenti Barack Obama një muaj pas marrjes së mandatit të parë vizitoi Kanadanë, duke nënvizuar me këtë gjest rëndësinë e marrëdhënieve midis dy vendeve.

Gjatë dekadave të historisë dhe fqinjësisë presidentë të ndryshëm do t’i referohen Kanadasë dhe kanadezëve jo si qytetarët të një vendi të huaj, por thjesht si kanadezë. Ngjashëm edhe kanadezët do t’i quajnë amerikanët, vetëm si amerikanë, e jo të huaj. Për shkak të kësaj afërsie në të gjitha fushat, kanadezët dhe amerikanët që ashtu kanë një prejardhje të përbashkët, pavarësisht kufijve që i ndajnë nuk do ta konsiderojnë njëri-tjetrin si një vend i huaj.

Si dy vende krenare dhe të pavarura, Kosova dhe Shqipëria kanë gjëra që i dallojnë, por kanë shumë më tepër gjëra që kanë të përbashkëta: lashtësinë, historinë, gjuhën, zakonet, traditën kulturën, të tashmen dhe të ardhmen. Vizita e parë në Kosovë e Edi Ramës si kryeministër e kultuvon dhe forcon këtë nismë që duhet të bëhet traditë.

Ish ambasadori i OSBE-së në Kosovë, William Walker, ka mirëpritur mbajtjen e zgjedhjeve lokale edhe në veri të Kosovës, duke thënë se serbët e veriut duhet të marrin pjesë në zgjedhje dhe të mos vazhdojnë të ndikohen nga Beogradi.

“Unë jam në favor të pjesëmarrjes së serbëve në zgjedhje, siç jam edhe në favor të jetesë së tyre në Kosovë. Problemi me serbët e veriut është se ata në një farë mënyre nuk e kuptojnë se janë duke i jetuar në Kosovë këto ditë dhe janë duke u ndikuar shumë nga Beogradi. Mendoj se që nga lufta Beogradi ka luajtur një rol duke i shfrytëzuar serbët e veriut për qëllimet e tyre dhe jo për mirëqenien e serbëve të veriut”, ka thënë Walker.

Ndërkohë Ambasadori Walker nuk është shprehur i kënaqur me joshjen e investitorëve dhe punësimin në vend.

“Kam pasur dëshirë të shoh potencialin, të rritet potenciali i Kosovës, të tërheqë investimet e huaja, të krijojë punësim, të përmirësoj çështjen e punësimit që nuk është përmirësuar, në realitet është vështirësuar. Kam qenë i përfshirë në 10 vjetët e fundit në sektorin e energjisë dhe ekziston një nevojë dëshpëruese për energji të re ndërsa qeveria flet për planet e energjisë. Keni humbur më shumë se një dekadë dhe Kosova shihet si diçka për të cilën njerëzit flasin. Nuk e di pse keni humbur kaq shumë kohë”, ka thënë Walker në një intervistë për RTK.

Sa i përket situatës politike Walker ka folur edhe për incidentin ku u lëndua ambasadorja amerikane në hyrje të Kuvendit.

“Për dallim prej asaj çfarë kam thënë për procesin e negociatave i cili nuk mbulohet mirë në Washington ky tregim ka pasur jehonë kaq të madhe. Ambasadorja amerikane është kapur për dore. Ky ka qenë një dëmtim shumë i madh për Vetëvendosjen. Kam qenë i trishtuar, kjo nuk është demokraci, nuk ndërhyni që të mos lejoni njerëzit që të hynë në parlament, qoftë nëse i përkrahni apo jeni kundër, nuk mund ti ndalni parlamentarët që të bëjnë punën e tyre. Ata janë zëri i qytetarëve, në të njëjtën kohë nuk mund ti ndaloni ambasadorët e huaj të cilët dëshirojnë të vijnë dhe të shohin se çfarë po ndodh dhe mendoj se është shumë fatkeqësi e madhe. Siç e dini ju edhe unë Vetëvendosja nuk ka pasur përkrahje shumë të madhe në mesin e ndërkombëtarëve, se a ka rënë kjo përkrahje apo jo nuk e di por me siguri kjo gjë u ka ndihmuar. Çfarë ka ndodhur atë ditë është shumë trishtueshme”, ka thënë ai.

Ish shefi i Misionit të OSBE-së në Kosovë ka vlerësuar ngecje në zhvillimin ekonomik duke kërkuar më shumë punë nga vendorët.

Kryetari i Kuvendit të Kosvoës, Jakup Krasniqi, ka kritikuar ashpër mënyrën e shitjes së 75 për qind të aksioneve të PTK-së, duke e quajtur të pistë, të paligjshëm dhe jo demokratik. Privatizimin e aksioneve të PTK-së e kanë kundërshtuar edhe partitë opozitare, madje LDK e VV nuk kanë qëndruar në seancë për ta bërë kuorumin dhe për të qenë pjesë e votimit. Seanca u dashtë të ndërpritet për shkak të mungesës së kuorumit.
Kreu i Kuvendit ka thënë se, kohë me parë, blerësit, të gjitha bankave ku ka menduar të marr kredi, ambasadave dhe BE-së, u ka dërguar një letër me 18 pika, të cilat, sipas tij, tregojnë për procesin e parregullt dhe të paligjshëm të privatizimit të PTK-së. Ai ka shtuar se ky vendim i komisionit për rikthim në Kuvend është sa për të pastruar diçka të pistë. Krasniqi ka thënë se nëse Qeveria dëshiron ta legjitimojë shitjen e PTK-së duhet ta kthejë procesin në pikën zero dhe duhet të merret vendimi në Kuvend për t’u shitur, pasi vendimi për t’u shitur nuk është dhënë në Kuvendin e Kosovës.

“Hajde ta qesim një tender për ta shitur Qeverinë dhe të vijnë njerëz që dinë me qeverisë me këtë vend. Më e nevojshme është me qitë në shitje qeverinë e këtij vendi, sesa pasurinë e këtij vendi. Së paku pasuria ruhet dhe një ditë e shfrytëzon populli. Ato të holla që pretendohet të merren, ku do të shkojnë? A do të hyjnë më shumë në xhepat e njerëzve, apo do t’i shkojnë publikut? Mjetet dhe paratë publike vazhdojnë të keqpërdoren çdo ditë. Ne si përfaqësues të qytetarëve duhet ta legjitimojmë. Nëse Qeveria do legjitimitetin e Kuvendit, duhet ta mbyllë këtë proces, se edhe ashtu është vonuar”, ka thënë Krasniqi, transmeton KP.

Mirëpo, Ministri i Zhvillimit Ekonomik Fadil Ismaili ka thënë se çmimi i dhënë për privatizimin e aksioneve të PTK-së, është më i larti në rajon dhe kjo ka “treguar atraktivitetin e PTK-së si kompani, por edhe si mundësi investuese të shteteve në Kosovë”.

Ndërsa, kryetari i Grupit Parlamentar të LDK-së, Ismet Beqiri, ka thënë se ata, si subjekt politik, asnjëherë nuk kanë qenë kundër privatizimit, por gjithmonë janë kundër privatizimit në mënyrën se si po bëhet kjo me PTK-në pa vendimin e Kuvendit të Kosovës.

“Besoj se kjo mjafton për të treguar se nuk keni bazë ligjore për të proceduar me tutje. Këtu ka bazë për hetuesi, për t’i ndjekur, ata që kanë gisht këtu. Këtu ka bazë Prokuroria dhe publikisht po them: lirisht le të hetojnë, ta shohim se kush ka gisht në këtë plaçkitje që po i bëhet një aseti të vendit tonë”, ka thënë Beqiri.

Edhe Shefi i Grupit Parlamentar të Vetëvendosjes, Visar Ymeri, duke kundërshtuar ashpër këtë raport, ka thënë se ky proces është antiligjor, shumë i dëmshëm dhe jashtëzakonisht i korruptuar. Ndërsa, Ardian Gjini nga AAK-ja ka thënë se informatat që i kanë tregojnë se ky proces ka dështuar.

Edhe deputeti, Muhamet Mustafa, ka thënë se shitja e aksioneve të PTK-së nuk është proces transparent, kur së paku tre investitorë janë të tërhequr. Mustafa i ka bërë thirrje Qeverisë që mos të sillet në këtë mënyrë jashtëligjore.

Edhe deputeti i PDK-së, Hydajet Hyseni, ka kritikuar ashpër mënyrën e shitjes së aksioneve të PTK-së, e cila, sipas tij, është e paligjshme dhe nuk duhet të bëhet. Sipas tij, dilema e tij kryesore është se nuk po kupton kush po shet e kush po blenë këtu.

“Nuk ka perspektivë për PTK-në? Po kush e ka bërë atë analizë që nuk ka perspektivë. Asgjë te ne s’ka perspektivë. E pse për të tjerët po ka perspektivë”, ka thënë Hyseni.

Kryetari i degës së Partisë Demokratike të Kosovës në Malishevë, Isni Kilaj, njëherit kandidati për kryetar të Komunës së Malishevës, nga dje, zyrtarisht ka marrë edhe mbështetjen e degës së AKR-së. Kilaj dhe kryetari i degës së AKR-së në Malishevë, Alban Kastrati, kanë nënshkruar një marrëveshje për mbështetjen e kandidatit të PDK-së për kryetar të Komunës së Malishevës, në zgjedhjet e 3 nëntorit 2013.

AKR-ja në Malishevë, do të garoj e vetme në garën për Asamble Komunale.

“Po ashtu, ju njoftojmë, se Kryetari i Degës së PDK-së në Malishevë, z.Kilaj, ka vazhduar me aktivitetet paraelektorale, nëpër nëndegë, ku vazhdon të ketë mbështetjen e plotë të kandidaturës për Kryetar të Komunës. Takime janë zhvilluar në nëndegët e Temeqinës, Janqishtit dhe Maralisë, ndërsa takimet tjera do të vazhdojnë në ditët në vijim, në kuadër të përgatitjen për fushatën elektorale, për zgjedhjet e 3 nëntorit të këtij viti”, thuhet në kumtesë të PDK-së.

Sipas PDK-së, përderisa mbështetja është e madhe dhe fitorja e kandidatit të PDK-së, Isni Kilaj, është e sigurt në zgjedhjet e 3 nëntorit, qysh në rrethin e parë. Po ashtu, PDK do t’i fitojë bindshëm edhe Asamblenë Komunale.

“Gjatë këtyre ditëve, ka vazhduar edhe rritja e anëtarësisë së PDK-së në Malishevë, ku qindra anëtar të rinj, kanë aderuar në PDK, pothuajse nga të gjitha subjektet apo lëvizjet politike që veprojnë në Malishevë”, thuhet në kumtesë./PrizrenPress.com/