Disa zyrtarë të Ministrisë së Arsimit vazhdojnë të mbajnë poste të dyfishta. Disa janë duke punuar edhe në universitetin e Prizrenit “Ukshin Hoti”, madje duke marrë paga të majme, nga 600 deri në 800 euro, raporton Kohavisioni. Kjo gjendje pritet të vazhdojë deri në dhjetor, atëherë kur Universiteti i Prizrenit do të pavarësohet nga MASHT-i.

Duke qenë në po të njëjtën vijë buxhetore me Ministrinë e Arsimit, kjo e fundit ka emëruar pjesëtarë të bordit në Universitetin e Prizrenit, duke i paguar në shuma paushalle dhe mjaft të larta. Kryetari i Komisionit për mbikëqyrje të financave publike, Ali Sadria ka thënë se në raportin e auditimit të pasqyrave financiare të Ministrisë së Arsimit për vitin 2012, kjo e fundit nuk e ka përmendur se për çfarë saktësisht janë bërë këto pagesa dhe cilat kanë qenë punët e kryera për ato shuma.

Ndërkaq, Ragip Gjoshi, këshilltar politik në MASHT, ka konfirmuar se këta zyrtarë vazhdojnë të punojnë ende, mirëpo kjo çështje do të zgjidhet.

Lëvizjes Vetëvendosje! në Sharr, ka prezantuar kandidatët për Kuvendin Komunal që do të garojnë në zgjedhjet e 3 nëntorit.

Kandidati për kryetar të Komunës, Bledi Kurtishi, tha se ekonomia, papunësia e madhe dhe mungesa e politikave zhvillimore, ka bërë që qytetarët e Sharrit të ndihen të anashkaluar nga shteti. “Sharri ka nevojë për Alternativën Qeverisëse të Vetëvendosjes. Ka nevojë për njerëz profesional, joneglizhentë dhe të pakorruptueshëm. Ka nevojë për arsim cilësor dhe përkujdesje shëndetësore 24 orëshe. Sharri ka burime të fuqishme të ujit, që me një investim kapital do ta furnizonte mjaftueshëm tërë fshatrat e kësaj komunë më ujë të pijshëm”, tha Kurtishi. Ai kritikoi komunën edhe për ujërat e zeza dhe deponitë e mbeturinave.

Flutura Tershnjaku, kandidate për Kuvendin Komunal, tha se gruaja është shumë pak e përfaqësuar. “Për shkak të patriarkalizmit në Sharr, ne kemi një përqindje të vogël të grave që kanë pozitë të barabartë në shoqëri. Kjo vjen edhe si pasojë e nivelit të ulët të arsimimit të femrave, të cilat në shumë raste e braktisin shkollën qysh në nivelin fillestar. Me Alternativën e Lëvizjes Vetëvedosje , zëri i gruas do të dëgjohet edhe më shumë në institucione në veçanti, dhe në shoqëri në përgjithësi”, tha Tershnajku.

Kandidati tjetër Rilind Reshiti, ndërkaq ka folur për keqqeverisjen në Sharr. Ai premtoi se VV-ja do të angazhohet për ta ndryshuar Komunën e Sharrit. “Papunësia në komunën e Sharrit është më e larta në Kosovë. Kjo gjendje ka ardhur si pasojë e subjekteve që kanë qeverisur deri më tani me këtë komunë, që përmes keqqeverisjes nuk ka pasur për qellim rritjen e mirëqenies së qytetarëve, por rritjen e luksit të tyre. Në alternativën tonë qeverisëse janë përfshirë të gjitha hallet, shqetësimet dhe sugjerimet e nxjerra nga takimet me qytetarët”, tha Reshiti.

Nënkryetare e VV-së Aida Dërguti, tha se Komuna nuk është vetëm administratë, e as vetëm përfaqësim, nuk është vetëm ndërtesë, e as vetëm tatime. “Ajo është e tëra: politika, qytetari, ekonomia, shërbimet, publikja. Komuna është dera e hapur e qytetarit, përmes së cilës adresohen të gjitha çështjet me interes. Komuna reflekton nivelin e demokracisë së një vendi, aty ku problemet zgjidhen bashkarisht”, tha Dërguti./PrizrenPress.com/

Kandidati i Lëvizjes Vetëvendosje! për kryetar të Prizrenit, Arbër Rexhaj, ka ashpërsuar gjuhën në raport me partitë tjera politike. Ai tha se Vetëvendosje! në zgjedhjet e nëntorit në garë përballë nuk ka subjekte politike, por organizata mafioze. “Deri më tani Komuna e Prizrenit nuk është qeverisur nga subjekte politike, por organizata kriminale. Dhe ky është fakt i pakundërshtueshëm. Deri më tani Komuna e Prizrenit nuk ka pasur as opozitë, por vetëm kundërshtime kozmetike që nuk dhanë ndonjë rezultat. Gara zgjedhore dhe ballafaqimi me ta, nuk do të jetë i lehtë. Sepse në këtë garë nuk do të ballafaqohemi me subjekte politike, por organizata mafioze të certifikuara nga KQZ-ja”, tha Rexhaj.

Sipas tij, me hyrjen në garë të Lëvizjes Vetëvendosje! në Prizren, është kthyer shpresa e ndryshimit të rendit të deritanishëm të gjerave.
Vetëvensoje! në Prizren, ka mbajtur një takim me strukturat e saja në të cilën është diskutuar për rëndësinë e mobilizimit të të gjitha kapaciteteve me qëllim që zgjedhjet lokale të këtij viti të jenë garancë për ndryshim.

Shefi i Shtabit Zgjedhor Faruk Dakaj tha se takimet e drejtpërdrejta, puna e vazhdueshme në terren, mbrojtja e votës, ndershmëria dhe korrektësia eVV-së me qytetarë, do të jenë armët kryesore kundër politikës së vjetër. “Përpos ndryshimit politik në Prizren, mbi ne rëndon edhe barra e mbrojtës së votës me 3 nëntor. Gjersa ne mbajmë trajnime me vëzhgues e komisionerë se si ta mbrojmë votën, ata trajnohen se si ta vjedhin atë. Mirëpo me vullnetin dhe guximin e secilit aktivistë të Vetëvendosje!, atë ditë kjo betejë do të përfundojë në favorin tonë”, tha Dakaj./PrizrenPress.com/

Ish nënkryetari i parë i Partisë Demokratike të Kosovës, Fatmir Limaj, me t’u liruar nga akuzat për krime lufte të procesit gjyqësor të njohur si “Kleçka”, i është rikthyer aktivitetit të tij politik.

Kësaj here, jo sikur më parë, angazhimin e tij, e ka fokusuar për ta larguar nga pushteti në komunën e tij në Malishevë, partinë të cilës zyrtarisht ende i takon.

Pak ditë pasi gjykata nuk gjeti prova për pretendimet se Limaj ka kryer krime lufte, dhe e liroi nga arresti shtëpiak, ai doli hapur në përkrahje të Iniciativës Qytetare për Malishevën, e cila po garon për t’ia marr pushtetin PDK-së në këtë komunë.

Në një tubim të kësaj iniciative ai kërkoi hapur votën e qytetarëve të Malishevës për ta. Ndërsa menjëherë pas qartësimit të angazhimit të tij momental poltik, ai ka filluar punën në terren, transmeton Reporteri.

Limaj bashkë me njerëzit e grupacionit politik të përkrahur nga ai, ka filluar vizitat fshat më fshat, ku po kërkon që qeverisja e cila ka drejtuar Malishevën mandatin e kaluar me në krye Isni Kilajn, e i cili kishte marrë drejtimin e komunës edhe fal mbështetjes së Limajt, nuk duhet mbështetur më.

“Komandant Çeliku”, këto ditë ka vizituar fshatrat Astrazup, Balincë e Llapqevë të Malishevës, ku është takuar me banorët, të cilëve po u kërkon që në zgjedhjet lokale të 3 nëntorit të mos të votojnë PDK-në siq kanë bërë herën e kaluar, por të zgjedhin IQM-në si alternativë qeverisëse për katër vitet e ardhshme.

Partia Demokratike e Kosovës në Prizren është e bindur se kandidati i tyre, Ramadan Muja, si kryetar i Komunës, ia ka ndryshuar pamjen për të mirë Prizrenit. Anëtarët e këtij subjekti politik, janë të binduar se puna që ka bërë kryetari Muja do të shpërblehet nga qytetarët.

Kryetarët e nëndegëve të PDK-së në takimin e fundit që kanë mbajtur janë shprehur të gatshëm që të mobilizohen për zgjedhjet e nëntorit. Në këtë takim kanë marrë pjesë kandidati për kryetar të Komunës së Prizrenit, Ramadan Muja, kryetari i Degës së PDK-së Minir Krasniqi, kryetari i Shtabit Zgjedhor Hasan Hasani, sekretari i përgjithshëm i PDK-së Nijazi Kryeziu dhe anëtarë tjerë të Kryesisë.

Ata në këtë takim kanë diskutuar për përgatitjet e deritashme në lidhje me fillimin sa më të mbarë të fushatës parazgjedhore.
Kryetarët e nëndegëve të PDK-së, janë zotuar se do të bëjnë një fushatë të ndershme, dhe demokratike.

Sipas tyre, anëtarët dhe simpatizantët e PDK-së kanë arsye më shumë se kurrë që të jenë krenar, sepse gjatë kohës sa Prizreni është qeverisur nga PDK-ja dhe nga kryetari Muja, ka ndryshuar pamjen dhe është bërë shembull në gjithë hapësirën shqiptare si qytet ku frymon uniteti dhe bashkëpunimi i shkëlqyer qytetarë – qeveritarë.

Ata treguan se janë duke punuar me qytetarë derë më derë për të bashkëbiseduar me ta, dhe për të parë nga afër se cilat janë kërkesat e tyre .Struktura e Degës së PDK-së, po ashtu ka kërkua që fushata të zhvillohet e qetë, dhe të respektohen rregullat e zgjedhjeve, në mënyrë që të mos lejohet në asnjë mënyrë që për shkak të pakujdesisë të prishet imazhi i PDK-së, dhe vizioni i kësaj partie, që është e vetme në Kosovë që do ta shpie Kosovën në Evropë./PrizrenPress.com/