Në Qendrën e Paraburgimit në Prizren, ka filluar votimi rreth orës 13.30 dhe ka përfunduar në ora 14.10.

“Komisioni katër anëtarësh nga KKZ-ja në Prizren ka sjellur listën vetëm për të dënuarit dhe të paraburgosurit nga Komuna e Prizrenit, që do të thotë se të burgosurit tjerë nuk janë lënë të votojnë, ngase nuk kanë qenë në lsitën e KKZ-s së Prizrenit, përkatësishtë Komunës së Prizrenit”, tha Bashkim Kajdomçaj, koordinator i KMDLNJ-së.

Ndërkaq, sipas menagjmentit të Qendrës së Paraburgimit në Prizren ditën kur votohej (dt.03.11.2013) në këtë institucion ishin 89 të burgosur (nga ta 77 në paraburgim e 12 të dënuar).

Qendra Rajonale e KMDLNJ-së në Prizren me këtë rast proteston tek KKZ-ja e përmes saj edhe te KQZ-ja që nuk ka sjellur listat nga komunat tjera prej nga vijnë të burgosurit.

“E drejta për të votuar është e drejtë e garantuar me kushtetutë. Kjo të dielën iu mohua në Prizren 83 të burgosurve.Kjo është shkelje që nuk ka guxuar të ndodhë”, tha Kajdomçaj.

Këshilli për Mbrojtjen e të Drejtave e të Lirive të Njeriut bënë monitorimin e burgjeve, qendrave të mbajtjes, qendrave të ndalimit dhe të shtëpive korrektuese, ku sot pritet të ketë votime./PrizrenPress.com/

Lëvizja Vetëvendosje! i falënderon të gjithë qytetarët që në të gjitha komunat e Kosovës kanë dalë të votojnë në përqindje të mira e të larta, deri në orën 15:00. Sipas VV-së, marrja pjesë në zgjedhje e bën më të vështirë misionin e atyre që dëshirojnë të manipulojnë rezultatet, kështu që është detyrë e secilit qytetar të ushtrojë të drejtën e tij me përgjegjësi individuale, por edhe me përgjegjësi për të ardhmen tonë të përbashkët.

“Gjer më tash procesi i votimit është nën kontroll, dhe të gjithë vëzhguesit dhe komisionerët e Lëvizjes Vetëvendosje! janë në nivelin e duhur për të mbrojtur votën e qytetarit, dhe për ta lehtësuar procesin e votimit sipas kuadrit ligjor.

Disa forca politike dhe mediet pranë tyre, për interesa partiake, po bëjnë çmos që të dekurajojnë votuesit, duke inskenuar vonesa të panevojshme nëpër qendrat e votimit. Por ne po e garantojmë mbarëvajtjen e procesit”, thuhet në kumtesën e VV-së.

VV-ja i fton ata që ende nuk kanë votuar që të dalin të ushtrojnë këtë të drejtë, në të gjitha vendvotimet, gjer në orën 19:00.

“Vota e secilit është e vlefshme, vota e secilit është e nevojshme, për të përcaktuar qartë se cili do të jetë drejtimi që do të marrë Kosova në të gjithë komunat, qytetet dhe fshatrat e saj. Ndryshimi është shumë pranë, pjesëmarrja e qytetarëve e bën atë të mundur”./PrizrenPress.com/

Pjesëmarrja në zgjedhjet lokale në Kosovë, deri në orën 11, ka arritur deri në 12 % në gjithë territorin e Kosovës, ka njoftuar Komisioni Qendror i Zgjedhjeve.

Një vëmendje e posaçme po i kushtohet situatës në veri, prej nga raportohet për disa pengesa. Në veri të Mitrovicës është shënuar dalja prej 2.9 %.

Kryetarja e Komisionit Qendror të Zgjedhjeve, Valdete Daka tha për Radion Evropa e Lirë se disa grupe të caktuara në veri, “nuk janë duke lejuar qytetarët që lirshëm të shprehin vullnetin e tyre qytetar për të votuar”.

Daka tha se “para dhe gjatë fillimit të hapjes së vendvotimeve komisionarë janë penguar në punën e tyre”.

“Për këtë gjendje janë informuar edhe Policia e Kosovës edhe institucionet e tjera relevante. Mirëpo, do ta njoftojmë edhe Bashkimin Evropian, edhe misionin e OSBE-së, edhe pse OSBE-ja është e informuar, sepse është në pjesën veriore”, u shpreh ajo, transmeton REL.

Zonja Daka tha se me gjithë ato reagime nga grupe të caktuara, komisionarët janë duke qënderuar në vendvotime.

“Ata janë aty në këshillat e vendvotimeve, janë brenda, janë duke punuar dhe do ta shohim më tutje situatëna”, deklaroi Daka.

Partia Demokratike e Kosovës në Prizren, ka demantuar deklaratat e LDK-së. Zëdhënësi Samir Hoxha, tha se nuk është e vërtet se kandidatët e PDK-së po bëjën presion ndaj votuesve në lagjen “Ortakoll” dhe në fshatin Atmaxhë.

“Në respekt të qytetarëve dhe partive politike, theksojmë së asnjë veprimtar dhe kandidat i yni absolutisht nuk bëjnë presion në asnjë qytetar. Në këtë kontekst pas analizimit të deklaratës së LDK-së, na rezulton se kjo parti është duke dashur që edhe ditën e zgjedhjeve të keqinformojë dhe manipulojë opinionin publik vetëm e vetëm për të denigruar procesin e zgjedhjeve, i cili deri në këto momente sipas nesh është duke u zhvilluar i qetë dhe në frymë demokratike”, tha Hoxha.

Sipas tij, kandidati i LDK-së, Muharrem Gashi në Atmaxhë sot rreth një orë ka qëndruar në oborin dhe lokalet e Qendrës së votimit në Atmaxhë, duke u përpjekur që të orientojë qytetarët për kë të votojnë.

“Në këtë kontekst edhe Bashkimi Demokratik përmes tendencës manipuluese që kinse afishet e kandidatit të PDK-së sot rishtazi janë vendosur afër një qendre të votimit po manipulon opinionin publik, meqë ato janë të vendosur ditë me parë në kohën e fushatës parazgjedhore”

“ Dega e Partisë Demokratike vlerëson lartë kontributin e qytetarëve për të votuar dhe i fton publikisht që gjatë votimit të tregojnë kulturë të lartë politike e publike si e vetmja alternativë për proceset integruese që e presin shtetin tonë. Ftojmë të gjitha partitë politike në komunën tonë që të reflektojnë në dobi të qytetarëve dhe të heqin dorë nga propaganda manipuluese”./PrizrenPress.com/