Partia Demokratike e Kosovës (PDK) do të rikandidojë Salim Jenuzin për kryetar të Dragashit. Ai javën e kaluar ka marrë përkrahje edhe nga lideri I PDK-së, Hashim Thaçi. Kryetari aktual i Dragashit, Salim Jenuzi ndërkaq tha se pavarësisht përkrahjes nga Thaçi ende nuk është nominuar zyrtarisht si kandidatë për kryetar të Komunës. “ Ende nuk jam emëruar zyrtarisht. Besoj se deri ka 15 gushti do të përmbyllet edhe kjo çështje”, tha Jenuzi për “PrizrenPress”. Ai beson se do të rikandidohet për kryetar të Dragashit. ”Besoj më shumë se po”, tha Jenuzi.

Lideri I PDK-së Hashim Thaçi, gjatë një takimi që ka zhvilluar javën e kaluar me Këshillin Drejtues të PDK-së në Dragash, ka lavdëruar punën që ka bërë Jenuzi në këtë komunë. Ai ka kërkuar nga të gjithë që të angazhohen për të ruajtur fitoren në Dragash.

Kryetari Jenuzi është i bindur se PDK-ja në Dragash do t’i fitojë zgjedhjet e nëntorit. ”Kemi bërë punë të mirë gjatë këtyre viteve të qeverisjes, prandaj qytetarët do të na besojnë edhe në nëntor”, tha Jenuzi.

Ai tregoi se në Komunën e Dragashit, janë realizuar shumë projekte kapitale në të gjitha sektorët e jetës. ”Kemi realizuar investime në të gjitha sektorët e jetës së qytetarëve të Dragashit. Kemi investuar në infrastrukturë, arsim, shëndetësi…”, tha Jenuzi. Sipas tij, qytetarët në nëtor do të dinë të vlerësojnë punën që është bërë gjatë qeverisjes së PDK-së në Dragash. /PrizrenPress.com/

Policia ka konfiskuar një armë të llojit “Kallashnikov” në fshatin Romajë të Hasit. Konfiskimi është bërë pasi që një preson ka përdorur atë në një aheng familjarë.

“Rreth orës 10:45 min, një patrullë e Policisë së Trafikut Rajonal nga Prizreni, e cila ishte duke e hetuar një rast të aksidentit të trafikut afër fshatit Romajë, ka dëgjuar të shtëna nga arma e zjarrit.

Lidhur me rastin është informuar Qendra Operative , e cila ka sugjeruar që patrulla të merret me rastin. Më pas është identifikuar i dyshuari, i cili pasi është pyetur për rastin, ka treguar se në familjen e tij ishte organizuar një aheng familjar dhe për këtë i njëjti ka shtënë me armë të llojit ‘Kallashnikov’ të cilën e ka dorëzuar”, tha zëdhënësi i PK-së në Prizren, Hazir Berisha.

Sipas tij, Policia ka iniciuar rastin si “Shkaktim i rrezikut të përgjithshëm”, ndërsa prokurori i shtetit ka vendosur që rasti t’i kalojë Prokurorisë. /PrizrenPress.com/

Sekretari i Partisë Demokratike të Kosovës (PDK), Basri Musmurati ka deklaruar se formimi i komunave të reja si: Zhegra, Rogova dhe Gjonaj, nuk po ndodhin si rezultat i afrimit të zgjedhjeve lokale, por si shkak i kërkesave të qytetarëve që këto lokalitete të shndërrohen në komuna.

Ai ka theksuar se qeveria nuk e ka me nguti formimin e komunave te reja, por vendimi për formimin e këtyre komunave vjen sipas tij, pas një studimi paraprak që është bërë nga Qeveria për nevojën e formimit të këtyre komunave, duke shtuar se Kuvendi i Kosovës është ai organ i cili e jep dritën jeshile për formimin ose jo të këtyre komunave.

Sekretari i PDK-së ka sqaruar se Ministria e Administrimit të Pushtetit Lokal (MAPL) duke analizuar planin e formimit të komunave të formuara më herët, si: Mamusha, Juniku dhe Hani i Elezit, me përjashtim të komunave serbe kanë ecur mjaft mirë.

“Këto komuna kanë gjeneruar demokraci, kanë gjeneruar vende pune pak a shumë, kanë gjeneruar njëfarë zhvillimi ekonomik. Ndërsa edhe sa i përket projekteve, këto komuna nuk janë bazuar vetëm në projektet të cilat financohen nga Qeveria e Kosovës, por kanë arritur të sigurojnë fonde prej donacioneve të ndryshme në funksion të zhvillimit te komunave. Krejt ky sukses ka ardhur si rezultat i punës dhe angazhimit të stafit dhe kryetarit të këtyre komunave”, tha ai për Telegrafin.

Musmurati tha në rast se këto vende krahasohen me periudhën kur nuk kanë qenë komuna, do të vërehet përmirësim i dukshëm i tyre

KEDS Sh. A. njofton se për shkak të dëmtimit të kabllos 35 kV Prizreni III, nga një kompani e kontraktuar për ndërtimin e banesave, prej orës 09:38 ka mbetur tërësisht jashtë pune nënstacioni NS 35/10 kV Prizreni III. Për këtë shkak, pa furnizim me energji elektrike ka mbetur pjesa më e madhe e qendrës së qytetit të Prizrenit.

Ekipet e mirëmbajtjes së KEDS menjëherë kanë dalë në terren dhe si të bëhet evitimi i prishjes do të kyçet nënstacioni, njofton kumtesa nga KEDS SH.A. /PrizrenPress.com/

Ministria e Punëve të Jashtme (MPJ) e së Kosovës, ka njoftuar se përmes ambasadës në Hungari është duke përcjell me vëmendje zhvillimet që kanë të bëjnë me qytetarët e Kosovës, të cilët në përpjekje për të migruar në shtetet e Evropës, aktualisht ndodhen në Hungari.

“MPJ në vazhdimësi po mbledh informacione për vendndodhjen, trajtimin si dhe aspektet tjera që lidhen me akomodimin e përkohshëm të tyre në këtë shtet mik, me ç’rast autoritetet hungareze kanë siguruar se qytetarët e Kosovës janë duke u trajtuar në përputhje me standardet evropiane që lidhen me trajtimin e azilkërkuesve”, është thënë në komunikatën e MPJ-së.

Sipas informacioneve të fundit të ofruara nga autoritetet hungareze, numri i shtetasve kosovarë që janë kapur duke tentuar të futen ilegalisht në Hungari, ditëve të fundit ka pësuar rënie dhe se numri aktual i shtetasve të Kosovës që presin kthimin është rreth 500.

“Pas konsultimeve me autoritetet hungareze dhe shtetasit kosovarë që janë të vendosur në qendra të ndalimit dhe pranimit të azilkërkuesve jemi informuar se kushtet e jetesës, shërbimet dhe ushqimi i tyre është në nivel, iu ofrohet mundësi e komunikimit me telefon dhe internet, dhe se nuk ka evidencë të keqtrajtimit fizik apo ofendimit”, është thënë në këtë komunikatë.

MPJ ka njoftuar se është në kontakt të vazhdueshëm me autoritetet hungareze lidhur me fasilitimin e procedurave të kthimit, rrjedhimisht kthimin sa ma të shpejtë të tyre në Kosovë.

Ministria e Punëve të Jashtme e Kosovës, ka njoftuar se përmes Ambasadës në Hungari, dhe në bashkëpunim të ngushtë me autoritetet hungareze do të angazhohet fuqishëm për të ofruar çdo lloj asistence rreth trajtimit dhe procedurave të tjera deri në kthimin e qytetarëve të Kosovës në vendlindje.

“Hungaria si vend mik, ka qenë dhe mbetet përkrahëse e fuqishme e të gjitha proceseve nëpër të cilat ka kaluar Republika e Kosovës, në veçanti ka përkrahur dhe vazhdon ta përkrahë Republikën e Kosovës në perspektivën e saj evropiane, procesin e liberalizimit të vizave e po ashtu edhe anëtarësimin në organizma rajonal e ndërkombëtar. Ministri i Punëve të Jashtme i Kosovës, Enver Hoxhaj, personalisht po angazhohet fuqishëm dhe ka intensifikuar kontaktet me autoritetet hungareze, me qëllim të tejkalimit sa më të lehtë dhe përmbylljes së suksesshme të kësaj situate”, është thënë në komunikatën e MPJ-së.

Kryetari i Aleancës për Ardhmërinë e Kosovës, Ramush Haradinaj ka vlerësuar se një koalicion i mundshëm qeverisës me Lidhjen Demokratike të Kosovës do të ishte gjë e mirë për vendin, por ka shtuar se për një gjë të tille duhet pritur deri në zgjedhjet e ardhshme të përgjithshme,transmeton KP
Lideri i AAK-së këto komente i bëri në një konferencë për media.

Megjithatë, Haradinajnuk e ka përjashtuar mundësinë e bashkëpunimit me të gjitha ato parti që kanë program përafërsisht të njëjtë.

Partitë opozitare kanë frikën se edhe zgjedhjet lokale të 3 nëntorit do të manipulohen, duke përmendur kështu manipulimet me vota në zgjedhjet e fundit parlamentare, siç thonë ata, nga partia në pushtet, shkruan Zëri.

Sipas tyre, shkuarja në zgjedhje me ligj të vjetër dhe pa u përfunduar reforma zgjedhore dhe mosndëshkimi i vjedhësve të votave nga zgjedhjet e kaluara, paraqet një parakusht potencial të lartë për përsëritjen e manipulimit të rezultatit zgjedhor.

Nga ana tjetër partia në pushtet, PDK-ja thotë se në çdo proces elektoral shfaqen droje të tilla jo vetëm në Kosovë por edhe në rajon.“Të gjitha përgatitjet teknike janë bërë edhe nga KQZ-ja që të parandalohen vjedhjet e votave. Përveç kësaj edhe kodi penal është tepër i ashpër për ata që vjedhin vota. Kodi i ri penal është një lloj garancie pasi që kushdo që bën vepra penale që lidhet drejtpërdrejt me votën nuk do të dënohet vetëm me të holla, por edhe me burg”, ka thënë për “Zërin” Behar Selimi nga PDK.

Sipas tij, kjo droja e opozitës duhet të hiqet, duke i marrë parasysh këto dy elemente përmirësimet teknike dhe ashpërsimin e dënimit përmes kodit të ri penal për ata që abuzojnë me votën.

Ndërkaq, Ismet Beqiri i LDK-së, thotë se është shqetësues fakti që zgjedhjet janë shtyrë për 3 nëntor dhe në këtë drejtim, sipas tij, ka vend për dyshime se ato sërish do të manipulohen. “Ne do të bëjmë çmos që të mos abuzohet vota e qytetarëve nga militantët dhe struktura e PDK-së, por këtu ka vend për të dëshiruar për faktin se dënimet ndaj atyre që kanë vjedhur me votat e qytetarëve janë stimuluese”, ka thënë Beqiri.

Ky i fundit ka drejtuar “gishtin” nga partia e kryeministrit Hashim Thaçi se është bërë pengesë për ecjen tutje të reformës zgjedhore, duke e bërë të mundur edhe një manipulim të radhës.

Ahmet Isufi nga AAK-ja kërkon që zgjedhjet e 3 nëntorit të monitorohen nga mekanizma vendorë dhe ndërkombëtarë, duke mos lejuar që të përsëritet ajo që ka ndodhur në zgjedhjet e kaluara. Megjithatë, sipas tij, në projektligjin ekzistues ka gjasa që të ndodhin manipulime sepse lejohet hapësira për ta bërë një gjë të tillë

Ministria e Punëve të Brendshme ka dorëzuar propozimin për arbitër pranë Gjykatës së Arbitrazhit në Paris. Së bashku me avokatin e përzgjedhur në muajin prill me tender të hapur, që do t’i kushtojë rreth 100 mijë euro (99 mijë e 960 euro), ky dikaster pret vetëm datën e seancës që gjykata ta caktojë.

Në përpjekje për të shpëtuar nga humbjet më të mëdha në rastin që u quajt si “skandali i pasaportave”, MPB-ja do të përballet me kompaninë austriake OeSD, së cilës ia shkëputi kontratën para afatit të caktuar, shkruan gazeta Tribuna.

Kjo ndodhi në janar të këtij viti, pasi tre muaj më herët, Natali Velija, tashmë e paraburgosur, deklaroi se si përfaqësuese e OeSD-së në Kosovë dha ryshfet 1.4 milion euro. Ajo tha se këtë e bëri me sugjerimin e austriakëve