Kryetari i Lidhjes Demokratike të Kosovës (LDK), Isa Mustafa, ka thënë të enjten, në përmbyllje të fushatës në Therandë, se qeverisja lokale në këtë qytet nuk fitohet nga ata që tallen me qytetarët, por do të fitohet nga Sali Asllanaj, i cili me punë ka dëshmuar se mund të bëjë më të mirën për qytetarët e Therandës.

“Unë ju garantoj se me dr. Sali Asllanaj, pushteti dhe qeverisja e Therandës do të jetë qeverisje për qytetarët, pa marrë parasysh cilit subjekt politik i takojnë. Qytetarët do t’ju thonë – jo atyre që tallen me ta, por do t’ju thonë – jo edhe atyre që shohin ëndrra se pa punë do ta qeverisin Therandën. Njerëzit e kësaj treve janë njerëz punëtorë, janë njerëz familjarë, janë njerëz që çdo gjë e kanë krijuar me djersën dhe punën e tyre, prandaj ju e meritoni një qeverisje, para së gjithash që ju respekton dhe kjo qeverisje do të jetë qeverisje e LDK-së, do të jetë Sali Asllanaj, që me ju bashkërisht do të punojë, dhe ju e meritoni fitoren”, ka thënë Mustafa.

Ai ka shtuar se asnjë punë nuk bëhet pa entuziazëm, nuk bëhet pa motivim, nuk bëhet pa vullnet, dhe ne që të tria i ka LDK-ja, e ka entuziazmin e të rinjve, e ka motivimin e gjithë qytetarëve, e ka vullnetin tonë të përbashkët, për ta arritur fitoren e madhe më 3 nëntor.
“Gjithë ne e dëshirojmë një Therandë më të zhvilluar dhe askush nuk mund të na ndalë që këtë ta realizojmë. Gjithë ne e dëshirojmë një Therandë, e cila ofron një arsimim më të mirë për fëmijët tanë dhe askush nuk ka të drejtë të thotë se unë dua ta marrë pushtetin dhe ta mbajë ashtu siç dëshirojë unë”, ka thënë kreu i LDK-së.
Kryetari Mustafa ka shtuar se kandidati i LDK-së ofron zgjidhje për një Therandë të zhvilluar, ofron zgjidhje për një Therandë demokratike, një komunë në të cilën bizneset do të zhvillohen në mënyrë të pavarur dhe një Therandë në të cilën familjet do të gëzojë mirëqenien e saj.
Kandidati i LDK-së, për kryetar të Therandës, Sali Asllanaj, ka thënë se qytetarët e Therandës e kanë kuptuar se programi i LDK-së është një ofertë shumë cilësore, shumë konkrete e cila bazohet në mundësitë që do të ketë buxheti i komunës.

“Programi i LDK-së në rend të parë ka zhvillimin ekonomik, gjithmonë duke pretenduar që edhe qeverisja qendrore të jetë e LDK-së, sepse një politikë zhvillimore duhet ta krijojë qeveria qendrore, kurse komunat do të jenë plotësuese të fuqishme zhvillimit të vendit”, ka thënë Asllanaj.

Ai ka shtuar se vetëm nëse arrijmë ta zhvillojmë biznesin dhe nëse arrijmë të krijojmë vende të reja pune për këta të rinj, më besoni se ja kemi arritur qëllimit dhe se LDK-ja mund të krenohet me punët e mëdha që ka bërë.
“Rinia do të ketë privilegjet më të mëdha në këtë komunë, andaj ju ftoj që të votoni LDK-në dhe ta përkrahin programin e LDK-së, në mënyrë që perspektiva e tyre të jetë më e fuqishme.
Rritje 20% e buxhetit do të ketë për subvencionimin e bujqësisë, dhe kjo do të jetë një ndihmesë e madhe për të gjithë bujqit. Do të investojmë dhe në lëmin e shëndetësisë.

Shpresojmë që qeveria jonë qendrore në të ardhmen do ta ketë shëndetësinë dhe arsimin, sepse janë dy lëmi të cilat kërkuan më shumë kujdes”, ka thënë kandidati i LDK-së për Therandën

Qendra e Lëvizjes Vetëvenmdosje! në Malishevë në një tubim në fshatin Bellanicë ka shpalosur alternativen qeverisëse për Komunën e Malishevës. Kryetari i VV-së, Albin Kurti, tha se Malishevën e ndajnë edhe pak ditë nga fitorja e Vetëvendosjes, që është edhe fitorja e gjithsecilit qytetarë të Malishevës.

“Me Lëvizjen Vetëvendosje! dhe kandidatin Alban Krasniqi, do të kthehet drejtësia për shumë padrejtësi, Malisheva do të ketë një kryetar për qytetarë, i cili nuk i ka borxh askujt, por do t’ju shërbejë të gjithëve pa dallim”, tha Kurti, duke shtuar ai theksoi se Vetëvendosje! dallon nga subjektet tjera sepse rruga që kemi zgjedhur ne dallon nga rruga që kanë marrë subjektet tjera, të gjitha së bashku.

Më tej, ai tha se në Bellanicë, sikurse edhe në shume vende tjera të Kosovës, privatizimi i mbrapsht që e bënë PDK, LDK, AAK e AKR, ka shkaktuar shumë humbje e padrejtësi.

“Por ne bashkë do të bëjmë që padrejtësitë të marrin zgjidhje, e atyre që i kanë shkaktuar këto dëme t’ju tregojmë me votë se ku duhet të jenë. Bashke më 3 nëntor do t’i zhveshim nga pushteti këta politikan për t’i veshur me rrobat e burgut”, tha Kurti.

Kurse, kandidati për kryetar të Malishevës, Alban Krasniqi, tha se mbështetja në Bellanicë dhe në të gjitha fshatrat që kemi shpalosur Alternativen, tashmë tregon se projekti ynë për transparencë, zhvillim lokal, punësim, arsim e shëndetësi cilësore po fillon.

“Ka ardhur koha që me 3 nëntor frikën ta kthejmë në guxim, varfërinë ta kthejmë në zhvillim ekonomik dhe mirëqenie sociale, krimin dhe korrupsionin ta çrrënjosim, dhe ta fillojmë bashkëqeverisjen e Komunës, në të cilën do të mbizotëroj drejtësia dhe barazia, transparenca dhe llogaridhënia, pjesëmarrja aktive e qytetarëve dhe profesionalizmi”, tha Krasniqi.

Ndërkaq, bartësi i listës për Ssamblenë Komunale, Muhamet Bytyçi, tha se mbështetja e Vetëvendosjes në Bellanicë është shembulli me i mire se si qytetarët duhet të angazhohen së bashku kundër keqqeverisjes që vodhi vota për të vjedhur prona.

“Me votën tuaj me 3 nëntor do të ndalim degradimin dhe do të rikthejmë besimin në Komunë dhe në qeverisje. Alban Krasniqi është njeriu që ka dijen dhe guximin për ta ndryshuar për të mirë Malishevën, duke e bërë një qytet të zhvilluar, ku njerëzit jetojnë me punë e mirëqenie”, tha Bytyçi. /PrizrenPress.com/

Partia Demokartike e e Kosovës(PDK) në Prizren,ka falënderuar mediat për korrektësin që kanë treguar gjatë fushatës zgjedhore në informimin e qytetarëve. Zëdhënësi i PDK-së, Samir Hoxha tha se subjekti i tij politik  dëshiron që procesi zgjedhor të kalojë në mënyrë  dinjitoze.

“Shfrytëzoj rastin t’i falënderoj qytetarët e  Komunës së Prizrenit, që gjatë kësaj fushate parazgjedhore, kanë treguar se Prizreni dhe qytetarët e saj me sjelljet qytetëruese  dhe të dinjitetshme kanë dëshmuar se janë të gatshëm për rrugëtimin drejt Bashkimit Evropian”, tha Hoxha.  “Me këtë rast dua që t’iu bëj thirrje të gjithë qytetarëve të Komunës së Prizrenit, që me 3 nëntor  të dalin masovikisht në zgjedhje dhe të shfrytëzojnë të drejtën e tyre kushtetuese për  të zgjedhur të preferuarit e tyre”.

Hoxha tha se PDK-ja ka bërë fushatë të qetë dhe dinjitoze, duke i ofruar qytetarëve  programin e saj me ofertën më të mirë qeverisëse për ta vazhduar rrugën drejtë zhvillimit dhe integrimit.

“Andaj i ftojmë të gjithë simpatizantët e PDK-së që të premten me 01 nëntor të marrin pjesë masivikisht në përmbylljen e fushtës parazgjedhore të PDK-së, e cila do të mbahet në qendrën sportive “Sezai Surroi”në ora 14:00 . Ardhja juaj në mënyrë dinjitoze dhe masovike do të dëshmon edhe një herë për fitorën e sigurt të PDK-së dhe për përcaktimin që Prizreni të jetë qytet evropian me një civilizim europian”/PrizrenPress.com/

Kandidati i koalicionit AAK-LDD për kryetar të Prizrenit Lulzim Kabashi ka vizituar tregun në “ Qylhan “,  ku është takuar me tregtarë, të cilët tregtojnë mallëra të ndryshme. Ai nga afër  u njoftua me hallet dhe problemet me të cilat ata po ballafaqohen.

Me këtë rast, tregtarët me të cilët bashkëbisedoi Kabashi, shprehën pakënaqësi të ndryshme . Ata thanë se po punojnë për të siguruar kafshatën e gojës.

Tregtarët kërkuan nga Kabashi që gjatë mandatit të tij qeverisës të bëhet ulja e tatimeve, dhe qendrat e mëdha tregtare të vendosen diku në periferi.Ata po ashtu kërkuan nga Kabashi që të hapen vende të reja të punës./PrizrenPress.com/