Instituti Demokratik i Kosovës (KDI), do të publikojë fletënotimin e këshilltarëve të Asamblesë Komunale të Prizrenit. Përfaqësuesi i KDI-së, Naim Cahani tha se fletënotimi përmbanë analizë dhe notim të 41 anëtarëve.

“Fletënotimin përmban analizë dhe notim për punën individuale të 41 anëtarëve të Kuvendit të Komunës së Prizrenit dhe subjekteve politike të përfaqësuara në këtë kuvend për periudhën Janar-Qershor 2013”, tha Cahani.

Fletënotimi i anëtarëve të Asamblesë Komunale të Prizrenit, publikohet nesër në ora 10:00 në zyre të KDI-së në Prizren ./PrizrenPress.com/

Mërgimtarë e Shoqatës Kulturore “Anadrini” me seli në Eferding të Austrisë, kanë gëzuar 25 familje skamnore me nga 100 euro në Rahovec. Kryetari i Rahovecit, Smajl Latifi, falënderoi mërgimtarët për kujdesin e treguar, si dhe shprehu kënaqësinë që kjo shoqatë kulturore e sportive është shumë aktive në Austri.

“Jam i kënaqur që këta bashkëvendës tanë janë kaq mirë të organizuar dhe kanë mundur të ndajnë mjete nga të ardhurat e tyre për familjet në nevojë në Rahovec. Ky është një shembull i mirë i kujdesit njerëzor, prandaj ne i përgëzojmë për këtë lehtësim të barrës së varfërisë ndaj kësaj kategorie të shoqërisë tonë me rastin e Fitër Bajramit”, tha Latifi. Sipas tij, ndihma e mërgimtarëve nga Eferdingu është më e gjerë, pasi që ata kanë iniciuar binjakëzimin e Rahovecit me këtë rajon bujqësor të Austrisë.

Arkëtari i “Anadrinit” Riza Mustafa, ndërkaq bëri apel te të gjithë mërgimtarët që kanë mundësi që të ndajnë një pjesë të të ardhurave për familjet skamnore në Kosovë, pasi që numri i tyre nuk është i vogël. Sekretari i Shoqatës “Anadrini”, Bujar Kryeziu, premtoi se kjo nuk do të jetë ndihma e parë për skamnorët. “Kjo nuk do të jetë ndihma e vetme për bashkëvendësit tanë, mirëpo anëtarët e shoqatës do të angazhohen që ta thellojnë bashkëpunimin me vendlindjen”, tha Kryeziu. /PrizrenPress.com/

Lëvizja FOL ka publikuar sot raportin e saj të rregullt “Monitoruesi i Prokurimit” për periudhën Prill-Qershor 2013. Në këtë raport pasqyrohen shkeljet dhe parregullsitë ligjore të evidentuara nga ana e OSHP-së të ministrive, ndërmarrjeve publike (KEK dhe PTK) dhe komunave gjatë zhvillimit të procedurave të prokurimit publik.

Kenan Tora nga Lëvizja FOL pasi që prezantoi qëllimin dhe metodologjinë e hartimit të raportit tha se “ Trendi i shkeljeve dhe parregullsive ligjore gjatë zhvillimit të procedurave të prokurimit publik nga ana e Ministrive, Ndërmarrjeve Publike (KEK dhe PTK) dhe Komunave të Republikës së Kosovës ka shënuar rritje në këtë periudhë kohore të këtij viti. Në periudhën Prill-Qershor, institucionet e lartë-përmendura kanë bërë shkelje ligjore në gjithsej 29 tenderë të ndryshëm. Nga ana e Organit Shqyrtues të Prokurimit prej këtyre 29 tenderëve 14 janë kthyer në Ri-vlerësim, 7 janë kthyer në Ri-tenderim, 3 janë anuluar, kurse në 5 të tjerë është ndërhyrë në dosjen e tenderit.

Sipas të gjeturave të këtij raporti, ministritë nuk i kanë respektuar dispozitat ligjore të Ligjit për Prokurim Publik në 8 tenderë të ndryshëm, ku Ministria e Infrastrukturës ka bërë shkelje ligjore në 4 aktivitete të ndryshme të prokurimit, kurse Ministria e Punëve të Brendshme, Ministria e Bujqësisë, Pylltarisë dhe Zhvillimit Rural, Ministria e Shëndetësisë si dhe ajo e Tregtisë dhe Industrisë në nga 1 tenderë.

Ndërmarrjet Publike(KEK dhe PTK) kanë bërë shkelje ligjore në 9 aktivitete të ndryshme të prokurimit. KEK ka bërë shkelje ligjore gjatë zhvillimit të procedurave të prokurimit në 5 aktivitete të prokurimit, kurse PTK ka bërë shkelje në 4 të tilla.

Ndërsa Komunat e Republikës së Kosovës nuk i kanë respektuar dispozitat ligjore të Ligjit për Prokurim Publik në gjithsej 12 tenderë të ndryshëm. Komuna e Prishtinës ka bërë shkelje në 4 tenderë, kurse Komuna e Gjilanit, Lipjanit, Parteshit, Prizrenit, Vitisë, Gjakovës, Mitrovicës dhe ajo e Pejës në nga 1 tenderë.

Përveç kësaj në këtë raport Lëvizja FOL raporton se ka realizuar monitorime direkte të 37 procedurave të prokurimit në ministri me të cilat ka Memorandum të Mirëkuptimit. Si rezultat në 23 nga këta tenderë janë shpallë operatorët ekonomik fitues, 11 janë Anuluar ndër ta disa me rekomandim të Lëvizjes FOL me qëllim të parandalimit të shkeljeve ligjore, kurse në 2 tenderë është shpallur fituesi vetëm për Lot I, ndërsa një tenderë është ende në procedurë e sipër./PrizrenPress.com/

Raportohet se një person nga Rahoveci, gjatë një ahengu familjar nën ndikimin e alkoolit ka goditur një xham të dritares duke i prerë venat e dorës.

Ngjarja ka ndodhur mbrëmë pas mesnate në rrugën “Afërdita Ukshini” në Rahovec.

Sipas policisë, viktima ka pësuar lëndime të rënda dhe është dërguar për tretman mjekësor në Qendrën Klinike Universitare të Kosovës në Prishtinë.

Fondacioni i Besimit Tony Blair Faith Foundation dhe Ministria e Punëve të Jashtme e Republikës së Kosovës, në bashkëpunim me Balkan Institute dhe Universitetin e Prishtinës sot nisin një program veror dy-javor mbi “Fenë dhe politikën e jashtme: Shqyrtimi i rolit të fesë në transformimin konfliktuoz dhe post-konfliktuoz”, prej 5-17 gusht.

Programi mirëpret 26 pjesëmarrës nga 15 shtete, duke përfshirë edhe vendet e largëta si Maroku, Kina dhe Ukraina.

Ekspertë të njohur do të ligjërojnë në kuadër të një programi të larmishëm që mbulon tema si feja në kontekstin e rindërtimit post-konfliktuoz dhe rolin e fesë, kulturës dhe identitetit në Ballkan. Në mesin e ligjëruesve do të jenë profesor Miroslav Volf nga Universiteti Yale, profesor Ivo Vanac nga Universiteti Yale dhe nga Zagrebi, ambasadori Zamir Akram, ish-ambasador i Pakistanit pranë Kombeve të Bashkuara dhe ligjërues në Geneva School of Diplomacy, dhe Obrad Saviq nga Universiteti Singidunum. Programi do të përfshijë një udhëtim fundjave për në Prizren për të vizituar trashëgiminë kulturore të qytetit të xhamive dhe kishave të cilat qëndrojnë krah për krah.

Charlotte Keenan, kryeshefe ekzekutive pranë Tony Blair Faith Foundation, tha:

“Këtë verë po bashkëpunojmë me Ministrinë e Punëve të Jashtme të Kosovës, Universitetin e Prishtinës dhe Balkan Institute, përmes organizimit të një programi intensive veror mbi ndërveprimin mes fesë dhe politikës së jashtme. Programi bashkon studentët me profesionistë, diplomatë, si dhe me udhëheqës rajonalë dhe ndërkombëtarë. Programi do të pajisë pjesëmarrësit me njohuritë dhe aftësitë e domosdoshme për të kuptuar dhe analizuar rolin e fesë në kontekst të situatave konfliktuoze dhe post-konfliktuoze. Shpresojmë se ky program do të bëjë që ta shohim fenë si pjesë të zgjidhjes, si dhe shpeshherë si pjesë të problemit. Nuk ka vend më të mirë sesa Kosova për zhvillimin e një kursi të tillë”, tha Charlotte Keenan.

“Programi veror është edhe një hap përpara në përkushtimin tonë të vazhdueshëm për nxitjen e dialogut ndërfetar në Kosovë. Kjo nismë është pjesë e programit tonë shumëdimensional të diplomacisë publike dhe është vazhdimësi e konferencës së suksesshme ndërkombëtare ndërfetare e cila mblodhi prijës fetarë dhe ekspertë botërorë në Pejë, në maj të këtij viti. Jemi të lumtur për bashkëpunimin tonë me Tony Blair Faith Foundation me të cilin fondacion do të organizojmë programin dhe do të jemi nikoqirë të ekspertëve të njohur botërorë këtu në Kosovë, ku do të vazhdojmë t’i trajtojmë këto çështje të rëndësishme me pjesëmarrës nga 14 shtete”, tha zëvendësministri i Punëve të Jashtme të Republikës së Kosovës, Petrit Selimi. /PrizrenPress.com/

Nënkryetari për komunitete i Komunës së Prizrenit, Orhan Lopar, pas katër vjetësh të bashkëqeverisjes në nivel lokal me Partinë Demokratike të Kosovës është shprehur i zhgënjyer me partnerët politikë për shkak të mospërmbushjes së pikave të marrëveshjes së koalicionit.

Ai thotë se me premtimin për dhënien e letërnjoftimeve dhe dokumenteve të regjistrimit civil në gjuhën turke PDK-ja i ka mashtruar njëherë turqit e Prizrenit dhe se të njejtën gjë nuk do të mund ta bëjë në të ardhmen.

“Pika e parë e marrëveshjes së koalicionit PDK-KDTP ka qenë dhënia e letërnjoftimeve dhe ekstrakteve të lindjes në gjuhën turke. Për fat të keq kjo pikë e marrëveshjes nuk është realizuar. Ndërkohë dy vjet më parë ne kemi realizuar një peticion, kemi grumbulluar nënshkrime, i kemi dorëzuar ato te institucionet, por kjo kërkesë nuk është marrë parasysh. Nëse kjo ka qenë lojë për të marrë votat e turqve në Prizren, atëherë i bie se PDK-ja keq na ka mashtruar”, ka thënë Lopar, shkruan Koha Ditore.

Ai ka theksuar se në kohën e nënshkrimit të marrëveshjes ka qenë i ri në politikë dhe e pranon se gjatë katër viteve të kaluara ka marrë mësime të shumta.

“ Nuk do të mund të na mashtrojnë përsëri” ka deklaruar Lopar. Ai ka fajësuar edhe turqit të cilët sipas tij, nuk kanë bërë sa duhet për të mbrojtur të drejtat e tyre.