Përderisa subjektet politike tashmë janë në vlugun më të madh të punëve për t’u paraqitur sa më mirë para elektoratit të tyre, ndërsa në zyrat e tyre ka filluar gjallëria, në Komisionin komunal zgjedhor (KKZ) po punohet rreth organizimit sa më të mirë teknik të këtyre zgjedhjeve, në mënyrë që të shmangen të gjitha parregullësitë dhe procesi të jetë i pranueshëm për të gjithë.

Anëtar i KKZ-së në Prizren, Ilir Baldedaj konfirmoi për Zërin se për herë të parë në zgjedhjet e sivjetme do të dalin edhe 13 mijë persona, të cilët për dallim nga zgjedhjet e fundit tashmë kanë fituar të drejtën për të votuar, pasi kanë mbushur moshën e duhur prej 18 vitesh. Sipas tij janë rreth tetë mijë të rinj që vetëm këtë vit kanë arritur moshën, e cila i rreshton ata krahas zgjedhësve të tjerë në vend.

Në komunën e Prizrenit të drejtë vote sivjet kanë 158.054 votues, të cilët votën e tyre mund ta hedhin në 209 vendvotime, sa do të jenë të hapura ditën e zgjedhjeve.

“Kësaj radhe për gjashtë është shtuar numri i qendrave të reja votuese, duke ngritur kështu numrin e tyre në 71 sosh, ndërsa është shtuar qendra e re ajo në Kabash të Hasit, në fshatin Atmaxhë, në Serbicë, pastaj ajo në Lokvicë të rajonit të Sharrit, etj”, tha Baldedaj.

Zyrtarët thanë se në një vendvotim do të votojnë 950 persona me të drejtë vote.

Ndërkaq, ajo që vlen të përmendet si mangësi e deritashme është mungesa e informimit të votuesve. Kjo si duket është parë edhe gjatë periudhës së konfirmimit të vendvotimit, kur nga komuna e Prizrenit vetëm 457 persona kanë bërë ndërrimin e vendvotimit.

Baldedaj, tha se kampanja është bërë vetëm në nivel qendror dhe jo edhe në mediumet lokale.

Në KKZ-në e Prizrenit tashmë po kryhen procedurat për certifikim të komisionerëve dhe më pas pritet fillimi i trajnimit të tyre.

Në anën tjetër llogaritet që përafërsisht rreth 560 persona nga subjekte të ndryshme shqiptare, boshnjake, turke, serbe dhe ato të komunitetit RAE janë futur në konkurrencë për të fituar një ulëse në organin më të lartë të Prizrenit, përbërja e të cilit do të ketë 41 vende, aq sa pati edhe në mandatin e mëparshëm.

Paralajmërohen masa të rrepta ndaj keqpërdoruesve të mundshëm të votës

Si në KKZ ashtu edhe në Prokurorinë Themelore (PTH) në Prizren për këto zgjedhje paralajmëruan masa shumë më rigoroze ndaj keqpërdoruesve të mundshëm të votës, shkruan Zëri.

Kryeprokurori i PTH-së Sylë Hoxha, konfirmoi se sivjet janë shumë më të përgatitur se herëve tjera për mbikëqyrjen e situatës, ndërsa ditën e zgjedhjeve në Prizren do të kujdestarojnë dy prokurorë, të angazhuar enkas ndaj rasteve të keqpërdoruesve të mundshëm të votës, ndërsa nga një do të jetë nëpër komunat më të vogla si në Suharekë, Rahovec, Sharr (ish Dragash) e Malishevë.

Xhevdet Elshani, njëri nga gjykatësit kujdestar ditën e zgjedhjeve, në kuadër të Gjykatës Themelore në Prizren, paralajmëroi personat e angazhuar në mbarëvajtjen e procesit zgjedhor të jenë të vëmendshëm dhe serioz duke ditur çfarë bëjnë e nënshkruajnë, në mënyrë që të mos përballën me drejtësinë.

Sipas tij, për të tilla veprime në Prizren tashmë janë dënuar gjashtë persona të angazhuar në zgjedhjet e fundit, katër prej të cilëve me burgim, përderisa dy të tjerëve u është shqiptuar masa e dënimit me kusht./zëri/

Lideri i Lëvizjes Vetëvendosje! Albin Kurti, vlerësoi se qyteti i Prizrenit është kryeqyteti i gjithë shqiptarisë. Sipas tij, ky qytet është lënë pas dore në vitet e pasluftës

“Prizreni nuk është vetëm qyteti i dytë më i madh i Kosovës, por edhe kryeqyteti i gjithë shqiptarisë, i cili është lënë pas dore këto vitet e pasluftës. Ne nuk kemi nevojë të shpikim gjëra të reja, por t’i rifunksionalizojmë ato që janë ngelizhuar vazhdimisht nga qeveria qendrore dhe lokale: indistrinë, zejtarinë dhe bujqësinë”.

Kurti tha se premtimet e rrejshme të pushtetarëve janë joreale në shifra dhe aspak përmbajtësore. “Këtu tregojnë keqpërdorimin e taksave të qytetarëve të Prizrenit, të cilat, nëpërmjet manipulimit në tendera, do t’u kalojnë pushtetarëve. Milionat e premtuara nuk janë të kryeministrit, por paratë tuaja. Të pasurohesh nga politika është kriminale. Një pushtet që nuk po e gjykon as drejtësia, le ta dënojë populli”

Ai kërkoi nga qytetarët që me 3 nëntor të votojnë kandidatin e VV-së për kryetar të Prizrenin, Arbër Rexhaj. ”Unë ju bëj thirrje që të votoni jo vetëm për Arbërin, por edhe për kanditatët për Asamblenë Komunale në mënyrë që Arbëri ta ketë mbështetjen e mjaftueshme për të demokratizuar pushtetin lokal”, tha Kurti.

Lëvizja Vetëvendosje! ka mbajtur tubim publik me banorët e lagjes “Ortakoll” në Prizren. Kandidati për kryetar të Prizrenit, Arbër Rexhaj tha se në tre vjet pjesëmarrje brenda institucioneve qendrore, Lëvizja Vetëvendosje! ka qenë opozita e vetme, e cila mbron të drejtën e qytetarëve të Kosovës me çdo kusht.

“Në këto zgjedhje lokale ne garojmë me listën më të re, më të mirë dhe me alternativën më të duhur për Prizrenin. Me kanditatët nga shtresat e ndryshme shoqërore, ne jemi ajo rrugë e ndryshimit e cila është rrugë e profesionalizmit. Sot, ne kërkojmë mbështetjen tuaj për ta dëshmuar vetveten, ndaj ju bëjmë thirrje të bëheni pjesë e fitores sonë të përbashkët për një të ardhme më të mirë”. /PrizrenPress.com/

Lëvizja Vetëvendosje! ka mbajtur të dielën tubimin elektoral në Rahovec. Kandidati për kryetar të Komunës, Dervish Çadraku, tha se Komuna e rahovecit është në duart e një grupi njerëzish të cilët në cilësinë e pushtetarëve krijojnë marrëdhënie të njëanshme abuzuese me të drejtat legjitime të qytetarëve. “Duke e trajtuar Komunën si pronën private të tyre, ata shpërblimin për punën e tyre e çojnë përtej pagës, duke plaçkitur kështu buxhetin e Komunës dhe xhepat e qytetarëve”, tha Çadraku.

Ai duke prezantuar në pika të shkurtra Alternativën Qeverisëse të Lëvizjes për Rahovecin, tha se sektori i bujqësisë është njëri nga sektorët më të rëndësishëm të kësaj komune, për sa i përket zhvillimit e punësimit.

Çadraku tha se bujqësia e Rahovecit do të subvencionohet në farëra, pleh dhe naftë, në hardhi të rrushit e makina bujqësore, në ngritjen e minibodrumeve të verës, në grumbullimin dhe finalizimin e produkteve bujqësore dhe blegtorale, varësisht nga nevojat e fermerëve.

Pas tij, fjalën e mori kandidatja për Kuvendin Komunal Florindë Kryeziu. Ajo theksoi faktin se qeverisjet e deri tanishme në Komunën e Rahovecit, kanë kontribuar mjaft në largimin e të rejave dhe të rinjve nga vendlindja e tyre. “Në qytetin e Rahovecit, ku papunësia e rinisë është e lartë, të rejat dhe të rinjtë duhen konsideruar si burimi i zhvillimit. Përmes politikave të punësimit të Lëvizjes VETËVENDOSJE!, ofrimit të trajnimeve shtesë pas diplomimit, përmes edukimit në përputhje me nevojat e tregut të punës, rruga e punësimit për të rejat dhe të rinjtë do të jetë e lehtësuar”, tha Kryeziu.

Kandidati për Kuvendin Komunal, Artan Ejupi, tha ndërkaq se popullit të Komunës së Rahovecit nuk i duhen udhëheqësit që qeverisjen e shohin si privilegj, por i duhen udhëheqësit që qeverisjen e konsiderojnë si përgjegjësi. “Vetëvendosje! në Rahovec, me gjithë kapacitetet e veta do të jetë zëri i qytetarëve të kësaj Komune, kundër çfarëdo lloj padrejtësie apo veprimin që tenton t’i humbë vlerat e kësaj Komune përplot bujq e fermerë”, theksoi Ejupi.

Kryetari i VV-së Albin Kurti, tha se në aspektin historik e kombëtar,Vetëvendosje! udhëhiqet nga fryma që lidh Skënderbeun dhe Adem Jasharin ndërkaq në aspektin politik e filozofik udhëhiqet nga koncepti i cili që lidh Sami Frashërin me Ukshin Hotin.

Duke folur për Alternativën Qeverisëse të Lëvizjes, Kurti tha se përmes saj ne synojmë t’i japim hov industrisë prodhuese, duke e ditur që industria prodhuese i krijon vendet e reja të punës edhe në industrinë e shërbimeve, atë të financave, si dhe në tregti. Lidhur me problemin e vreshtarëve të Rahovecit, Kurti tha se shitja e Bodrumit dhe ambientit të përpunimit të rrushit, bashkë me 1000 hektarët e vreshtave, i ka lënë kultivuesit e rrushit, i ka lënë vreshtarët, pa e shitur rrushin. Shembulli i dështimit edhe të bujqësisë edhe të industrisë është kjo fabrikë e shitur, ku dështimi i bujqësisë e sforcon dështimin e industrisë, dhe dështimi i industrisë e sforcon dështimin e bujqësisë.

Kurti foli për problemin politik në fshatin Hoçë të Madhe, ku vetëm sa po përforcohet e ashtuquajtura zonë e veçantë mbrojtëse, e cila në fakt e sulmon edhe funksionalitetin e Komunës, edhe trashëgiminë kulturore.

“Me Lëvizjen Vetevdneosje! në qeverisje, nuk do të ketë më këso mini-shtetesh brenda komunave tona, por do të ketë komuna të fuqishme të Kosovës, në një shtet të fuqishëm të Kosovës”.

Lidhur me rrugët që janë shtruar kohëve të fundit në këtë Komunë, në emër të përmirësimit të infrastrukturës, Kurti tha se infrastruktura nuk është vetëm asfalt i hollë si qilim, por është rrugë e shtruar me bazë dhe mbi të gjitha infrastruktura nënkupton edhe ujësjellësin edhe kanalizimin. “E keni parë kohëve të fundit se si këtu në Rahovec pushteti po mbjellë asfalt për të korrur vota. Po shtrohen rrugë vend e pa vend, të holla me asfalt si qilim, pa i paguar kompanitë e ndërtimit, me premtimin se buxhetin do t’ua shlyejmë në mandatin e ardhshëm ndërkohë që borxhi i Komunës tashmë është trashur në 3 milionë euro. Kjo qeverisje që e rrit borxhin e popullit, për t’ia zgjatur jetën vetes, vetëm sa ia nxin jetën qytetarëve”.

Kurti në fund u bëri thirrje qytetarëve të Rahovecit që të mos i votojnë këto subjekte që janë bërë bashkë për t’u pasuruar, por ta votojnë Vetëvendosje!-n që do ta bashkojë popullin për ndryshime.

Tash edhe dija shitet shumë- shumë lirë. Sidomos në Kosovë.

Në një fotografi të postuar në Facebook nga një qytetar i Prishtinës shihet se në pazarin e veturave në Fushë Kosovë, që mbahet çdo të diele e ku shitet shumë çka tjetër, tash po shiten edhe punime diplomash, transmeton Reporteri. Sipas postimit, një punim shitet për 1 euro dhe se tregtari ka më mijëra të tillë.

Partia Konservatore e Kosovës sot ka vizituar gjellëtoren humanitare “Jetimët e Ballkanit” në Prizren. Gjatë kësaj vizite PK-ja prezantoi projektin “ Kuzhina Popullore në Qeverisjen Kizolli”.

Kryetari i shoqatës Halil Kastrati, falënderoi Partinë Konservatore të Kosovës për këtë vizitë dhe interesim.

“Gjellëtorja humanitare edhe pse shpesh me kushte të vështira vazhdon të funksionojë, por shpresojë që pas zgjedhjeve të 3 nëntorit secila parti që formon qeverinë të interesohet më tepër duke dhënë kontribut më të madh në këtë aspekt dhe kërkoi që kuzhina popullore të mos anashkalohet sepse është shumë e nevojshme për një pjesë të shoqërisë’’.

Kryetari i PK-së Munir Basha u shpreh i zhgënjyer me gjendjen aktuale të kuzhinës popullore . Ai shtoi se gjatë punës së tyre në Asamblenë Komunale e kanë ngritur disa herë këtë çështje dhe njëkohësisht kanë kushtëzuar miratimin e buxhetit komunal me mbështetjen e kësaj iniciative, por fatkeqësisht qeveria komunale me kryetarin aktual nuk e kanë marrë parasysh këtë propozim.

Basha premtoi se pas datës 4 nëntor, Partia Konservatore me qeverisjen e saj do të angazhohet sinqerisht në zgjidhjen e problemeve të skamnorëve sepse ky është problem edhe i yni por edhe i gjithë vendit.

Nga ana tjetër kandidati i PK-së për kryetar të Prizrenit, Beni Kizolli tha se në kuadër të platformës politike të hartuar nga kabineti për qeverisje të mirë është edhe sektori i mirëqenies sociale dhe në kuadër të saj si projekt me prioritet është Kuzhina Popullore.

Ndërsa Shaban Basha shtoi se qëllimi kryesor i Kuzhinës Popullore do të jetë zbutja e përkohshme e krizës ekonomike dhe të varfërisë.” Kuzhina popullore me qeverisjen tonë fillimisht do të shërbejë me një shujtë në ditë, do të ketë një vend të përshtatshëm me një qasje të duhur dhe në kuadër të saj do të bëjmë edhe shpërndarjen mobile të ushqimit”/PrizrenPress.com/

Kandidati i BD-së, Zafir Berisha është takuar me banorët e lagjes “Bajram Curri” dhe banorët e komunitetit boshnjak në Gënqar.

Ai premtoi banorët e “Bajram Currit” se pas ardhjes në pushtet të BD-së, kjo lagje do të në kuadër të Planit Zhvillimor Urbanistik, ku do të legalizohen të gjitha shtëpitë e kësaj lagje, që pushtet në vazhdimësi që nga themelimi i kësaj e kanë lënë në mëshirën e zotit.

Kandidati për Asamblenë Komunale Osman Hajdari foli për detajet e programit zgjedhor.Ai garanoi qytetarët se BD-ja do të ketë një qasje më serioze të institucioneve në raport me këtë lagje si dhe me gjithë qytetarët e Prizrenit.
Ndërkaq, në fshatin Gënqar, kandidati për kryetar të Prizrenit, Zafir Berisha tha se do të vazhdojë që komunitetin boshnjak,turk dhe REA si deri më tash t’i konsiderojë qytetarë të barabartë me komunitetin shqiptar.

“Prandaj më lejoni që të ju bëj ftesë që të bëheni pjesë e përpjekjeve qytetare në Prizren për t’i dhënë fund krimit dhe korrupsionit, që për fat të keq ka përfshirë institucionet tona”./PrizrenPress.com/