Në Krushë të Madhe ka nisur të hënën ndërtimi i kompleksit përkujtimor për dëshmorët dhe martirët e këtij fshati. Në ceremoninë e rastit kanë marrë pjesë përfaqësues të institucioneve lokale dhe qendrore.

Kryetari i Komunës së Rahovecit, Rahovecit Smajl Latifi tha se, gjaku i dëshmorëve dha martirëve është faktori kryesor që përcakton vlerën e lirisë. “Prandaj edhe liria jonë ka rrënjë të thella, sepse ne marrim fuqi nga gjaku i derdhur i dëshmorëve e martirëve. Ky fshat, jo vetëm i madh me emër, por edhe me vepra, i dha lirisë tonë kuptim”, tha Latifi.

Sipas tij, përpjekjet e atdhetarëve si Ukshin Hoti dhe dhjetëra dëshmorëve e qindra martirëve, vërtetojnë dëshirën dhe etjen e madhe që populli shqiptar ka për lirinë. “Ngritja e kompleksit përkujtimor për të rënët i shërben historisë, i shërben forcimit të identitetit tonë kombëtar. Prandaj, përpjekjet institucionale në nivel lokal e qendror duhet të jenë vazhdimisht të fokusuara në ruajtjen dhe kultivimin e traditave tona”, tha Latifi.

Ai tha se hartimi dhe zbatimi i këtij projekti është vepër e përbashkët e institucioneve lokale e atyre qendrore, që dëshmon se institucionalizimi i vlerave tona kombëtare është përgjegjësi e të gjithëve. “Duke ngritur vepra të tilla monumentale i japim kuptim sakrificës së njerëzve dhe vetë vlerës së lirisë. Brezat që vijnë do të përkulen para kësaj sakrifice dhe do të dinë ta çmojnë çdo arritje. Ky projekt do të arrinte të kurorëzohej me sukses nëse familjarët e të pagjeturve do të dinin për fatin apo fatkeqësinë e më të dashurve të tyre”, theksoi Latifi.

Zëvendësministri i Ministrisë së Mjedisit dhe Planifikimit Hapësinor Ferat Shala tha ndërkaq se ndërtimi i kompleksit përkujtimor për dëshmorët në Krushë të Madhe është obligim kombëtar e institucional. Ky fshat që i dha aq shumë Kosovës meriton të ketë një vend nderimi e kujtimi për gjakun e derdhur”, tha Shala.

Edhe deputeti i Kuvendit të Kosovës Idriz Vehapi foli për sakrificën madhore të qytetarëve të këtij fshati. Ai bëri thirrje që të nderohet kujtimi për të rënët me punë e përkushtim për ndërtimin e forcimin e shtetit të Kosovës.

Rregullimi i varrezave do të zgjatë 3 vite dhe për këtë janë ndarë 450 mijë euro nga MMPH. Projekti do të realizohet në tri faza dhe pritet të përfundojë në vitin 2015. /PrizrenPress.com/

Lidhja Demokratike e Kosovës në Malishevë organizoi sot një takim me qytetarët e fshatit Carrallukë, në të cilin morën drejtuesit e kësaj dege, kandidati për kryetar të Komunës së Malishevës, deputeti i Kuvendit të Kosovës, Salih Morina, sekretari i LDK-së, deputeti Ismet Beqiri, si dhe deputeti Hashim Deshishku.

Ismet Beqiri shprehu bindjen e plotë se në Malishevë fitorja e LDK-së do të jetë e sigurt. Ai u bëri thirrje të gjithë të pranishmëve që të bashkohen me ndryshimin që po sjell LDK-ja në Malishevë.

“Kandidati i LDK-së për kryetar të Komunës së Malishevës, Salih Morina, është kandidati më i mirë për ta qeverisur Malishevën, ndërsa fitorja e tij do të jetë e pakontestueshme”, deklaroi Beqiri.

Ndërkaq, kandidati për kryetar të Komunës së Malishevës, Salih Morina u zotua se do t’u ofrojë përkrahje të plotë qytetarëve për zgjidhjen e problemeve të shumta që i kanë. Ai theksoi se do të angazhohet maksimal për përmirësimin e jetës së qytetarëve të Komunës së Malishevës.

Në këtë takim morën pjesë një numër i madh i qytetarëve të fshatit Carrallukë, të cillët shprehën përkrahjen e parezervë për kandidatin e LDK-së për kryetar të Komunës së Malishevës, Salih Morina.

Komisioni Qendror Zgjedhor ka shtyrë mbledhjen për një kohë të pa caktuar . Edhe përkundër pritjes një orë të anëtarëve të KQZ-së, kryetarja Valdete Daka nuk ka ardhur për të filluar mbledhjen. Pas një ore pritje asistentja e saj ka njoftuar se mbledhja e KQZ-së shtyhet për afat të pa caktuar.

Duke e pare tendencën e saj që mbledhja e KQZ-së të mbahet fshehur nga opinioni, përfaqësuesi i VV-së, Adnan Rrustemi deklaroi për mediat se “kjo mbledhje është thirrur jashtë praktikës dhe procedurave, duke dërguar njoftimin dhe rendin e ditës mbrëmë rreth orës 23, si mbledhje urgjente dhe e jashtëzakonshme, me një pikë të vetme të rendit të ditës, një pikë komplet teknike dhe aspak e jashtëzakonshme, që ka të bëj me kërkesën e Ministrisë së Diasporës për zgjatjen e periudhës së regjistrimit të votuesve jashtë vendit”.

Sipas Rrustemit, një kërkesë të tillë KQZ-ja e ka pranuar me datë 20.08.2013, ndërsa javën e kaluar është shqyrtuar në këshillin e procedurave që përbëhet nga anëtarë të KQZ-së. Këshilli i ka rekomanduar KQZ-së që të refuzojë këtë kërkesë për arsye që nuk ka mundësi objektive të zgjatet afati, ngase është e përcaktuar me rregulla të KQZ-së dhe bie ndesh me planin operacional të zgjedhjeve, dhe me periudhat zgjedhore, që pritet të fillojnë e që rezultojnë nga kjo fazë. Por, kjo mbledhje nuk e kishte për qëllim zgjatjen e periudhës së regjistrimit të votuesve në diasporë, por shfrytëzimin e kësaj kërkese për t’ia zgjatur periudhën dhe për t’i rritur mundësitë OSBE-së që të realizojë operacione zgjedhore që kanë të bëjnë me regjistrimin e votuesve në Serbi dhe Mal të Zi.

Rrustemi ka deklaruar se shtyrja e mbledhjes po e dëmton procesin zgjedhor dhe çështjet e përgatitjeve në përgjithësi, ngase sot kemi përgatitur edhe ngritjen e dy çështjeve shumë të rëndësishme për procesin zgjedhor.

“E para ka te bëj me listën e votuesve në komunën e Mitrovicës, respektivisht të mospërfshirjes së shqiptarëve të shpërngulur dhunshëm nga pjesa veriore e qytetit në pjesën jugore, e që për zgjedhje dëshirojnë dhe kanë të drejtë të votojnë dhe të kandidohen atje ku i kanë edhe vendbanimet e tyre. Lëvizja Vetëvendosje! ka dashur t’i shtrojë për diskutim dhe t’i paraqesë rekomandimet lidhur me tejkalimin e kësaj problematike, duke ua mundësuar që këta votues të përcaktohen se a dëshirojnë të votojnë në pjesën jugore apo veriore te Mitrovicës”.

Një çështje tjetër shumë e rëndësishme ka të bëj me numrin e mandateve të anëtarëve të Kuvendeve Komunale. KQZ-ja ka pranuar një shkresë nga zëvendës kryeministri dhe ministri i pushtetit lokal, lidhur me numrin e anëtarëve të kuvendeve komunale, në radhë të parë Ministria e Pushtetit Lokal nuk është përgjegjëse për këtë çështje, ngase formula është e qartë dhe vetëm është dashur të kërkojë numrin e banorëve nga agjencia e statistikave të Kosovës, si institucioni përgjegjës në bazë të ligjit për statistika zyrtare, dhe në bazë të këtyre të dhënave të vendos vet KQZ-ja se cili është numri i anëtarëve të kuvendeve komunale.

“Përmes kësaj shkrese ministri ka manipuluar qëllimshëm dhe politikisht me të dhëna, duke dëmtuar komunat me shumicë shqiptare dhe duke favorizuar komunat me shumicë serbe. Si rrjedhojë u është zvogëluar pa të drejtë numri i anëtarëve të kuvendeve komunale në komunat me shumicë shqiptare dhe u është rritur jashtëligjshëm numri i anëtarëve në komunat me shumicë serbe”, ka përfunduar Rrsutemi./PrizrenPress.com/

Kryeministri i Kosovës, Hashim Thaci, ka filluar  të negociojë me partitë e minoriteteve në Prizren. Ai fillimisht është takuar me përfaqësuesit e Partisë Turke të Kosovës (KDTP), ndërkaq në këto momente sapo ka filluar takimin me Partinë e Boshnjakëve “Vakat”.

Burimet e “PrizrenPress-it” bëjnë të ditur se Thaçi në këto takime është duke kërkuar nga partitë e minoriteve që në zgjedhjet e nëntorit të mbështesin PDK-në në Prizren.

Kryeministri Thaçi, pritet që sot të zgjedh edhe kandidatin e PDK-së për kryetar të Prizrenit. Ai po ashtu në ora 18: 00, do të shtrojë një darkë për mësimdhënësit e Prizrenit./ PrizrenPress.com/

Policia në Prizren ka arrestuar dy të dyshuar për gjuajtje me armë në aheng familjar  në fshatin Krajk të Hasit. Zëdhënësi i PK-së në Prizren, Hazir Berisha tha se rreth orës 21:00, policia në Prizren ka pranuar një informatë anonime e cila bënte me dije se në fshatin Krajk, në një aheng familjar, ka të shtëna nga armë të ndryshme të zjarrit.

“Pas kompletimit të informatës edhe përmes kanaleve tjera operative, zyrtarë policorë kanë shkuar në fshatin Krajk dhe kanë biseduar me organizatorin e ahengut i cili i ka treguar policisë se ai kishte shtënë në ajër me pistoletë, ndërsa daja i tij kishte shtënë me pushkë automatike”, tha Berisha. Sipas tij, të dyshuarit janë shoqëruar për në Stacion Policor në Prizren.”Po ashtu janë sekuestruar dy armë të cilat dyshohet të jenë përdorur në rast. Pistoleta është e llojit M-57 me shtatë fishekë ndërsa pushka automatike është e llojit kallashnikov me 30 fishekë”, tha Berisha.

Ai tha se pas konsultimit me prokurorin, është vendosur që të dyshuarit të lirohen, ndërsa rasti të procedohet sipas procedurës së rregullt./PrizrenPress.com/

Lidhja Demokratike e Kosovës (LDK) në Prizren, ka akuzuar drejtorin e Drejtorisë së Arsimit, Nexhat Çoçaj për politizimin  dhe shkeljet që ka bërë me hapjen e konkursit për drejtorë të shkollave dhe për fshehjen e vendeve të lira të punës.

Zëdhënësi i LDK-së, Nderim Gashi tha se Drejtoria e Arsimit në Prizren ka filluar fushatën, më shumë se dy muaj para afatit zyrtar të shpallur në KQZ-ja.“ Me 11 korrik te këtij viti,  Drejtoria e Arsimit shpalli konkursin për drejtorë shkollash, ndërsa disa ditë më vonë edhe për mësimdhënës. Që kur  është  shpallur konkursi për drejtor shkollash Dega e LDK-së ka tërhequr vërejtjen se konkursi është  i  njëanshëm dhe i motivuar politikisht,  sepse kjo drejtori me  vite i ka lënë  me ushtrues detyre shumë shkolla, e gjeti momentin e shpalljes së zgjedhjeve lokale, për ta shpallur këtë konkurs”, tha Gashi.

Sipas tij, drejtori i Arsimit,Çoçaj kur e shpalli konkursin tha se” ligji e obligon të veproj kështu”, ndërsa  edhe pse kanë kaluar  dy muaj ende nuk ka asnjë rezultat nga ky konkurs, politik. “ Ia përkujtojmë drejtorit të arsimit se ai duhet të përballet me ligjin  në të cilin thirrej për shpalljen e konkursit, këtë herë për mosrespektim të ligjit, në të cilin thirret”, tha Gashi.

Sipas tij, i njëanshëm dhe politik është edhe konkursi për mësimdhënës. “Sipas informacioneve të sigurta nga terreni të cilat i posedon Dega e LDK-së në Prizren, shume vende pune të cilat i mbajnë kuadrot me kualifikim joadekuat janë fshehur, sepse ato i mbajnë militantët e PDK-së, ndërsa vendet që janë shpallur të lira, në prag të fushatës janë sistemim I radhës i militantëve të PDK-së. Shkolla filloi sot, ndërsa emrat e drejtorëve dhe mësimdhënësve  të pranuar nuk janë publikuar”, tha Gashi.

Dega e LDK-së, kërkon nga Drejtoria e Arsimit, që të heq dorë nga politika,dhe të  anulojë konkursin për drejtorë shkollash, dhe të zgjedh mësimdhënësit që janë me kualifikim adekuat. “Dega e LDK-së në Prizren, me rastin e fillimit të vitit të ri shkollor, i uron të gjithë mësimdhënësit dhe nxënësit, duke uruar për një vit të mbarë dhe duke premtuar se pas zgjedhjeve të 3 nëntorit, të cilat do t’i fitojë LDK-ja do, do të iu vije fundi keqpërdorimeve te kësaj qeverisje ne ikje, dhe do hapet një shprese e re  edhe për arsimin prizrenas”, tha Gashi./PrizrenPress.com/