Redaksisë së botimit elektronik e-novina i është paraqitur polici Petar Gjorgjeviq, i cili ka akuzuar pjesëtarët e MUP-it serb për krime monstruoze në Kosovë dhe pas kësaj, siç pohon, ai ka qenë viktimë e Njësisë për mbrojtjen e dëshmitarëve si dhe të Prokurorisë për krime lufte të Serbisë. Bashkëbiseduesi i e-novine tashti jeton në Lihtenshtajn me gruan dhe dy fëmijët e tij, transmeton Koha.net.

Ai thotë të jetë motivuar me dëshminë e Sllobodan Stojanoviqit, me vëmendjen e sërishme të opinionit që ka treguar interesim për rastin e tyre dhe me gënjeshtrat që me këtë rast i kanë thënë prokurori Vlladimir Vukçeviq dhe zëvendësprokurori për krime të luftës Bruno Vekariq.

“Në njësinë 37 të PJP jam nga viti 1998, nga vera kur ndodhin krimet e para të luftës. Kam qenë në të gjitha aksionet në Kosovë. Më kujtohen përleshjet në Rahovec e rrethinë, aty pati shumë vrasje, plaçkitje dhe djegie të shtëpive. Dejan Mihajlloviq-Çebe dhe Sërgjan Nikoliq-Luçica ishin bashkëpunëtorët më të afërt të komandimit Nenad Stojkoviq për të gjitha punët e fëlliqura. Vrisnin pleq, fëmijë, me urdhër të Stojkoviqit, disa edhe pa urdhër të tij.

Kur u takova një herë me prokurorin Vukçeviq, në prani të Dragoljub Stankoviqit dhe disa të tjerëve, i tregoja për vrasjet e dhjetëra civilëve për të cilat kishte dhënë urdhër, ose kishte ditur komandanti i njësisë, Radosllav Mitroviq, si dhe për disa varreza masive. Ai e lëmonte mjekrën e tij dhe më tha: “Nuk kemi mjaft mish për Mitroviqin për ta gjykuar”. Isha i shokuar me mënyrën se si ai i trajtonte civilët e vrarë shqiptarë, për të e tëra kjo ishte vetëm “mish”, thotë bashkëbiseduesi i e-novina.

Mirosllav Vidoslavljeviq-Mikica ishte një kohë komandir në stacionin policor në Leskovc. Me të isha i afërt një kohë, derisa nuk u deklarova si “tradhtar”, pastaj i ndërpremë kontaktet. Por derisa ishim të afërt, ai më tregonte se si ka transportuar kamionë me kufoma. U pamë gjatë vitit 1999 në rrethinë të Prizrenit, psikikisht e kishte lëshuar, me gjasë shkaku i asaj që kishte bërë e përjetuar. Ishte i ri, sapo kishte përfunduar Akademinë policore dhe kishte filluar të punonte. Më tregonte se urdhrat i merrte nga eprori me nofkën “Gjeneral”.

Edhe në stacion flitej për këtë, ai mburrej me këtë, por si duket në vete vështirë e përjetonte këtë. Ai në shkurt të vitit 2009, kur u arrestuan katër veta kundër të cilëve dëshmuam ne, iku në Beograd, në Xhandarmëri, ku e pranoi komandanti Bozhidar Dikiq.

HORORI NË RAHOVEC: Nga mesi i korrikut 1998, kur policia mori qytetin e Rahovecit, nëpër rrugë kam parë me qindra kufoma, që rrinin asisoj në diell disa ditë. Atëherë, një ditë punëtorët komunalë me traktorë morën kufomat dhe i larguan jashtë qytetit, në një breg të afërm, mbi lokalitetin ku jetonte shumica serbe. Aty me ditë të tëra digjej zjarri dhe shumë policë në atë zjarr ngrohnin ushqimin e konservuar, duke mos ditur që në atë zjarr janë djegur rahovecianët e vrarë që i sillnin punëtorët komunalë. Në këtë përfundim vinim në bazë të erës së rëndë e të padurueshëm që vinte nga pjesët e padjegura të trupave.

GARA NË VRASJEN E CIVILËVE: Te fshati Obrijë e Epërme, në afërsi të Prizrenit, ishte një numër i madh i civilëve, disa mijë sish. Ishim në largim e sipër kur u paraqitën dy civilë, të rinj të moshës rreth të 20-tave, dikush i kishte zënë rob, nuk ishin të armatosur. Nenad Stojkoviq i dorëzoi te Çebe, i cili i zhveshi lakuriq. Mori një thupër të hollë dhe me të sillte sa mundte. Ishin krejtësisht të përgjakur, më kujtohet që ulërinin: “Kuku, nona, kuku, nona!”, dhe këtë sikur e dëgjoj ende. U përpoqa t’i them Stojkoviqit që t’i lirojë, kurse ai i aplaudoi Çebes dhe tha: “Kjo është mirë, bravo!”, i cili i nxitur nga lavdërimi i komandantit i rrihte edhe më me zell. Në fund të dy i vrau me pushkë.

Në fshatin Korishë, Çebe sillte njerëz nga Prizreni. Ata i zinin Zoran Markoviq-Cecko dhe Dragan Milenkoviq-Shisharka. Drejtori i ndërmarrjes komunale quhej Jovan, ai i caktonte njerëzit, shqiptarët e arsimuar, të cilët ende fshiheshin nëpër shtëpia, nuk donin të largoheshin. Shkonin atje i arrestonin dhe i sillnin në Korishë dhe në Korishë, para të gjithëve vriteshin me plumba të pistoletës së kalibrit të vogël në lule të ballit. Këtë e bënte më së shpeshti Çebe, atë e kam parë ta ketë bërë disa herë. Vriste njerëz edhe nëpër stalla. Mburrej se disa nga ta kishin urinuar në automobil, sepse e dinin se ku po i çonte.

Atë pistoletë të kalibrit të vogël ia kishte dhënë komandanti Radosllav Mitroviq, pasi që me urdhra të tij vriste njerëz që quheshin “kapital”. Kurdo që vriste dikë, Nenad Stojkoviq e lajmëronte Mitroviqin: “Kapitali shkoi në rrezitje…”, që do të thoshte se ishte vrarë.

Kemi pasur vetëm dy robër nga përleshja me UÇK-në, foto i keni publikuar, ata ishin të plagosur. Ata i ka vrarë pastaj Zoran Nikoliq-Honda, unë e kam paraqitur në Prokurori, por asgjë nga kjo.

Çebe është i njohur edhe për atë se për çdo shqiptar të vrarë ka bërë një gravurë në kondakun e drurit të pushkës. Ai lavdërohej se ka 80 gravura të tilla, që do të thotë se aq njerëz ka vrarë. Unë kam parë shumë likuidime të kryera nga ai, nuk e di saktësisht sa. Njëjtë ka vepruar edhe Luçica, ata bënin gara se kush do të vrasë më shumë civilë. Por, Luçica ishte edhe më brutal, pasi Dejan Çebe vriste me armë zjarri, kurse Luçica, ta zëmë, e ka prerë një plak me motosharrë. Në Korishë, në hyrje të fshatit, në shtëpinë buzë rrugës. Për çfarë arsyeje?! Për para, për çka tjetër do të vriste.

Luçica ka vrarë edhe dy djelmosha, rrugës për në Bajgorë, kishte edhe policë të tjerë në afërsi që e kanë parë këtë, të gjitha këto ia kam përshkruar Prokurorisë, por asgjë. Ata djelmosha kishin humbur, dikush i kishte zënë rob, kurse Luçica i detyroi të ulen në gjunjë dhe së pari njërin e pastaj edhe tjetrin i vrau me plumb në ballë.

Më kujtohet edhe një vrasje që Luçica e ka kryer në fshatin Pagarushë, jo larg Rahovecit. Pas marrjes së fshatit, një grup i policëve, në mesin e të cilëve isha edhe unë, shkaku i shiut u strehua në një shitore buzë rrugës në qendër të fshatit. Papritur u paraqit një njeri me shkop në dorë dhe me plis në kokë. Ishte shqiptar në moshë mbi 80 vjeçare, shkonte qetë, me kokë të ulur. Kur kaloi afër shitores, Luçica e ngriti pushkën dhe e mori në shenjë, ne të gjithë e shikonim me habi, duke mos besuar që ai do të shtijë në plakun e paarmatosur. Por, ai e vrau me gjakftohtësi, duke shtirë në të nga një afërsi e vogël. Tërë këtë e shikonte krejtësisht i painteresuar komandiri Stojkoviq.

Për nga brutaliteti ishte i njohur edhe Kallajxhiq, emrin ia kam harruar, e quanin Kallajxhija, shofer i kamionit T110. Në fshatin e minierës Stantërg, e lidhi plakun mbi 70-vjeçar për një dru. Njërën dorë ia lidhi për kamion, tjetrën për drurin. Dhe pastaj e shqeu me kamion, njeriu vdiq në vuajtje të mëdha. Kufoma mbeti aty kurse më pas kamionët (policorë e ushtarakë) kalonin mbi atë kufomë.

PLAÇKITJET DHE DJEGIET: Plaçkitjet në Kosovë ishin të rregullta dhe sistematike. Me dhjetëra vetura ndër më modernet të vjedhura silleshin, dhe në këtë drejtim printe Vidosavljeviq. I sillte automjetet në Leskovc, një prej tyre e bleu edhe polici kolegë Zevko. Atij automjetin ia shiti Vidosavljeviqi, kurse më vonë ia kurdiste se e ka blerë dhe e ka vozitur automjetin e vjedhur, kështu që Zevko mbeti pa punë. Iu ka shitur edhe të tjerëve, automjete të sjella nga Prizreni.

Plaçkitej ari, paratë, dhe pastaj lavdëroheshin me thasët me para, sidomos Çebe. Pastaj shkonte dora tjetër, teknike, televizorët, video rekorderët, antenat satelitore, mobiliet. Prapa nesh shkonte pjesa e prapme e çetës, të gjitha i ngarkonin nëpër kamionë dhe i transportonin për në Serbi.

Edhe djegiet ishin gjë e zakonshme, vetëm arrinte urdhri “Shkrepsa” dhe kallje i tërë fshati. Ndodhte pastaj që të nisemi dhe deri në cakun tjetër të na kapte terri, ktheheshim në atë fshatin e djegur dhe – nuk kishim ku të flinim, nuk kishte mbetur asnjë shtëpi e tërë.

Isha i pranishëm në një fshat disa kilometra larg Prizrenit, afër Korishës, kur Mitroviqi i dha urdhër Nenad Stojkoviqit që të zbraznim atë fshat. Stojkoviqi urdhëroi që të gjithë të dëbohen nga shtëpitë e tyre dhe të dërgohen për në Shqipëri. Këto ishin skena rrëqethëse, kur njerëzit dilnin nga shtëpitë, bartnin fëmijët në gjoks, tërheqin prapa gjërat personale. Tmerr! Ata nuk ishin shqiptarë, mendoj se kanë qenë turq apo boshnjakë dhe pyesnin ‘përse na dërgoni për në Shqipëri, po ne nuk e dimë gjuhën shqipe!’.

Urdhrat ishin “shkrepsë”, “gomë” dhe “në rrezitje”. “Gomë” do të thoshte që fshati të shtypet dhe të mos mbetet asgjë nga ai, sikur të ishte fshirë me gomë nga toka. “Në rrezitje” donte të thoshte të vritet. Ekzistonin vetëm këta tre urdhra. Shisharka dhe të tjerët mblodhën automjetet e disa shqiptarëve dhe shkuan për në Serbi, në prag të kërshëndellave 1999.

KUNBDËR KRIMINELËVE NË MESIN TONË: Derisa po e tregoj këtë, sikur më gërryen diçka në bark, kur njeriu është në luftë, në terren, ngjarjet kalojnë si nëpër shirit filmik. Mendoni vetëm për vete, si të ruani kokën, por jo edhe për atë se çka iu ngjan të tjerëve, nuk mendon që edhe tjetri është njeri. Bën llogari vetëm si të mbijetosh, të mos vdesësh. Por, pasi shpëton, fillojnë të renditen imazhet…

Pas luftës asgjë nuk më ka interesuar një vit të plotë. Ata që kanë bërë ato krime u bënë kryesorët në stacion policor dhe filluan të sillen në mënyrë arrogante. Vidosavljeviqi, Stojkoviqi, Çebe dhe të “heronjtë e tjerë të atdheut” pas luftës u morën edhe me reketim (zhvatje) të hotelierëve dhe prodhuesve privatë të mobilieve, si dhe me biznesmenë të tjerë nëpër qytet, si dhe me vepra të tjera penale… iu shkruheshin edhe fletëparaqitje penale, qëndronin edhe në paraburgim, por në fund e tëra përfundonte me aktgjykime për lirim.

Çebe u caktua për komandim të një stacioni policor në rrethinë, edhe pse kishte vetëm shkollën e mesme, Nenad Stojkoviq, ndërkaq, nga komandanti i çetës u bë kryeshef i Drejtorisë së policisë, përkatësisht i 12 apo 13-ti njeri në Ministrinë e Punëve të Brendshme të Serbisë. Një njeri gjysmëanalfabet. Vidosavljeviqi i ndërronte automobila, xhipat për çdo ditë. Dhe ata janë kryesorët, askush asgjë nuk guxon t’iu thotë. Flisja atëbotë: “Deri kur, o njerëz, deri kur!”, shumë njerëz nuk pajtoheshin, por heshtnin, sepse lehtë humbet puna në polici, shumë shpejt mund të të kurdisin çka të duan.

Me kalimin e kohës fillova të mendoj për atë se sa vite do të kishte një djalosh i ri i vrarë, a do të kishte edhe ai tash familjen e tij, fëmijët. Edhe ai është qenie e gjallë.

Kësisoj. Më duket se ky është motivi. Jam i sigurt që Serbia nuk do të lëvizë vendit deri sa në polici dhe ushtri e ku ta di unë tjetër të jenë kriminelët e tillë. Kam dashur edhe unë të jetoj më mirë, që fëmijët e mi të jetojnë normalisht, që Ratko Mladiq të mos jetë hero popullor, ta dinë se ai nuk është patriot dhe se këta vrasës, që paraqiten si “heronj të atdheut” në fakt nuk janë patriotë.

Kam menduar që sistemi mund të zgjidhë këto gjëra, që ka filluar të funksionojë, që Prokuroria për krime lufte është vërtetë prokurori, që nuk janë mbrojtës, avokatë dhe strehues të kriminelëve. Mendoja që ata i ndjekin dhe arrestojnë vrasësit për t’i sjellë para drejtësisë. Ka menduar që Njësia për mbrojtjen e dëshmitarëve është ajo që duhet të jetë, siç e thotë edhe emërtimi i saj, e jo të jetë njësi për mbrojtjen e kriminelëve.

*Petar Gjorgjeviq është pseudonimi i bashkëfolësit tonë. Identiteti i tij është i njohur për redaksinë e-novine si dhe për dëshmitarin e kaluar të mbrojtur Sllobodan Stojanoviq, që gjithashtu ka folur për e – novine. Identitetin e këtij dëshmitari të njohur e di edhe një pjesëtar i Njësisë 37 të Aradhës së Njësive Speciale të policisë serbe, i cili së shpejti do të japë internistën e tij për e-novine.

Zëvendëskryeministrja Edita Tahiri ka thënë se Ivica Daçiq në Beograd po e thotë krejtësisht të kundërtën e asaj që po punon në Bruksel. Sipas saj, BE-ja po ia bën të qarta mesazhet Serbisë, se nuk mund të hyjë në këtë Union pa e njohur Kosovën.

Qëndrimi i kryeministrit të Serbisë, Ivica Daçiq, lidhur me shkëmbimin e territoreve Kosovë-Serbi, nuk përputhet me angazhimin e tij në bisedimet në Bruksel. Kjo është përgjigja që zëvendëskryeministrja e Kosovës Edita Tahiri i bën kryeministrit serb lidhur me “ofertën” që ky i fundit e ka bërë pas mbledhjes së fundit të Këshillit të Sigurimit të OKB-së, për shkëmbim territoresh me Kosovën.

Në një intervistë për “lajmi.net”, Tahiri ka thënë se të gjitha çështjet e hapura mes Kosovës dhe Serbisë duhet të zgjidhen përmes të dialogut në Bruksel.

Ajo ka thënë se vetë angazhimi i palës serbe në dialog tregon se në fund të procesit do të ketë njohje reciproke mes dy shteteve.

“Është një diskrepancë e plotë mes deklaratave kontraverse e të kohëpaskohshme të z. Daçiq dhe angazhimit që ai dhe Qeveria e Serbisë e bëjnë në kuadër të dialogut për normalizimin e marrëdhënieve mes Republikës së Kosovës dhe Serbisë.. Qëndrimi ynë lidhur me këto çështje është se procesi i dialogut të Brukselit duhet përfundimisht të rezultojë me njohjen reciproke të dy shteteve, pra që Serbia ta njohë pavarësinë e Kosovës, në mënyrë që të realizohet normalizimi i plotë”, ka thënë zëvendëskryeministrja Tahiri.

Tahiri, e cila njëherit është edhe shefe e delegacionit të Kosovës për bisedime teknike me Serbinë, ka kritikuar kryeministrin serb se përmes këtyre deklaratave po dëshmon se ende vazhdon të merret me politikat e vjetra të Serbisë. “Deklarata e tij lidhet më tepër me politikat e vjetra të Serbisë, ndërkohë që Ballkani po jeton realitetin e ri të lindjes së shtatë shteteve të reja, përfshirë edhe shtetin e Kosovës, nga procesi i zhbërjes së ish-Jugosllavisë”, ka thënë Tahiri.

Zëvendëskryeministrja Tahiri ka thënë se Serbia nuk mund të ketë perspektivë evropiane, pa e njohur pavarësinë e Kosovës.

“Serbia e ka parasysh se nuk mund ta sigurojë perspektivën evropiane pa e njohur Kosovën dhe për këtë unë mund t`ju them që mesazhet e Bashkimit Evropian janë gjithnjë e më të qarta se vendet duhet të kenë fqinjësi të mirë me shtetet përreth, nëse dëshirojnë të bëhen pjesë e BE-së. Prandaj, unë jam e bindur që Serbia do të shkëputet nga politikat e së kaluarës dhe do ta pranojë realitetin në kuadër të së cilës Kosova është shtet i pavarur dhe Sovran”, ka thënë Tahiri.

Biseda telefonike në mes të Adem Grabovcit dhe Sami Lushtakut e plasuar në YuoTube ka arritur në 218.423 klikime. Afërsisht kaq kanë qenë të klikuara edhe përgjimet e tjera të publikuara një vit më parë. Ato ishin incizuar gjatë hetimeve kundër ish-ministrit Fatmir Limaj për korrupsion.

Kopjet e përgjimeve ishin shpërndarë 12 ditë pasi Prokuroria u kishte dhënë kopje të përgjimeve gjykatës, të akuzuarve dhe avokatëve të tyre.

Publikimi i tyre zbuloi aferën tashmë të njohur si “afera pronto” dhe ndasitë e mëdha në mes të Hashim Thaçit, Adem Grabovcit, Sami Lushtakut, Vlora Çitakut në njërën anë dhe Jakup Krasniqit e Fatmir Limajt, në anën tjetër.

Prokurori thotë se ende është duke e hetuar se kush i publikoi përgjimet telefonike të zyrtarëve të shtetit dhe të PDK-së.

Misioni i BE-së në Kosovë ka thënë për Koha Ditore se Prokuroria Themelore e Prishtinës është duke e hetuar publikimin e përgjimeve.

EULEX-i ka refuzuar të japë detaje të tjera për këtë çështje.

Zyra e Prokurorisë Speciale e Kosovës (SPRK) ka ngritur një aktakuzë në rastin e Ministrisë së Transportit dhe Telekomunikacionit më 16 nëntor të vitit 2012. /Koha Ditore/

Numri i personave që kanë vdekur në aksidente komunikacioni është rritur sivjet.

Nga janari deri në tetor të këtij viti, kanë vdekur 131 persona si pasojë e këtyre aksidenteve. 31 prej tyre, kishin qenë këmbësor.

Kjo shifër është 3 për qind më e lartë se në periudhën e njëjtë të 2012-s.

Ndërkaq janë lënduar mbi 8 mijë persona nëpër aksidente rrugore, shifër kjo 13 për qind më e lartë se vitin e kaluar.

Përfaqësuesit e Policisë së Kosovës, vlerësojnë se ndër shkaktarët kryesor të aksidenteve me fatalitet janë: shpejtësia, manipulimi i pasigurte i automjeteve, si dhe rrezikshmëria e rrugës. /Koha ditore/

Policia e Kosovës, Prokuroria dhe rrjeti i OJQ-ve Demokracia në Veprim, tashmë i kanë bërë të gjitha përgatitjet, me qëllim të ofrimit të sigurisë dhe mbarëvajtjës së procesit zgjedhor, i cili me 1 dhjetor mbahet në 25 komuna.

Në kuadër të përgatitjes për menaxhimin e situatës së sigurisë gjatë procesit zgjedhor, Policia e Kosovës me kohë ka hartuar dhe ka shpërndarë planin operativ policor “Balotazhi, rivotimi, 1 dhjetor 2013”. Sipas këtij plani, janë të caktuara detyrat dhe angazhimet policore për sigurimin e mbarëvajtjes së procesit. Zëdhënësi i PK-së, Brahim Sadriu thotë se edhe kësaj radhe, do të jenë në koordinim të ngushtë me institucionet tjera relevante, për ofrimin e sigurisë për secilin qytetar, që të shfrytëzojë të drejtën e tij për të votuar.

Lidhur me balotazhin që do të mbahet me 1 dhjetor të këtij viti, PK veç i ka finalizuar përgatitjet e saj me kohë, sa i përket detyra që veç bien në domenin e punës policore. Drejtoria e përgjithshme me kohë e ka lëshuar urdhrin operativ, për të gjitha drejtoritë rajonale dhe stacionet policore, për përgatitjet e planeve specifike, sa i përket menaxhimit të situatës së sigurisë gjatë kësaj dite. Janë bërë po ashtu përgatitjet lidhur me mbështetjen me staf, të gjithë atyre drejtorive rajonale, që kanë më shumë angazhime gjatë 1 dhjetorit, tha Sadriu.

Ndërsa sa i përket pjesës veriore të vendit, ai thotë se për shkak të specifikave në atë territor, PK janë në koordinim me EULEX-in dhe KFOR-in. Por sipas tij PK është e përgatitur të reagojë në çfarë do rasti që mund të paraqitet atje.

Edhe aty sikurse dhe në pjesë tjera janë bërë përgatitjet. Për shkak të specifikave atje, do të jemi në koordinim të ngushtë veç janë kryer pjesa e organizimit me EULEX-in dhe KFOR-in. Kështu që nuk presim që të kemi ndonjë problem në atë pjesë sikurse dhe në pjesët tjera. Por në çdo rast, ne jemi përgatitur që të reagojmë, gjithmonë në kompetencat dhe autorizimet që na jep ligji, për ruajtjen e sigurisë dhe për zbatimin e ligjit në tërësi, pohoi ai.
Edhe kryeprokurori i vendit Ismet Kabashi, ka pohuar se prokurori i shtetit do të jetë edhe më i mobilizuar për balotazh dhe se adresa e vetme dhe më e rëndësishme, për paraqitjen e ndonjë parregullsie, mbetet Prokuroria e Shtetit dhe Policia e Kosovës.

Prokuroria e shtetit për balotazh do të jetë i mobilizuar edhe më tepër se që ishte gjatë zgjedhjeve të 3 nëntorit. Në Prokurorinë Themelore në Gjakovë, është një prokuror i zyrës së kryeprokurorit të shtetit, për të koordinuar punën e asaj prokurorie. Ndërsa në ditën e votimit në të gjitha prokuroritë themelore të Kosovës, përveç prokurorëve të atyre prokurorive, do të jetë kujdestar edhe nga një prokuror i prokurorisë të apelit. Ndërsa edhe në Mitrovicë, një prokuror i zyrës së kryeprokurorit të shtetit, tha ai.

Ndërsa Shqipe Pantina nga rrjeti i OJQ-ve, Demokracia në Veprim, thotë se do ta monitorojnë tërë procesin zgjedhor me 1500 vëzhgues.

Në zgjedhjet e një dhjetorit, DV po ashtu do të monitoroj gjithë procesin me rreth 1500 vëzhgues të cilët do të jenë të dislokuar në 25 komunat, ku do të mbahen zgjedhjet për balotazh dhe në 7 komunat më të mëdha, e që janë Prishtina, Prizreni, Mitrovica, Gjilani, Ferizaj, Gjakova dhe Peja. Ne do të dalim me rezultate preliminare. U bëjmë thirrje partive politike edhe njëherë që ta ruajnë qetësinë dhe të mos vazhdojnë me këtë gjuhë dhe fjalor të ashpërsuar dhe qytetarëve për të marrë pjesë në zgjedhje me 1 dhjetor, tha ajo.

Edhe ENEMO, ka paraqitur planin e vëzhgimit, për raundin e dytë të zgjedhjeve lokale në Kosovë. Me 28 nëntor 2013, në Prishtinë kanë arritur vëzhguesit afatshkurtë. Ata kanë marrë udhëzime mbi ambientin politik, specifikat e procesit zgjedhor, kodin e mirësjelljes së vëzhguesve, legjislacionin e zgjedhjeve dhe aspekte të tjera të rëndësishme për procesin e vëzhgimit. ENEMO, po ashtu njofton se në ditën e zgjedhjeve, do të ketë 28 vëzhgues të ndarë në 14 ekipe afatshkurta të vëzhgimit, të cilat do të vëzhgojnë hapjen e vendvotimeve, gjendjen gjatë votimit në vendvotime, ambientin rreth vendvotimeve dhe numërimin e votave. Për më tepër, vëzhguesit e ENEMO-s, do të përcjellin bartjen e materialeve nga vendvotimet tek Komisionet Komunale të Zgjedhjeve dhe sjelljen e KKZ-ve. /Kosovapress/

Pesë ditët e fushatës për balotazhin e 1 dhjetorit, shënuan ashpërsimin e gjuhës politike që la nën hije një muaj të fushatës paraprake për rrethin e parë të votimeve të mbajtura më 3 nëntor. Akuzat dhe kundërakuzat që përdorën kandidatët dhe subjektet politike në balotazh nëpër disa komuna, nga analistët politik u cilësuan edhe si shkelje e kodit dhe mungesë e kulturës për debat politik.

Megjithatë, kjo nuk i ndaloi subjektet në balotazh që të mos kursejnë mjete, kur është në pyetje fjalori politik, vetëm e vetëm që të diskreditojnë kundërkandidatët. Akuzat dhe fjalori deri diku i vrazhdë politik i fushatës së fundit ishte dukuri si e atyre kandidatëve që po pretendojnë të vazhdojnë qeverisjen edhe për një mandat ashtu edhe e atyre që pretendojnë kreun,shkruan Tribuna.

Ismet Kryeziu, drejtor i Institutit Demokratik të Kosovës, që bën pjesë edhe në rrjetin e organizatave joqeveritare monitoruese të zgjedhjeve, “Demokracia në Veprim”, mendon se ashpërsimi i gjuhës gjatë fushatës, është shkelje e kodit të mirësjelljes dhe shpërfaq mungesën e kulturës për debat politik. Një gjuhë e tillë, sipas tij, është tregues se nuk po zgjidhen mjetet për të ruajtur apo për të ardhur në pushtet. Po ashtu, me sjellje e tilla partitë politike, sipas Ismet Kryeziut, po rrezikojnë që të tensionojnë gjendjen në ditën e balotazhit, më 1 dhjetor