Dega e PDK-së në Zhur dhe ajo në Has, nuk kanë propozuar asnjë emër për drejtor të Ekzekutivit të Prizrenit.

Përfaqësuesit e këtyre dy degëve kanë kërkuar kohë që t’i sjellin emrat e propozuar për Qeverinë “Muja III”.

Burimet e “PrizrenPress”-it bëjnë të ditur se anëtari i Kryesisë nga Zhuri dhe ai nga Hasi kanë kërkuar që të konsultohen me degët e tyre për propozimet konkrete.

“Lista e propozimeve që është publikuar në media nuk është përfundimtare. Ajo do të plotësohet edhe me propozime të tjera nga Zhuri dhe Hasi, por edhe të ndonjë nëndege tjetër”.

Kryesia e PDK-së në Prizren,mbrëm është mbledhur për t’i diskutuar emrat për Qeverinë “Muja III”. Pas kompletimit të listës, emrat e propozuar do të dërgohen për diskutim edhe në Prishtinë. /PrizrenPress.com/

Si pasojë e mos definimit të vijës kufitare Kosovë-Serbi në rajonin e Llapit dhe Gollakut qindra hektarë tokë kanë mbetur pa u punuar, e banorët thonë se ushtria dhe policia serbe, po futet brenda territorit të Kosovës dhe çdo banor që e takon në afërsi te kufirit e arreston.

Ndërkaq, Policia e Kosovës thotë se nuk është në dijeni për futjen e policisë serbe në pjesën e Kosovës

Kryetari i Mamushës, Arif Butuc ka propozuar ka propozuar që Ganimete Sadiku të emërohet nënkryetare për komunitete në këtë komunë.

Monitoruesja e OJQ-së “Ec Ma Ndryshe”, Elmedina Baxhaku tha se sipas nenit 61, paragrafi 3, të Ligjit për Vetëqeverisje Lokale emërimi dhe shkarkimi i Nënkryetarit për Komuniteteve propozohet nga Kryetari i Komunës dhe duhet të miratohet nga shumica e anëtarëve të Kuvendit të Komunës.

Ndërsa sipas paragrafit 4 të të njëjtit nen Nënkryetari për Komunitete do t’i ndihmojë kryetarit dhe do të ofrojë këshilla dhe udhëzime për kryetarin lidhur me çështjet që kanë të bëjnë me komunitetin pakicë.

Ganimete Sadiku, e lindur në vitin 1974, ka të kryer Fakultetin e Edukimit. Ajo ka qenë nënkryetare e Komunës së Mamushës nga viti 2005. Në periudhën 2005-2009 ka qenë kryetare e Komitetit për Komunitete të KK-së së Mamushës. /PrizrenPress.com/

Prishtina dhe Beogradi i kanë dy javë afat që të pranojnë propozimin për Gjykatën e Qarkut në Mitrovicë dhe të harmonizojnë qëndrimet rreth statutit që do të ketë Asociacioni/Bashkësia e Komunave Serbe të Kosovës, dhe të ritheksojnë pranueshmërinë e formës së si do të shpërbëhet “mbrojtja civile”.

Palët janë takuar në nivel politik të mërkurën gjatë gjithë ditës nën kryesimin e dy kryeministrave Hashim Thaçi dhe Ivica Daçiq. Kryeministrat janë pajtuar për gjykatën në veri,shkruan tribuna.

Burime të afërta me dialogun i kanë thënë gazetës se pakoja me tri marrëveshjet do të prezantohet si marrëveshje për zbatimin e drejtësisë dhe ka qenë formula e vetme e shpëtimit të dialogut, pasi që agjendat zgjedhore në Beograd, Prishtinë dhe Bruksel nuk kanë lënë kohë që të arrihet marrëveshja e dytë e normalizimit.

Nëse nuk arrihet të paktën pakoja e marrëveshjeve, atëherë sipas diplomatëve marrëveshja e Brukselit është në praktikë e parealizueshme dhe kësisoj do të rrezikohej e gjithë e arritura e dialogut.

Sekretari i përgjithshëm i PDK-së, Basri Musmurati, ka thënë se ende strukturat e partisë nuk kanë vendosur se kush do të jetë kandidat për kryeministër, por ai thotë se në historikun e partive politike në të gjithë botën, zakonisht lideri është kandidat edhe për kryeministër.
“Më lejoni ta shpreh mendimin tim rreth kësaj çështje. Hashim Thaçi nuk është i pazëvendësueshëm. Në PDK kemi kuadro që mund ta udhëheqin Qeverinë, por kështu siç janë raportet dhe si është zhvilluar deri më tani Kosova dhe PDK-ja, mendoj se më të mirë, më të fuqishëm dhe më të pranueshëm se Thaçi për kryeministër nuk ka. Edhe po të mos donte Thaçi të jetë kandidat për kryeministër, strukturat e PDK-së nuk do ta lëshojnë aq lehtë, do ta bindin atë të vazhdojë ta udhëheqë Qeverinë. Thaçi njëherë përnjëherë është i pakonkurrencë në krahasim me liderët e partive të tjera”, ka thënë Musmurati në një intervistë për “Epokën e re”.
Musmurati, ka thënë se kjo parti është e mobilizuar për zgjedhjet e ardhshme parlamentare. Ai ka deklaruar se, pavarësisht largimit të Fatmir Limajt dhe Jakup Krasniqit, PDK-ja është stabile. “Partia Demokratike e Kosovës është parti e fuqishme, e organizuar mirë dhe ka strukturë të fortë. Këto struktura dhe këta njerëz gjithmonë kanë qenë stabilë. Në një moment të caktuar, kur dikush nuk pajtohet, është e drejtë e tij të largohet nga PDK-ja dhe të themelojë parti të re. Është krejt normale se ata që largohen, fillimisht gjurmojnë për të gjetur njerëz në partitë në të cilat ishin deri dje”, ka thënë Musmurati.

Nënkryetari i PDK-së, Adem Grabovci, ka qenë njëri prej politikanëve kosovarë, të paraparë për pjesëmarrje në Lutje të Mëngjesit në SHBA, por që nuk shkoi atje. Ai thotë se i ra pishman për shkak të angazhimeve, por burimet thonë se amerikanët ia refuzuan vizën.
Shefi i Grupit Parlamentar të PDK-së në Kuvendin e Kosovës, Adem Grabovci, nuk ka marrë pjesë në Lutjet e Mëngjesit, që janë mbajtur para disa ditëve në Shtetet e Bashkuara të Amerikës.

Në momentin e fundit para se delegacioni kosovar të marrë rrugën për Amerikë, Grabovci ka vendosur t’i bie “pishman” pjesëmarrjes në ceremoninë që pothuajse është ëndërr e secilit politikan.

Gjatë një prononcimi për Gazetën Blic, Grabovci ka thënë se ka qenë e paraparë që të marrë pjesë në Lutjet e Mëngjesit, por se ka vendosur t’i thotë “jo” pjesëmarrjes, ngase “ka pasur shumë angazhime në Kosovë”.

Por, duket se shefi i deputetëve të Partisë Demokratike të Kosovës ka arsye tjetër pse nuk e ka shkelur “tokën e premtuar”.

Përflitet se Qeveria e SHBA-së, gjegjësisht, Ambasada Amerikane ia ka refuzuar vizën Grabovcit, duke ia pamundësuar pjesëmarrjen në Lutjet e Mëngjesit, ku përveç liderëve e diplomatëve të shumtë nga e gjithë bota, merr pjesë edhe presidenti amerikan, Barack Obama, sikurse edhe zyrtar të tjerë të lartë të Qeverisë Amerikane.

Grabovci, ndërkaq e ka mohuar se iu ka refuzuar viza.

“Sa për dijeninë tënde, unë i kam dy viza për Shtetet e Bashkuara të Amerikës. Njërën e kam trevjeçare, njërën e kam njëvjeçare. Unë pasi e kam rezervuar biletën, për shkak të rrethanave, angazhimeve tjera e kam anuluar”, ka thënë ai.

Përderisa insiston se nuk është e vërtetë që iu ka refuzuar viza, ai thotë se jovetëm që e ka pasur në plan të marrë pjesë në Lutje të Mëngjesit, por gjithashtu ka qenë kryesues i delegacionit dhe organizator i udhëtimit për në SHBA. /Gazeta Blic/