Zafir Berisha dhe Fatmir Limaj, kanë pirë kafe në Hotel ‘’Theranda” në Prizren. I kontaktuar nga “PrizrenPress”, Berisha tha se me Limajn po pinë kafe miqësore. “Me Limajn jam mik i vjetër dhe nuk është hera e parë që pijë kafe me të”, tha Berisha.

Ai tregoi se me Limajn, rastësisht është takuar në këto momente në “Therandë”. “Rastësisht u takuam dhe po pimë kafe miqësore në mënyrë publike”

Deputeti i Parlamentit të Kosovës Fatmir Limaj, ka deklaruar dje se e ka mirëkuptuar vendimin e Bashkimit Demokratik për koalicion me Lidhjen Demokratike të Kosovës në Prizren.

“E uroj Zafir Berishën për rezultatin e arritur në zgjedhje. Natyrisht, Berisha këtë rezultat e ka arritur në emër të ndryshimit për qeverisje më të mirë për Prizrenin. Prandaj, e mirëkuptoj mikun tim për hapin që ka ndërmarrë. Ai e ka lexuar vullnetin e votuesve të vet për ndryshim. Në fund të fundit, Berisha dhe Bashkimi Demokratik janë ata që e kanë arritur këtë rezultat të respektueshëm në Prizren dhe vendimi është i tyre dhe askujt tjetër. Prandaj, besoj se kur e ka marrë vendimin e ka pas parasysh cila është e mira për Prizrenin”, ka thënë Limaj për “PrizrenPress”.

Policia dhe Prokuroria në Prizren,i  janë përkushtuar punës për  zbardhjen e parregullësive  që janë paraqitur  në zgjedhjet  e 3 nëntorit.

Drejtori i  Policisë , Nexhmi Krasniqi,  ka thënë se  vetëm  dje  janë intervistuar 50 persona . “Personat që janë marrë në pyetje janë nga  loklitetet e ndryshme”,ka thënë Krasniqi pëer “Zërin”.

Edhe kryeprokurori i  Prokurorisë Themelore në Prizren, Sylë Hoxhaj,   ka thënë  se këtyre rasteve  u është dhënë prioritet për hetime të shpejta.”Rasti  më serioz  është hetimi  që po bëhet  ndaj disa personave  për  të cilët dyshohet se kanë ofruar para në këmbim të votës”, ka thënë Hoxhaj. /PrizrenPress.com/

Drejtori i  Urbanizmit në Prizren, Sadik Paçarizi,  ka konfirmuar se intervenimi  që është bërë në Urën e Gurit dhe Arastës  ka qenë illegal. Ai tha se  resori  të cilën e udhëheq,  ka qenë kundër  mënyrës së riparimit të Urës së Arastës  dhe se nuk ka dhën leje për intervenimet e bëra së fundi. “Po ashtu kam qenë kundër  pastrimit  të mureve të lumit dhe heqjes së myshqeve nga sipërfaqet e saj”, ka thënë  Paçarizi për “Zërin”.

Organizata Joqeveritare “EC Ma Ndryshe” ka hulumtuar çështjen e intervenimeve të fundit që janë bërë në ndriçimin e Urës së Gurit dhe riparimin dhe ndriçimin e Urës së Arastës, që të dyja në Qendrën Historike të Prizrenit. Valon Xhabali, koordinator i Programit të Trashëgimisë Kulturore, tha se në bazë të informatës së pranuar nga Drejtoria për Urbanizëm dhe Planifikim Hapësinor intervenimet në këto dy ura janë bërë pa lejen paraprake të këtij dikasteri. “Shërbimi i këtij organi ju informon se sa i përket kërkesës së OJQ-së “EC Ma Ndryshe”, rreth ndriçimit të Urës së Gurit dhe Urës së Arastës nuk është bërë asnjë kërkesë për leje ndërtimi në DUPH. Nuk posedojnë leje ndërtimi”, thuhet në shkresën e DUPH-së.

Ndërsa Instituti për Mbrojtjen e Monumenteve Historike të Prizrenit ka konfirmuar se nuk ka pranuar asnjë kërkesë për pëlqim për intervenim në urat e përmendura dhe si rrjedhojë as nuk ka lëshuar ndonjë pëlqim. Xhabali tha se monitoruesit e organizatës kanë kërkuar sqarime edhe nga Drejtoria e Shërbimeve Publike, përfaqësuesit e së cilës kanë pohuar se DSHP me 11 shtator 2013 ka lëshuar pëlqimin për NSH “Hisar Kosova” për pastrimin e shtratit të Lumëbardhit, rregullimin e mureve mbrojtëse në vendet e dëmtuara dhe ndriçimin e urave në qytet. “Përkohësisht është bërë ndriçimi i urave i cili do qëndrojë deri në festat e fundvitit dhe janë bërë disa riparime të vogla si ngjyrosja e parmakëve, rregullimi i trotuarit në urë, të cilat kanë qenë mjaft të dëmtuar dhe mundë të qëndrojnë deri në rregullimin e urës së re”, thuhet në përgjigjen e DSHP-së, që ka marrë “Ec Ma Ndryshe”.
“Sipas këtyre informatave del se intervenimet respektivisht ndriçimi i Urës së Gurit dhe riparimi dhe ndriçimi i Urës së Arastës janë bërë pa lejen e DUPH-së dhe pa pëlqimin e IMMH-së, që përbën shkelje të drejtpërdrejtë të dispozitave të Ligjit për Qendrën Historike të Prizrenit”

Neni 9 i Ligjit për Qendrën Historike të Prizrenit që definon mbrojtjen nga dëmtimi i monumenteve të trashëgimisë kulturore, në paragrafin 1 thotë se “personi fizik dhe juridik, i cili bën ndërtimin, rrënimin, ndërhyrjet në infrastrukturë apo çfarëdo aktivitet tjetër, duhet të ndërmarrë paraprakisht të gjitha masat e nevojshme për të mbrojtur objektin e trashëgimisë kulturore dhe fetare nga shkaktimi i çfarëdo dëmi të mundshëm, gjatë kryerjes së këtyre aktiviteteve” derisa paragrafi 2 thekson se “masat nga paragrafi 1 i këtij neni duhet të ndërmerren në koordinim me Drejtorinë për Urbanizëm dhe Institutin për Mbrojtjen e Monumenteve të Prizrenit”.Gjithashtu ky ligj, përcakton se për çdo aktivitet në Qendrën Historike duhet të konsultohen Instituti për Mbrojtjen e Monumenteve të Prizrenit dhe Këshilli për Trashëgimi Kulturore i Qendrës Historike dhe se pas pëlqimeve të tyre Drejtoria e Urbanizmit lëshon lejen përkatëse ose e refuzon duke u bazuar në Planin e konservimit dhe ligjet në fuqi. Këto procedura nuk janë përfillur në rastin e Urës së Gurit dhe të Arastës.

“Në bazë të këtyre të gjeturave “EC Ma Ndryshe” konsideron se organet komunale duhet të angazhohen më shumë në respektimin e Ligjit të Qendrës Historike të Prizrenit dhe ruajtjen e vlerave në këtë zonë të mbrojtur”, tha Xhabali.

““EC Ma Ndryshe” është mirënjohëse ndaj donacioneve të shteteve mike dhe inkurajon largimin e barrierave procedurale për zbatimin e projekteve të mirëfillta, mirëpo në të njëjtën kohë përkujton se në këtë rast kemi të bëjmë me një zonë të mbrojtur ku aplikohen masa të veçanta të ruajtjes e konservimit të objekteve të trashëgimisë. Ne i bëjmë thirrje komunës së Prizrenit që të rris mbikëqyrjen inspektuese në këtë zonë, në mënyrë që praktikat e realizimit të projekteve pa lejet përkatëse të institucioneve përgjegjëse të mos përsëriten më, me qëllim që të kemi sundim të ligjit dhe mbrojtje të vlerave të trashëgimisë kulturore në qendër të Prizrenit”.

“EC Ma Ndryshe” në korrik ka nisur zbatimin e projektit “Urbanizmi i Prizrenit nën vëzhgim të përhershëm”, përkrahur financiarisht nga Fondacioni i Kosovës për Shoqëri të Hapur (KFOS). Nevoja për mbikëqyrjen e zhvillimeve në sektorin e urbanizimit ka rrjedhë si pasojë e zhvillimeve të shumta negative gjatë periudhës së pasluftës dhe tranzicionit që janë manifestuar me degradimin urban dhe planifikimin e pa-balancuar hapësinor. Projekti do të vazhdoj me monitorimin dhe publikimin e të gjeturave në sektorin e urbanizimit dhe planifikimit hapësinor, sikurse edhe me adresimin e përgjegjësisë institucionale. /PrizrenPress.com/

Kuvendi i Kosovës sot i është kthyer normalitetit, duke mbajtur seancë të rregullt plenare pas më shumë se një muaji bllokade. Në deklarimet jashtë rendit të ditës, deputetët e partive në pushtet dhe atyre të opozitë kanë shprehur shqetësimet për zhvillimet e fundit në Kosovë.
Fillimisht nënkryetari i Kuvendit nga radhët e Lëvizjes Vetëvendosje!, Glauk Konjufca ka kritikuar kryeministrin, Hashim Thaçi për takimet në Bruksel me kryeministrin serb, Ivica Daçiq, pavarësisht se ky i fundit ka deklaruar “nëse në Mitrovicën e veriut zgjidhet kryetar komune një shqiptar, atëherë atje do të ketë konflikt të armatosur”.

Edhe deputeti i LDK-së, Arben Gashi e ka kritikuar kryeministrin Thaçi për mungesë të planit operativ për organizimin e zgjedhjeve në veri.
Ndërkaq, deputetja Xhevahire Izmaku në emër të PDK-së, ka thënë se EULEX-i, padrejtësisht është duke e akuzuar “Grupin e Drenicës”.
Kuvendi i Kosovës është duke i vazhduar punimet me shqyrtimin e disa projektligjeve në lexim të parë.

Kuvendi i Kosovës sot do të vazhdojë me seancën e radhës, ku pritet të shqyrtohet projektligji për plotësimin dhe ndryshimin e Ligjit për deklarimin, prejardhjen dhe kontrollin e pasurisë së zyrtarëve të lartë publik dhe deklarimin, prejardhjen dhe kontrollin e dhuratave për të gjithë personat zyrtarë. Gjatë kësaj seance e cila është zhbllokuar me përkrahjen e gjithë grupeve parlamentare, pritet të shqyrtohet raporti vjetor të Radiotelevizionit të Kosovës për vitin 2012, raporti vjetor i Auditimit për vitin 2012.

Po ashtu, pritet të shqyrtohet projektligji për plotësimin dhe ndryshimin e Ligjit për Mbrojtjen e Konkurrencës, projektligji për Agjencinë e Menaxhimit Emergjent, projektligji për plotësimin dhe ndryshimin e Ligjit për parandalimin e konfliktit të interesit në ushtrimin e funksionit publik, si dhe projektligji për aktet normative.

Përveç, shqyrtimeve, legjislacioni pritet të formojë edhe Komisionin Ad-hoc për përzgjedhjen e dy anëtarëve të Komisionit të Pavarur për Media, komisionin Ad-hoc për përzgjedhjen e kandidatëve për anëtarë të Këshillit të Pavarur Mbikëqyrës të Shërbimit Civil të Kosovës,si dhe pritet të bëhet emërimi i anëtarëve të Organit Përzgjedhës të Pavarur për zgjedhjen e kryesuesit dhe anëtarëvetë Organit Shqyrtues të Prokurimit, emërimi i anëtarëve të Bordit të Agjencisë Kosovare të Pronës dheemërimi i dy anëtarëve të Bordit të RTK-së.

Ndryshe, me propozimin e kryetarit të Kuvendit të Kosovës, Jakup Krasniqi, legjislativi i vendit ka zhbllokuar punën përkohësisht, pasi ishte bllokuar si pasoj e mospajtimeve mes pozitës dhe opozitës rreth procesit të privatizimit të 75 për qind të aksioneve të PTK-së. Propozimin e Krasniqin e kanë përkrahur edhe shefat e grupeve parlamentare, megjithatë, si pozita ashtu edhe opozita kanë theksuar se nuk do të lëvizin nga qëndrimet e tyre që i kanë pasur deri me tani rreth privatizimit të PTK-së./Kosovapress/