Të enjten, rektori i deritashëm i Univesitetit të Prizrenit “Ukshin Hoti”, Prof. Dr. Mazllum Baraliu i dorëzoi detyrën Prof. Dr. Zahadin Shemsedinit, i cili nga data 1 nëntor 2013 do të merr detyrën e u. d. të Rektorit të UPZ-së.
Baraliu theksoi se që nga marrja e detyrës së rektorit, më 1 tetor 2011, në UPZ janë bërë punë të mëdha, si në aspektin e zgjerimit të infrastrukturës me standarde më bashkëkohore, ashtu edhe në rritjen e cilësisë.
“Pos kësaj, i gjithë angazhimi im, që nga marrja e detyrës së rektorit, ka qenë që të vendosim një kulturë të punës së ndershme dhe me profesionalizëm në Universitetin e Prizrenit, si te stafi akademik, te shërbimet profesionale të universitetit dhe te çdo punonjës tjetër. Gjithë këto përpjekje dhe arritje janë bërë me qëllim që vlerat e larta profesionale dhe etiko-morale të bëhen një e mirë e përbashkët e të gjithë personelit akademik dhe administrativ dhe çdo punonjësi. Kjo ka ndikuar drejtpërdrejtë në imazhin e universitetit, dhe besoj që në masë të madhe e kemi arritur pikësynimin tonë. Porosia ime për secilin prej jush është që t’i ruani këto vlera me përkushtim të denjë”, tha Baraliu.
Ai shtoi se mbetet detyrë e secilit punonjës të universitetit dhe secilit menaxhment që vjen që të punojë pa reshtur për çuarjen e këtij universiteti përpara.
Ndërkaq, u. d. Rektori i UPZ-së Prof. Dr. Zahadin Shemsedini, falënderoi për punën e deritashme Baraliun, dhe theksoi se do të punoj pa reshtur që ky universitet të shkon përpara./PrizrenPress.com/