Avokati i Fatmir Limajt, Tomë Gashii  i ka thënë “Rtklive”  se tanimë kjo praktikë e Eulex-it, që mbrojtja të informohet për aktakuzën përmes mediave dhe në orët e pasditës është bërë praktikë e përhershme.

” Në këtë orë të pasdites gjykata nuk punon dhe ne si mbrojtje nuk  kemi mundësi të marrim as aktakuzën dhe asnjë lloj informacioni zyrtar”, tha avokati i Limajt, Tomë Gashi.

Sipas tij, kjo praktikë e qëllimshme e Eulex-it, ka prapavijë të qartë për të dëmtuar palën mbrojtëse.

” Imagjinoni edhe ne jemi informuar përmes mediave sikurse të gjithë qytetarët e tjerë. Kjo përbën shkelje të drejtave bazë të akuzuarit”.

“Ne nuk kemi asnjë mundësi të komentojmë në mënyrë zyrtare aktakakuzën, pasi thjesht nuk e kemi. Na duhet të presim deri të nesërmen për të shkuar në gjykatë dhe për t”u njoftuar”, tha  Gashi.

Sipas tij, Limaj është marrë në pyetje vitin e kaluar për këtë rast.

”Ne si palë mbrojtëse, pretendojmë se është rasti i njejtë me çështjen e gjykuar që quhet çështja ” ministria e transporteve”. Akuza pretendon se është rasti i ri”, tha Gashi/rtklive/

Fatmir Limajt i është ngritur edhe një aktakuzë nga Prokuroria Speciale e Kosovës. Ai dyshohet për vepra ndryshme penale përfshirë –krim të organizuar, përvetësim, lidhje të kontratave të dëmshme, keqpërdorim të detyrës zyrtare ose të autoritetit, marrje e mitës dhe vepra të tjera të lidhura me korrupsionin. Prokurori pretendon se buxheti i Ministrisë së është dëmtuar për së paku 890 mije euro.

Sot, një prokuror ndërkombëtar nga Prokuroria Speciale e Kosovës (PSRK) ka ngritur aktakuzë kundër ish-Ministrit të Transportit dhe të Postë-Telekomunikacionit (Fatmir Limës) dhe katër personave të tjerë të bashkë-akuzuar për vepra të ndryshme penale përfshirë –krim të organizuar, përvetësim, lidhje të kontratave të dëmshme, keqpërdorim të detyrës zyrtare ose të autoritetit, marrje e mitës dhe vepra të tjera të lidhura me korrupsionin.

Prokurori pretendon se tre të pandehur kanë manipuluar me procedurat e tenderit, janë marrë me dhënie dhe marrje të mitës dhe me pengim të provuarit në lidhje me administrimin e dy tenderëve në kompetencë të Ministrisë së Transportit. Këta të pandehur pretendohet se i kanë kryer këto vepra për përfitim material personal. Dy të pandehur pretendohet se janë angazhuar në keqpërdorimin e autorizimeve ekonomike, si edhe në veprën penale të dhënies së mitës. Sipas prokurorit, këto vepra ndodhën më 2008 kur njëri prej të pandehurve punonte si Ministër i Transportit, njofton kumtesa nga EULEX-i .

Prokurori pretendon se buxheti i Ministrisë së Transportit është dëmtuar për së paku 890.000 euro.

Ky hetim i përbashkët është kryer nga Departamenti Kundër Korrupsionit i Policisë së Kosovës dhe nga Njësia e EULEX-it për Hetimin e Krimit të Organizuar (NJHKO) dhe është udhëhequr nga një prokuror ndërkombëtar nga PSRK.

Lideri i Lëvizjes Vetevendosje, Albin Kurti nuk e ka përjashtuar mundësinë që të bashkëpunojë me partinë e Fatmir Limajt dhe të Jakup Krasniqit.
“E përshëndesim iniciativën e disa deputetëve të PDK-së, të distancohen nga politika e saj dhe të formojnë subjekt tjetër”, është shprehur Kurti, në një intervistë për Epoka e re.

Ai ka thënë se është befasuar se si LDK-ja dhe AAK-ja po veprojnë sikurse PDK-ja, duke nominuar kryetarët e tyre për kryeministra të mundshëm ndërkohë që, sipas tij, këto parti nuk kanë prezantuar fare programe qeveritare.

“Koncepti i Vetëvendosje!-s duhet të fitojë, vendi duhet të qeveriset në bazë të programit dhe me alternativën qeverisëse të saj, ndërsa në krye të qeverisë do të jetë ai që ne mendojmë se është më i duhuri për ta zbatuar këtë program. Nuk mund të fitoj unë dhe asnjëri prej nesh pa fituar njëherë Lëvizja jonë”, ka thënë Kurti.

Kurti ka thënë me bindje se partia të cilës ai i prinë ka qenë e vetmja opozitë në Kuvend. Ai ka ripërsëritur se LDK-ja dhe AAK-ja i janë bërë patericë Qeverisë në proceset e dëmshme.

“Dy partitë e tjera opozitare, LDK-ja dhe AAK-ja, nuk e kanë luajtur rolin e opozitës, sidomos në çastet vendimtare i janë bërë patericë Qeverisë në proceset e dëmshme në të cilat ajo e ka katandisur vendin. Thjesht, frika nga pushteti dhe lakmia për pushtet kanë bërë që LDK-ja e AAK-ja t’i nënshtrohen Thaçit”, ka thënë Kurti.

Krijimi i një Tribunali Ndërkombëtar do të nënkuptonte se në Kosovë ka dështuar sistemi i drejtësisë, thonë ekspertët e çështjeve penale-juridike. Ky Tribunal, sipas tyre, do të nënkuptonte edhe dështimin e misionit të EULEX-it, pasi që gjykatës e prokurorë ndërkombëtarë kanë qenë dhe janë pjesë e këtij sistemi.
Profesori i të Drejtës Penale, Ismet Salihu, thotë se Tribunali Ndërkombëtar, sipas asaj që është paralajmëruar deri më tani, do të merrte përsipër trajtimin jo vetëm të rasteve të krimeve të luftës.

“Kjo gjykatë do të jetë kompetente për t’i gjykuar krimet gjatë luftës 1998 – ’99, por pa u kufizuar vetëm në krimet e luftës”, ka thënë Salihu.

Po në bazë të draft-statutit të kësaj gjykate, profesori Salihu numëron edhe lëndët tjera që ky Tribunal do t’i merrte eventualisht përsipër. Aty përfshihen lloje të ndryshme të krimeve, të cilat sipas pretendimeve ndërkombëtare, prokuroritë dhe gjykatat vendase nuk kanë qenë të afta t’i zgjidhin.

“Kjo gjykatë do të kishte juridiksion edhe për krimet që janë kryer pas përfundimi tët luftës, por edhe pas vitit 2000-2001. Do të ketë juridiksion edhe për krimet e vrasjeve me motive politike që janë kryer gjatë viteve 2000-2001, pastaj për vrasjet apo kërcënimet që pretendohet se janë kryer ndaj dëshmitarëve, por edhe për veprat korruptive. Kështu që nuk do të jetë vetëm për krimet e luftës”, ka thënë Salihu.

Selia e kësaj gjykate do të ishte jashtë Kosovës me prokurorë dhe gjyqtarë ndërkombëtarë.

Por, për një Tribunal të tillë, ministri i Drejtësisë në Qeverinë e Kosovës, Hajredin Kuçi, thotë se nuk ka nevojë pasi që në Kosovë ka gjykata vendase.

“Kosova ka kapacitete të mjaftueshme për shqyrtimin dhe trajtimin e cilitdo rast në vendin tonë. Kur e them këtë kam parasysh gjyqtarët vendor dhe ata të EUELX-it. Po ashtu, në Kosovë ka mision ndërkombëtar, gjyqtarë ndërkombëtarë, ka prokurorë ndërkombëtarë dhe besoj që nuk ka asnjë arsye që të mendohet ndryshe”, ka thënë Kuçi.

Ndërkohë, Salihu tërheq vërejtjen se me krijimin eventual të një Tribunali Ndërkombëtar, Kosova do të dëshmonte dështimin e organeve të ndjekjes penale. Po ashtu, një Tribunal i tillë do të nënkuptonte se në Kosovë politika ndërhynë në gjyqësorin, kështu që rastet e cilësuara si të “nxehta” do të mund të zgjidheshin vetëm nga një gjykatë ndërkombëtare.

“Po del që këtu kanë dështuar organet e ndjekjes, prokuroritë, gjykatat. Por, në një mënyrë nuk janë në nivelin e duhur as pjesëtarët e EULEX-it, sepse sistemin gjyqësor të Kosovës e përbëjnë edhe pjesëtarët e EULEX-it, që faktikisht janë staf ndërkombëtar”, ka vlerësuar profesori Ismet Salihu.

Ideja e një Tribunali Ndërkombëtar për Kosovën fillimisht ishte prezantuar se ka rrjedhë në bazë të hetimeve të iniciuara nga Këshilli i Evropës, që si bazë kishin dyshimeve të zviceranit Dick Marti, mbi trafikimin e organeve të serbëve nga pjesëtarët e ish-Ushtrisë Çlirimtare të Kosovës. Por, tani ky Tribunal po merr edhe përmasa tjera duke u zgjeruar edhe për rastet të cilat, sipas penalistëve në Prishtinë, do të duhej të ishin kompetencë e organeve të Kosovës.

Në bazë të debateve, për formimin e kësaj gjykate do të nevojitet edhe miratimi i institucioneve të Kosovës. /REL/

Imami i xhamisë në fshatin Billush, M.Shala është arrestuar sot nga policia në Prizren.

Ai dyshohet se bashkë me disa bashkëfshatar ka bërë zhvarrimin e disa trupave të vdekur,që kanë qenë të varrosur në oborrin e xhamisë.

“Sot, në orët e pasdites, hetues rajonalë të Drejtorisë Rajonale të Policisë në Prizren, kanë arrestuar M. Shalën nga se i njëjti në bashkëveprim edhe me disa fshatarë të fshatit Billushë kanë bërë zhvarrimin e disa varreve nga oborri i xhamisë së fshatit në një lokacion tjetër pa i respektuar procedurat ligjore”,njoftoi zëdhënësi i PK-së në Prizren, Hazir Berisha.

“I dyshuari ka konsumuar elemente të veprës penale ‘dëmtim i varrit ose i kufomës” ,që është e kundërligjshme me nenin 421 të Kodit Penal të Kosovës”.

“Me urdhër të prokurorit i dyshuari ndalët nën masën e arrestit për 48 orë”/PrizrenPress.com/

Presidentja e Republikës së Kosovës, Atifete Jahjaga ka pranuar me shqetësim njoftimet e sotme në mediat e Kosovës se njëri nga të burgosurit e falur dyshohet të jetë recidivist. Jahjaga, bazuar në informacionet e publikuara në media, ka kërkuar mbledhjen urgjente të komisionit profesional për falje, për të vërtetuar dyshimet e ngritura në media.
Zyra e presidentes së Republikës së Kosovës njofton opinionin se Sedat Berisha është falur me dekret të presidentes së Republikës së Kosovës më 17 shkurt 2014, pas konstatimit të komisionit profesional për falje, bazuar në dokumentet dhe informatat e prezantuara nga Shërbimi Korrektues i Kosovës se i burgosuri i plotëson kriteret e parapara me ligj dhe rregulloren e Presidentes për falje,shkruan telegrafi.

Presidentja Jahjaga shqetësimin e saj ia ka shprehur edhe ministrit të drejtësisë, Hajredin Kuçi, me të cilin ka biseduar për bashkëpunimin ndërinstitucional, me qëllim të zbardhjes sa më të shpejtë të këtij rasti.

Jahjaga falënderon mediat e Kosovës për vigjilencë, duke vlerësuar rolin e tyre të Rëndësishëm në shoqëri si kujdestar të mirëfilltë të institucioneve të vendit