(E plotësuar) Në 25 komuna të Kosovës, sot zhvillohet gara e balotazhit përmes së cilës qytetarët me të drejtë vote, kanë mundësinë që të votojnë për zgjedhjen e kryetarëve të rinj për mandatin e ardhshëm.
Hapjen e të gjitha vendvotimeve në komunat ku zhvillohet balotazhi, e ka konfirmuar edhe kryetarja e Komisionit Qendror të Zgjedhjeve, Valdete Daka, në konferencën e parë për sot të orës 8, duke theksuar se nuk ka pasur asnjë problem.

“Duke u bazuar në raportet e Komisioneve Komunale të zgjedhjeve, janë hapur të gjitha vendvotimet që në orën 7 të mëngjesit”, ka thënë Daka.

Zgjedhjet do të mbahen edhe në tri vendvotime në Zveçan, ku për shkak të parregullsive në rrethin e parë, do të ketë rivotime.

Filluan votimet në balotazh

Në 25 komuna janë hapur 1816 vendvotime në 594 Qendra të Votimit, ku do të votojnë rreth 1 milion e 40 mijë qytetar me të drejt vote.
Kurse, në Zveçan do të ketë përsëritje të votimit të raundit të parë në tri vendvotimem ku të drejt vote kanë 2595 votues.

Të drejt vote përmes postës kanë 11.738 votues.

Komisioni Qendror i Zgjedhje tashmë ka konfirmuar se janë bërë të gjitha përgatitjet për mbajtjen e zgjedhjeve të raundit të dytë.

Presidentja e Kosovës, Atifete Jahjaga, ka pritur të shtunën, një ditë para balotazhit, të gjithë komponentët e përfshirë në procesin elektoral. Ajo ka vlerësuar se më 1 dhjetor, Kosova do të dëshmojë se do ta kalojë me sukses testin e demokracisë.

“Zgjedhjet e 1 dhjetorit duhet të dëshmojnë se Kosova është shtet i së drejtës dhe shtet i qytetarëve të barabartë”, ka thënë Jahjaga.

Ajo ka kërkuar nga organet përgjegjëse që të mos tregohet kompromis për ata që cenojnë procesin.

Nga aspekti i sigurisë, Policia e Kosovës ka angazhuar 5.100 zyrtarë policorë për të siguruar mbarëvajtjen e procesit.

Balotazhi do të mbahet edhe në Mitrovicën e veriut, ndërkaq në Zveçan do të përsëriten zgjedhjet në tri vendvotime. Për shkak të rrethanave specifike në atë pjesë, Policia e Kosovës do të bashkërendojë masat dhe veprimet me EULEX-in dhe KFOR-in.

“Policia e Kosovës do të bashkëpunojë dhe bashkërendojë aktivitetet operacionale edhe me EULEX-in, si reagues i dytë dhe KFOR-in si reagues i tretë në rast nevoje, për të parandaluar incidentet e mundshme, të cilat mund të kenë ndikim në procesin e votimit”, ka thënë zëdhënësi i Policisë së Kosovës, Baki Kelani, transmeton Rel.

Ngjashëm me votimet e 3 nëntorit, edhe në balotazh, ku janë përfshirë 50 kandidatë në garën për 25 vende për kryetar në komunat e Kosovës, i gjithë procesi do të monitorohet dhe vëzhgohet nga afër nga organizata vendase e ndërkombëtare.

Bashkimi Evropian, ditën e zgjedhjeve do të ketë 71 vëzhgues.

Një numër të caktuar vëzhguesish do ta kenë edhe ENEMO dhe organizatat tjera ndërkombëtare.

Kurse, me mbi 1.600 vëzhgues do t’i përcjellë votimet edhe koalicioni i organizatave joqeveritare “Demokracia në Veprim”.

Ndërsa balotazhi po zhvillohet në 25 komuna, po nga zgjedhjet e lokale të 3 nëntorit në 13 komuna kryetarët u zgjodhën qysh në rrethin e parë. Këto zgjedhje prodhuan si rezultat edhe zgjedhjen e asamblistëve të rinj nëpër të gjitha komunat e Kosovës.

Kush me kë në balotazh?

Balotazhi për kryetar në 25 komuna të Kosovës, zhvillohet nga 50 kandidatë, të cilët vijnë nga subjekte të ndryshme politike. Më poshtë publikojmë emrat e tyre dhe qytetet ku zhvillohet gara e balotazhit. /Telegrafi/

Prishtinë: Isa Mustafa (LDK) dhe Shpend Ahmeti (Vetëvendosje)

Gjakovë: Mimoza Kusari Lila (AKR) dhe Pal Lekaj (AAK-LDD)

Prizren: Ramadan Muja (PDK) dhe Eqrem Kryeziu (LDK)

Pejë: Gazmend Muhaxheri (LDK) dhe Ali Berisha (AAK-LDD)

Gjilan: Lutfi Haziri (LDK) dhe Qemajl Mustafa (PDK)

Mitrovicë e Jugut: Avni Kastrati (PDK) dhe Agim Bahtiri (AKR)

Mitrovicë e Veriut: Krstimir Pantiq (GIS) dhe Oliver Ivanoviq (IQ)

Ferizaj: Agim Aliu (PDK) dhe Muharrem Svarça (LDK)

Malishevë: Ragip Begaj (IQM) dhe Sali Morina (LDK)

Rahovec: Idriz Vehapi (PDK) dhe Smajl Latifi (AAK-LDD)

Dragash: Selim Jenuzi (PDK) dhe Fatmir Mehmeti (LDK)

Graçanicë: Branimir Stojanoviq (GIS) dhe Bojan Stojanoviq (SLS)

Junik: Agron Kuçi (AAK-LDD) dhe Zenun Shala (LDK)

Kamenicë: Shaip Surdulli (LDK) dhe Begzad Sinani (PDK)

Klinë: Sokol Bashota (PDK) dhe Enver Berisha (LDK-LDD)

Lipjan: Shukri Buja (PDK) dhe Imri Ahmeti (LDK)

Novobërdë: Bajrush Ymeri (LDK) dhe Svetislav Ivanoviq (GIS)

Obiliq: Mehmet Krasniqi (LDK) dhe Xhafer Gashi (AAK-LDD)

Suharekë: Sali Asllanaj (LDK) dhe Bali Muharremaj (AAK-LDD)

Viti: Sokol Haliti (LDK) dhe Nexhmedin Arifi (PDK)

Vushtrri: Bajram Mulaku (PDK) dhe Muharrem Shabani (AAK-LDD)

Partesh: Nenad Cvetkoviq (SLS) dhe Dragan Nikoliq (GIS)

Ranillugë: Gradimir Mikiq (GIS) dhe Milan Aritonoviq (SNPK)

Shtërpcë: Bratislav Nikoliq (SLS) dhe Ivan Rexhiq (GIS)

Kllokot: Sreçko Spasic (GIS) dhe Sasha Mirkoviq (SLS)

Komisioni Komunal zgjedhor i ka bërë të gjitha përgatitjet që  nesër në komunën e Prizrenit, procesi zgjedhor të ecë  sa më mirë. Anëtari i Komisionit Komunal zgjedhor në Prizren,  Ilir Baldedaj, tha se gjatë ditës së sotme komisioni komunal zgjedhor është marr me shpërndarjen e materialeve jo të ndjeshme.

” KKZ-ja në Prizren është në fazën e fundit të përgatitjeve”, tha baldedaj, transmeton TVO.

Prizrenasit edhe në ditën e nesërme do të votojnë në 67 qendra të votimit, në 208 vendvotime.

Baldedaj tha  se Prizreni me 3 nëntor ka tregu kulturë politike dhe qytetare dhe shpreh besimin e edhe nesër procesi do të shkojë pa probleme.

Baldedaj e shpreh besimin se në procesin e nesërm do të ketë më pak fletëvotime të parregullta, ndërsa i fton qytetarët që të dalin në zgjedhje.

Për dallim nga zgjedhjet e 3 nëntorit, zgjedhjet e 1 nëntorit do të jenë më të lehta edhe për numërimin e votave dhe rezultatet jozyrtare do të dihen pak orë pas përfundimit të zgjedhjeve.

Deputetët e Kuvendit të Kosovës vetëm për 9 muaj, prej janarit deri në shtator të këtij viti, kanë bërë shpenzime të mëdha në dreka zyrtare, telefona, udhëtime jashtë shtetit, si dhe mëditje. Vetëm për dreka, ata kanë shpenzuar më shumë se 87 mijë euro, ndërsa për telefona rreth 52 mijë euro. Ndryshe, siç heqin dorë lehtë duke bojkotuar seancat, deputetët këtë nuk e kanë bërë edhe kur është fjala tek udhëtimet zyrtare jashtë shtetit dhe mëditjet për ato udhëtime. Vetëm për udhëtime jashtë shtetit, deputetët kanë shpenzuar mbi 55 mijë euro. Po për udhëtimet jashtë shtetit, deputetët kanë marrë mbi 48 mijë euro mëditje.

Kurse, akomodimi jashtë vendit u ka kushtuar mbi 10 mijë euro. Mbi 10 mijë euro deputetët kanë shpenzuar edhe brenda vendit. Ata, 35 mijë euro i shpenzuan për kompjuterë. E paga dhe mëditje, për 9 muaj, deputetët morën mbi 2 milionë e 230 mijë euro. Shikuar në përgjithësi, deputetët për 9 muaj kanë shpenzuar gjithsej mbi 2 milionë e 500 mijë euro. E hiq më pak nuk ka shpenzuar edhe Administrata e Kuvendit. Për paga dhe mëditje kanë marrë mbi 1 milion euro, ndërsa për telefon fiks dhe mobil, administrata ka shpenzuar mbi 55 mijë euro.

Ndërkohë, shoqëria civile kritikon Kuvendin e Kosovës për shpenzimet që deputetët e Kuvendit të Kosovës kanë bërë për 9 muaj, nga 1 janari deri më 30 shtator të këtij viti.

Analisti Avni Zogiani i ka quajtur këta deputetë të Kuvendit të papërgjegjshëm, të cilët mendojnë për komfortin e tyre e jo për përgjegjësitë institucionale. Zogiani tha se janë pikërisht këta deputetë që kanë pagën dhe mëditjet më të mëdha në rajon, ndërsa për punën që bëjnë nuk do të duhej të kishin pagë më të lartë se ajo mesatare në Kosovë, transmeton KTV. Edhe KDI-ja, e cila është monitoruese e rregullt e punës së Kuvendit, vlerëson se shpenzimet e deputetëve janë në disproporcion me punën që ata e bëjnë. Valmir Ismajli thotë se Kuvendi do të duhej të ishte gardian i shpenzimeve të institucioneve tjera.

Presidentja e Republikës së Kosovës, Atifete Jahjaga, ka pritur përfaqësuesit e institucioneve përgjegjëse për organizimin, mbarëvajtjen dhe sigurinë e zgjedhjeve komunale të raundit të dytë, ato të balotazhit, që do të mbahen nesër, në 25 komuna të Kosovës.

Presidentja Jahjaga ka thënë se kanë diskutuar për sigurinë e votuesve, duke vlerësuar se të gjithë mekanizmat për mbajtjen e zgjedhjeve janë përgatitur për garantimin e zgjedhjeve të drejta dhe të lira.

“Ligji do të garantohet në rast të cenimit të votës së lirë dhe askush nuk do të amnistohet për shkelje të së drejtës elementare të qytetarëve të Republikës së Kosovës. Zgjedhjet e 1 dhjetorit duhet të dëshmojnë se Kosova është shtet i së drejtës dhe shtet i qytetarëve të barabartë. Duhet të dëshmojmë integrimin e secilit qytetarë në shoqërinë dhe institucionet e vendit dhe të atyre të komunitetit serb në veri të territorit të Republikës së Kosovës dhe kjo do të përmbyll një kapitull të kundërshtimeve mes nesh duke i ftuar të gjithë qytetarët e Republikës së Kosovës dhe duke hapur perspektivën e integrimeve evropiane. Nesër është testi përfundimtarë dhe ne duhet ta kalojmë atë”, është shprehur ajo,transmeton KP.

Presidentja ka thënë se duhet garantuar zgjedhje të qeta, demokratike, të ndershme dhe të drejta dhe vota e secilit qytetarë të jetë e pacenueshme dhe se atyre do t’u garantohet vota në secilën pjesë të vendit.

Ajo gjatë ditës ka takuar edhe përfaqësues të shoqërisë civile, vëzhgues të punës së prokurorisë dhe të të gjithë procesit të zgjedhjeve.

Respektimi i heshtjes zgjedhore, vlen për të gjitha mediat. Por, portalet të cilat konsiderohen media të reja, që publikojnë shkrime, video dhe ka interaktivitet në to, nuk mbikëqyren as nga Komisioni i Pavarur i Mediave (KPM), e as nga Këshilli i Mediave të Shkruara të Kosovës (KMShK), pasi që e para mbikëqyr Televizionet dhe Radiot ndërsa e dyta mediat e shkruara.

Disa nga këto portale e kanë respektuar etikën gazetareske që përgjatë gjithë heshtjes parazgjedhore nuk kanë publikuar asnjë lajm sa i përket subjekteve politike, ndërsa disa nga to kanë postuar lajme dhe reklama të ndryshme, pikërisht për subjekte të ndryshme politike, pasi që nuk monitorohen nga askush, dhe nuk e kanë një Këshill apo Komision të përcaktuar me ligj i cili merret me to.

Njohës i fushës së politikës si dhe profesori i degës së gazetarisë, Milazim Krasniqi, ka thënë për Kosovapress, se mediat, duhet lënë ta bëjnë punën e vet, pasi që kanë për qëllim që sa më shumë të ketë komunikim dhe njerëzit të jenë të informuar. Ai, ka thënë se heshtja zgjedhore duhet të largohet nga ligji, pasi që, sipas tij, njerëzit veç përcaktohen më herët se cilin kandidat do ta votojnë.
“Në të vërtetë njerëzit përcaktohen qysh më herët sesa fillon heshtja zgjedhore, prandaj zgjidhja më e mirë është që kjo të hiqet nga ligji, gara të vazhdoj deri në momentet e fundit. Po them gjithmonë vetëm një gjë, duhet të përjashtohet gjuha e urrejtjes, thirrjet për dhunë, pjesa tjetër është garë e hapur dhe ajo duhet të vazhdojë deri në momentin e fundit”, ka pohuar Krasniqi.
Leonard Kërquki, nga gazeta online Express, ka thënë për Kosovapress se deri sa nuk kanë një instancë tjetër që merret me mediat online, ata do të respektojnë kodet vetërregulluese të Këshillit të Mediave të Shkruara të Kosovës që janë në fuqi tash e sa vjet dhe nuk do të shpërndajnë material zgjedhor, i cili është i ndaluar gjatë heshtjes zgjedhore.

“Mediat online nuk monitorohen nga KPM-ja, për shkak se KPM-ja monitoron televizionet. Mediat online janë anëtare të Këshillit të Mediave të Shkruara të Kosovës, por edhe aty ka një debat nëse duhet me qenë KMSHK-ja përgjegjëse për mediat online, për arsye se KMSHK-ja është organ, një instancë vetërregulluese e mediave të shkruara. Ndërkohë që, media online nuk është thjeshtë medium i shkruar por ka edhe video, ka edhe gjëra tjera që dalin jashtë domenit të KMSHK-së. Megjithatë, deri sa nuk kemi një instancë tjetër, mediat online respektojnë kodet vetërregulluese të Këshillit të Mediave të Shkruara të Kosovës që janë në fuqi tash e sa vjet”, ka thënë Kërquki.
Redaktori përgjegjës i portalit Indeksonline, Valdrin Krasniqi, ka thënë se portaleve në përgjithësi po u mungon një Këshill i Pavarur i cili do të bënte mbikqyrjen e veprimtarisë së tyre. Sipas tij, është mirë që ky këshill të inicohet nga mekanizmat përkatës dhe të formohet sa më parë që të jetë e mundur.
“Ne edhe tani do ta respektojmë heshtjen parazgjedhore dhe nuk do të publikojmë asnjë shkrim që ka të bëjë me kandidatët për kryetar të komunave apo subjekteve politike. Portalet padiskutim duhet të monitorohen nga një organ përkatës. Është mirë që në një të ardhme të shpejt të formohet një Këshill i Pavarur për mediat online, pasi që, sot, kemi një numër të konsiderueshëm të portaleve që po e kryejnë detyrën e tyre dhe formimi i këtij Komisioni ose Këshill i Mediave Online do të ishte shumë në favor të gazetarisë”, ka theksuar Krasniqi për Kosovapress.

Kërquki, ka thënë se në gazetën Express, e kanë respektuar heshtjen zgjedhore të tre nëntorit dhe se do respektojnë edhe në raundin e dytë për balotazh. Ndërsa, ka shtuar se nuk ka arsye që mediat online të ndahen nga mediat e tjera kur bëhet fjalë për respektimin e kodeve dhe ligjeve të vendit.
Edhe Valdrin Krasniqi, ka shtuar se përgjatë heshtjes parazgjedhore nuk kanë publikuar asnjë lajm sa i përket subjekteve politike me përjashtim të deklaratave të institucioneve përkatëse siç është KQZ, Policia e Kosovës, EULEX-i e të tjerë mbikëqyrës në këtë proces zgjedhor dhe ka shtuar se edhe për raundin e dytë do të vazhdojnë të përmbahen që mos të shpërndajnë material të fushatës, i cili është i ndaluar.

Ndryshe, profesori Milazim Krasniqi, ka thënë se mediat online po zhvillohen në masë të madhe dhe, sipas tij, përditë e më shumë po rritet ndikimi i mediave të reja, veçmas i portaleve, por edhe i rrjeteve sociale, ku edhe teoricienët, sipas tij, mendojnë se e ardhmja është pikërisht e këtyre lloj mediave.

Krasniqi, ka marrë shembuj se shumica e vendeve në botë dhe në SHBA vazhdohet gara deri në momentet e fundit dhe, sipas tij, kjo është gjëja më normale, që deri në momentin e fundit kandidatët e shfrytëzojnë çdo moment që votuesit t’i thirrin për programet e veta.

Sidoqoftë, në Kosovë, heshtja zgjedhore është e obliguar me ligj. Mbetet të shihet nëse portalet por edhe rrjetet sociale do ta respektojnë këtë, edhe pse ata nuk i ngarkon ky ligj për respektim të heshtjes zgjedhore./Kosovapress/

Qeveria e Austrisë në mbledhjen e vet të ardhshme, të martën, do të zgjasë mandatin e ushtarave të vet në misioninn dërkombëtare në Kosovë në kuadër të KFOR-it.

Siç ka njoftuar Ministria e Mbrojtjes, numri i pjesëtarëve austriakë të KFOR-it do të shtohet nga 450 në 600 ushtarë.

Arsye për shtim, siç transmeton APA, është veprimi fleksibil i ushtrisë austriake.