Në fshatin Zym të Hasit, për të 42-tën herë është mbajt manifestimi tradicional “Takimet e Gjeçovit”. Në këtë manifestim morën pjesë dashamirë të fjalës së shkruar, politikanë e të tjerë, raportoi klultplus. Ky edicion iu kushtua 90 vjetorit të lindjes së aktores Katarina Josipi. Josipi u shqua për veprimtarinë e saj të pasur në fushën e artit skenik. Laureate e çmimit vjetor “Unaza e Katit”, është drejtoresha e Arkivit Shtetëror të Shqipërisë, Nevila Nika. Nevila Nika, drejtoreshë e Arkivit Qendror Shtetëror të Shqipërisë është shpallur laureate e Çmimit “Unaza e Katit” nga Këshilli organizativ i manifestimit tradicional “Takimet e Gjeçovit”, i cili u mbajt në Zym të Hasit.

Në këtë ngjarje kulturore, letrare e shkencore morën pjesë një numër i madh krijuesish.

Organizatorët e falënderuan drejtoreshën Nika për zbulimin dhe sigurimin e materialit për botimin e “Abetares së Zymit 1900” së bashku me famulltarin Don Ndue Ballabanin.

Nevila Nika, tha se ndihet e nderuar me këtë çmim, pasi siç u shpreh, ka arritur që sado pak të kontribuojë, për botimin e Abetarës së Zymit.

“Unë gjysmë jam nga Kosova dhe gjysmë nga Shqipëria. Prindërit e mi në kryeqytetin e Shqipërisë, në Tiranë, arritën ta realizojnë urën e bashkimit të cilën shumë individë u munduan ta rrënojnë. Unë jam rritur duke dëgjuar histori për Kosovën. Kjo tokë e lashtë ka dhënë shumë. Shpesh na është thënë se ne kemi luftuar vetëm me armë. Jo. Ne kemi ditur të luftojmë edhe me libër. Këtu u përmend Nënë Tereza dhe At Shtjefën Gjeçovi, miku më i ngushtë i At Gjergj Fishtës që i këndoi aq bukur këtij vendi arbëror. Vërtet më keni bërë nder që më keni dhuruar këtë çmim kaq madhështor”, pohoi Nika, transmeton Koha.

Në edicionin e 42-të të këtij manifestimi, një tribunë e veçantë iu kushtua shënimit të 90-vjetorit të lindjes së artistës së madhe shqiptare Katarina Josipi, e cila gjatë 21 vjetëve sa punoi në Teatrin profesional të Prishtinës luajti përkrah artistëve të mëdhenj si, Bekim Fehmiu, Nexhmije Pagarusha, Muharrem Qena Hyrie Hana, Isref Begolli etj.

Me nga një kumtesë për këtë jubile u paraqitën Frrok Kristaj si dhe Antoneta Dulaj. Kristaj me kumtesën e tij “Promadonë e teatrit dhe atdhetare”, theksoi se Katarina Josipi ishte kampione dhe bartëse e roleve më komplekse të reportorit të Teatrove.

“Bukuria e brendshme e Katit shpërthente vetëm kur fikeshin dritat në sallë e ndizeshin të tjerët në skenë. Atëherë temperamenti i saj artistik i magjepste dhe i çonte shikuesit në një tjetër botë. Të gjitha rolet i interpretone me passion, me përkushtim duke e shkrirë vetën në role dhe duke përjetuar, krijuar fytyra të reja. Katarina Josipi me talentin e saj të një artisteje të parë dhe të madhe, ngriti një galeri të tërë tipesh që e përjetoi jetën pa kufi, kohë e hapësirë.”, theksoi Kristaj.

Ndërsa, kushërira e aktorës Katarina Josipi, Antoneta Dulaj me kumtesën e saj “Të shkojmë shembujve të figurave tona komëtare” ka theksuar se anipse thuhet se të gjitha femrat në botë e flasin gjuhën e heshtjes, Kati dhe Marie Shllaku nuk kanë heshtur kurrë. Ajo bëri thirrje që të çmohen figurat e ndritura kombëtare.

“Dua të theksoj edhe një gjë se, derisa ishte në jetë Katarina Josipi, Teatri Kombëtar njëherë në vit e shfaqte një pjesë teatrale të Zymit tonë. Kjo traditë pat vazhduar për një kohë, edhe pas saj, por me angazhimin e veprimtarit tonë, Frrok Kristaj , por ja se tash e sa kohë një amanet i tillë i Katit më nuk po repektohet. Sot edhe shumëçka nuk po repektohet në mesin tonë. Ndaj edhe i madhi Ibrahim Rugova nuk e ka thënë kotë se, popullit me mentalitet robërie, i nevojiten njerëz me mentalitet lirie. Ndaj, ju thërras që të kthjellemi pak se nuk kemi të drejt t’i nëpërkembim figurat tona të mëdha, me të cilët krenohet bota.”, tha ajo.

Ndërkaq, aktorja e njohur Leze Qena ka evokuar kujtime të mira me Katarina Josipin.

“Unë kam ardhë në Zym edhe si fëmijë dhe prej asaj kohe kam dëgjuar për historinë e At Shtjefën Gjeçovit dhe gjithnjë jam mburrë që jam shqiptare. Me Katin kemi jetuar një kohë të gjatë, por ja që për mua ajo kohë ishte shumë e shkurtër. Katin e kam pas si nanë, motër, mësuese, shoqe, kolege. Në çdo rol që kam luajtur me të e kam pasur diçka. Unë shumë gjëra kam mësuar prej saj. Sa i përket interpretimit të Katarina Josipit, deri në mëngjez do të flisja. Ajo ishte dhe do te mbetet fenomen i skenës.”, ka thënë Qena.

Në pjesën e dytë të manifestimit “Ora e Anton Pashkut”, kanë lexuar poezi poetët nga Shqipëria dhe Kosova si Etleva Tafa, Pashtrik Braha, Jozefina Traboini, Prend Buzhala, Fatime Ahmeti, Skënder Zogaj, Çerkin Bytyçi dhe disa të tjerë.

Në fund, të panishmit kanë pasur mundësi të shohin edhe ekspozitën me disa fotografi kushtuar përvjetorit të lindjes së aktorës shqiptare, Katarina Josipi.

Ka nisur “Vjeshta Letrare e Gjilanit”, manifestim i cili begaton jetën letrare në Kosovë. Këtë fundjavë në sallën e vogël të Teatrit të Qytetit në Gjilan, e nën organizimin e Ars Clubit “Beqir Musliu”, asocioacion ky që tubon shkrimtarë nga treva të ndryshme shqiptare, filloi Manifestimi letrar, me kohëzgjatje më të madhe në Kosovë, “Vjeshta letrare e Gjilanit”.

Sabit Rrustemi, në cilësinë e nikoqirit, tha se po e vazhdojnë aty edhe ku e nisën këtë Manifestim, në vjeshtën e vitit 2010, për ta realizuar misionin që kanë, afirmimin e artit letrar, veprave të reja dhe emrave të dëshmuar të letërsisë. “Ne po bëjmë fushatë për librin dhe vlerat letrare, në të njëjtën kohë kur në Kosovë po zhvillohet një fushatë politike për ta fituar pushtetin lokal, ndërsa ne, për ta ruajtur dhe rikthyer lexuesin kah libri dhe kah ajo që realisht quhet vlerë letrare”, tha Rrustemi, duke potencuar se janë të vetëdijshëm se nuk e kanë lehtë dhe se u mungon kësaj here edhe mbështetja financiare, shkruan Zëri.

Faik Shkodra, një studiues i spikatur i letërsisë, i cili tha se, vërtetë është sfidë e madhe të organizosh në këtë kohë një manifestim të tillë letrar, me një shtrirje të gjerë, nëpër midise të ndryshme kosovare, duke tubuar emra nga treva të ndryshme edhe vepra që i bëjnë nder letërsisë sonë e sipas tij, duke e njohur veprimtarinë e deritashme të Ars Clubit “Beqir Musliu”, i cili tashmë ka krijuar identitetin e vet kulturore edhe në këtë edicion të katërt me radhë, do të sjellin vlera të mirëfillta letrare, qoftë ato që i kanë krijuar dhe botuar vetë, por edhe vlerat tjera që kanë krijuar tjerët.

Arsim Halili, përmes një vështrimi letrar, paraqiti në vija të përgjithshme veprat e botuara gjatë vitit 2013, gjithsejtë 9 vepra, të cilat nën përgatitjen dhe përkujdesjen e anëtarëve të Ars Clubit, u botuan nga Shtëpia Botuese “Beqir Musliu”.

Arsim Halili, i njohu artdashësit shkurtimisht me secilën vepër, duke filluar nga ajo me studime e Sinan Sadikut “Rendi i vlerave në poezinë bashkëkohore shqiptare”, e deri te vepra më e re, botuar këto ditë, “Zgjoje ëndrrën” me autore, Myrvete Osmanin, nga Vushtrria.

Janë botuar, potencoi Halili, vepra nga fusha e kritikës letrare, një roman, ai i Kadire Pirës, “Të Gënjyerit” si dhe katër vëllime poetike, të cilave ju bashkohen edhe do botime ekskluzive, me autorë të ndryshëm, “Trekëndëshi poetik i paqes ” dhe, “Mos e lësho sharkinë prej dore”, kjo e fundit, një buqetë e përbashkët poetike, kushtuar poetit dhe rapsodit Agim Gashi, i cili me vite po përballet me një sëmundje të rëndë, në Duren të Gjermanisë.

Arsim Halili, potencoi në fund se, asnjë libër nuk është botuar pa u vlerësuar paraprakisht nga recensentët si dhe redaktori përkatës se, a i plotëson kriteret e botimit. E, kjo dëshmohet edhe me çmimet që i kanë fituar librat tanë të botuar në këto dy vite, ku, dy prej tyre, në nivel Kosove janë vlerësuar me vende të para, ndërsa një tjetër, nga një asociacion shkrimtarësh shqiptarë në Gjermani, me vendin e dytë.