Komandanti i përgjithshëm i Ushtrisë Çlirimtare të Kosovës, Sylejman Selimi, është akuzuar të mërkurën nga Prokuroria për dhunimin seksual të dy vajzave shqiptare nga Mitrovica gjatë luftës.

Prokurori special, Mauricio Salustro, ka ngritur aktakuzë kundër Selimit, Ismet Haxhës, Nexhat Qubrelit dhe Shefki Hysenit për krime lufte kundër popullatës civile. Eulex-i nuk ka dhënë më shumë detaje por Koha Ditore ka mësuar identitetin e të akuzuarve.

“Sot, një prokuror ndërkombëtar nga Zyra e Prokurorisë Speciale e Kosovës ka ngritur aktakuzë kundër katër të pandehurve në Gjykatën Themelore të Mitrovicës”, thuhet në një komunikatë të EULEX-it.

“Të pandehurit akuzohen për shkelje kriminale të krimeve të luftës ndaj popullatës civile, përfshirë këtu torturimin dhe përdhunimin e dy civilëve shqiptarë, krime këto që pretendohet të jenë kryer në Vaganicë dhe Likoc gjatë viteve 1998- 1999. Rasti po hetohet nga prokurori ndërkombëtar i Zyrës së Prokurorisë Speciale të Kosovës”, thuhet në komunikatë.
Në komunikatën në gjuhën shqipe thuhet se aktakuza ka të bëjë edhe me dhunim, porn ë atë anglisht dhe serbisht asktësohet se bëhet f jalë për dhunimin seksual të dy motrave nga Mitrovica.

Nëxhat Qubreli, Ismet Haxha dhe Shefki Hyseni, akuzohen se i kanë arrestuar ato, i kanë torturuar dhe rrahur për t’i dërguar në Likoc tek Sylejman Selimi. Ndërsa ish komandanti i UÇK-së akuzohet se gjatë një jave i ka dhunuar ato seksualisht.

Avokati i Selimit ka thënë se nuk është i informuar për ngritje të aktakuzës kundër klientit të tij./Koha Ditore/

Prokuroria e Kosovës i ka intervistuar tre të dyshuarit për keqpërdorimin e votave gjatë numërimit në Qendrën e Numërimit dhe të Rezultateve.

Por, pas intervistimit, Prokuroria ka propozuar që tre të dyshuarit të mbrohen në liri.

“Të dyshuarit janë intervistuar nga prokurori, i cili pas mbledhjes së provave të gjertanishme ka kërkuar që të dyshuarit të mbrohen në liri, ndërsa hetimet lidhur me këtë rast janë duke vazhduar”, thuhet në njoftimin e Prokurorisë.

Në këtë njoftim, Prokuroria ka dhënë disa detaje se pse janë ndaluar tre të dyshuarit që kanë punuar në QNR.

“Pas dyshimeve të bazuara se tre zyrtarë të Qendrës së Numërimit të Votave kanë falsifikuar rezultatet e votimit gjatë numërimit të votave, duke kryer veprën penale “Falsifikimi i rezultateve të votimit”, nga neni 219 i Kodit Penal të Republikës së Kosovës, Prokurori i Shtetit nga Prokuroria Themelore në Prishtinë, në bashkëpunim me Policinë e Republikës së Kosovës, kanë filluar hetime lidhur me këtë rast”.

“Prokurorët e Shtetit në bashkëpunim të ngushtë me Policinë e Kosovës kanë vepruar dhe do të veprojnë me urgjencë ndaj të gjitha rasteve që paraqiten në lidhje me veprat penale kundër të drejtave të votimit, si dhe do të arrestojnë dhe ndalojnë secilin person që keqpërdor ose tenton të manipuloj votën”.

Ministri i Punëve të Jashtme i Kosovës, Enver Hoxhaj, gjatë qëndrimit në Bruksel ka zhvilluar sot një takim me Komisionarin Evropian për Zgjerim dhe Politika Fqinjësore Evropiane, Stefan Fule.

Gjatë takimit, ministri Hoxhaj e ka falënderuar komisionarin Füle për hapjen e negociatave për Marrëveshjen e Stabilizim Asociimit, sa i takon procesit negociues dhe agjendës kohore të negocimit.

Hoxhaj ka theksuar rëndësinë e madhe që ka për Kosovën ky proces, duke qenë se është marrëdhënie kontrakuale ndërmjet Kosovës dhe Bashkimit Evropian dhe një instrument i rëndësishëm për ndërtimin e Kosovës evropiane si dhe për reformimin e vendit.

“Pa dyshim se ky është hapi i parë i pakthyeshëm i anëtarësimit tonë në BE”, tha Hoxhaj, me këtë rast.

Komisionari Evropian për Zgjerim dhe Politika Fqinjësore Evropiane, Stefan Fule, e ka përgëzuar ministrin Hoxhaj për mbarëvajtjen e zgjedhjeve lokale të 3 nëntorit, si dhe për hapjen e negociatave për Marrëveshjen e Stabilizim Asociimit.

Komisionari Fule po ashtu ka rikonfirmuar vendosmërinë e Komisionit Evropian për të mbështetur Kosovën në rrugën e saj evropiane.

Gjatë takimit, ministri Hoxhaj dhe komisionari Fule kanë biseduar edhe për normalizimin e marrëdhënieve ndërmjet Kosovës dhe Serbisë dhe për implementimin e marrëveshjeve të arritura, duke e konsideruar si faktor kyç në transformimin e vendit edhe në kuptimin e integrimit edhe relacioneve ndërmjet Kosovës dhe Serbisë.

Hoxhaj dhe Fule po ashtu kanë folur për anëtarësimin e Kosovës në organizata të ndryshme rajonale, duke u pajtuar se pa Kosovën bashkëpunimi rajonal nuk është i plotë, duke qenë se ky bashkëpunim është shumë i rëndësishëm për të ardhmen e vendit dhe rajonit. /PrizrenPress.com/

Dega e LDK-së në Rahovec ka arritur marrëveshje për bashkëqeverisje në këtë komunë, duke përkrahur kështu kandidatin e AAK-së, Smajl Latifaj në balotazh më 1 dhjetor.

AAK përmes një kumtese njofton se marrëveshja është rezultat i një debati të kujdesshëm, duke marrë për bazë interesin e qytetarëve të komunës së Rahovecit.

“Sipas marrëveshjes partnerët do të bashkojnë potencialet intelektuale, njerëzore e materiale në shërbim të një qeverisjeje më të mirë, të mbështetur në vendimmarrje të ligjshme, transparente dhe efikase. AAK dhe LDK besojnë fuqishëm në fitore bindëse në zgjedhjet e 1 dhjetorit dhe ju bëjnë thirrje qytetarëve të komunës së Rahovecit që ta mbështesin këtë marrëveshje, sepse është alternativa më e mirë për zhvillim më të hovshëm ekonomik të komunës së Rahovecit, si dhe për përmirësim të gjendjes sociale të të gjithë qytetarëve të kësaj komune pa dallim”, thuhet në kumtesë.

Në aktin e arritjes së marrëveshjes ishte i pranishëm edhe lideri i AAK-së, Ramush Haradinaj./PrizrenPress.com/

Ministri i Mjedisit dhe Planifikimit Hapësinor, Dardan Gashi, ka marrë vendim për rrënimin e të gjitha objekteve pa leje brenda Planit rregullues urban – Prevalla.

MMPH njofton opinionin publik se janë dhjetëra objekte pa leje të ndërtuara brenda Fshatit Turistik në Prevallë dhe gjatë javës, pronarët e tyre do të urdhërohen që brenda një afati 15 ditor të bëjnë rrënimin e tyre ose MMPH do të veprojë njësojë sikurse në aksionin e rrënimit të “Kampingut ilegal Veror”. /PrizrenPress.com/