Në zgjedhjet e këtij viti në Suharekë, sipas të gjitha gjasave do të marrin pjesë më pak parti politike,por edhe më pak kandidatë që do të konkurrojnë për postin e kryetarit të kësaj komune.

Disa nga degët e subjekteve politike në këtë komunë, ose janë shuar fare, ose e nuk janë aktive sa duhet, kështu që si parti serioze për ulëset në Kuvendin e komunës dhe për postin e të parit komunal, kanë mbetur AAK-ja, PDK-ja, LDK-ja dhe Lëvizja Vetëvendosje, me mundësi që këtij grupi t’i bashkëngjitet edhe Partie e Drejtësisë, e cila në këtë komunë, kohëve të fundit ka një organizim të mirëfilltë.

Ky konstatim fuqizohet edhe me lëvizjet që po ndodhin në spektrin e këtushëm politikë, e që kanë të bëjnë me proceset dhe angazhimet politike lidhur me zgjedhjet e paralajmëruara për datën 3 nëntor.

Ndonëse po përmenden edhe emra konkret, të cilat nga tri subjektet më të mëdha politike janë propozuar që të kandidojnë për postin e kryetarit të komunës, deri më tash vetëm AAK-ja e ka zyrtarizuar propozimin për Bali Muharremajn, deputet aktual i kësaj partie në Kuvendin e Kosovës, të cilin fundjavën që shkoi në mënyrë publike e nominoi për këtë kandidaturë lideri i AAK-së, Ramush Haradinaj.

Propozimin për këtë funksion e ka dërguar në Kryesinë Qendrore edhe degae këtushme e LDK-së, e cila përsëri është përcaktuar për ish kryetarin e kësaj komune, Salih Asllanaj, por që në listën e parë që është miratuar nga qendra, emri i tij nuk ka figuruar dhe kjo ka sjellë sado pak huti,edhe pse vetë Asllanaj ka deklaruar se kjo ka ndodhë për shkak të vonesës që është bë nga dega e Therandës.

Subjekti tjetër që pretendon të marr postin numër një në këtë komunë, llogaritet të jetë edhe PDK-ja, e cila në mënyrë verbale kaherë e ka kandiduar Ramë Vatajn për këtë postë,përkatësisht në ditën kur ai është zgjedhur kryetar i degës së këtushme të PDK-së.

Mirëpo, në këtë parti, ka zëra që këtë propozim nuk e konsiderojnë zyrtar dhe definitiv, duke thënë se deri në zyrtarizmin e tij që do të bëhet nga strukturat qendrore të partisë,përkatësisht nga lideri Hashim Thaci, mbetën të hapura edhe mundësitë tjera.

Ndërkaq, më enigmatike deri më tash në këtë drejtim ka mbetur Lëvizja Vetëvendosje, e cila jo vetëm që ende nuk është përcaktuar për ndonjë kandidat konkret, por publikisht as që është lakuar emri i ndonjërit që do të mund të propozohej që të garoi për postin e kryetarit të kësaj komune. Drejtues të këtij subjekti kanë thënë se edhe Vetëvendosja do ta ketë kandidatin për Therandën,por kjo do të vendoset dhe të do të bëhet publike atëherë kur është koha.

Aktualisht, apetitet për këtë funksion më haptas i ka bë publike partia në pushtet, AAK-ja, përkatësisht Bali Muharremaj, i cili jo rrallë edhe publikisht e ka thënë se është favoriti kryesor dhe zgjedhjet do t’i fitoi pa ndonjë problem të madh,mbase edhe pa balotazh. Këtë “vetëbesim”, Muharremaj e bazon në angazhimet dhe kontributin përsonal që ka dhënë deri më tash për qytetarët e kësaj komune si dhe në qeverisjen e suksesshme të deritashme që ,sipas tij e ka bë AAK-ja dhe kryetari aktual, Blerim Kuçi./PrizrenPress.com/

(E plotësuar) Në seancën e radhën në rastin “Kleçka” dëshminë e saj e ka dhënë ekspertja e forenzikës, Sesili Croper. Ajo para trupit Gjykues tha se në vitin 2010, në zonën e Kleçkës, janë gjetur trupa të pajetë në dy varreza masive. Por, ajo tha se në vitin 2009 nuk ishte gjetur asnjë mbetje mortore, ndërsa në vitin 2010, po në të njëjtin vend ishin gjetur pesë trupa të pa jetë. Dëshmia e saj e ka vënë në mëdyshje mbrojtjen e të akuzuarve.

Sesili Croper, një antropologe nga Mbretëria e Bashkuar, tha në seancën e sotme se kishte marrë pjesë në dy raste të ekshumimeve të mbetjeve mortore në zonën e Kleçkës. Gjatë dëshmisë së saj ajo potencoi se në vitin 2009, në një zonë të Kleçkës nuk kishin mundur të gjejnë asnjë mbetje mortore.

Por, me kërkesën e prokurorit Mauricio Salustro, rastit i ishin kthyer sërish në vitin 2010, ku kishin gropuar më thellë dhe në të njëjtin vend që një vit më parë nuk ishte gjetur asgjë, ishin gjetur pesë trupa të pajetë.

Sesili Croper ka shpjeguar në detaje se si janë gjetur trupat e varrosur njëri mbi tjetrin, si dhe gjetjen e një mjeti prej metali në varr. Por ajo nuk dha detaje shtesë se çka ka mundur të jetë vetëm tha se mjeti mund të ishte hedhur qëllimisht aty.

Raportet e kësaj dëshmitare, e cila ishte e punësuar në EULEX nga viti 2009 deri në vitin 2012, u vënë në mëdyshje nga avokatët mbrojtës, të cilët e pyetën dëshmitaren nëse ka vërejtur ndonjë ndryshim tek dheu i vitit 2009 dhe atij 2010, duke ngritur dyshime se trupat mund të jenë varrosur pas gjurmimeve të para në 2009-ën.

Avokati mbrojtës i Fatmir Limajt, Tomë Gashi, theksoi se nuk është profesionale që një vend ku është dyshuar se mund të ketë trupa të pajetë, të mos jetë i siguruar nga policia për më shumë se një vit.

“Në vende ku ka pasur luftime në asnjë mënyrë nuk mund të lihen të pasiguruara për një vit vendi ku është gjurmuar dhe ku është dyshuar se mund të ketë trupa të pajetë”, tha ai.

Ndërsa, avokati mbrojtës i Naser Krasniqit, Bajram Tmava, tha se kërkesa e prokurorit për ekzaminimin e dytë të vendit ka rrjedhë nga dëshmia e dëshmitarit “X”.

“Sugjerimi i prokurorit ka rrjedhur nga dëshmia e dëshmitarit X, i cili paraprakisht është dëgjuar në cilësinë e dëshmitarit bashkëpunues dhe i ka treguar ai vendet se ku gjenden trupat e pajetë”, theksoi ai.

Seanca e radhës mbahet të enjten, ku do të dëshmojnë tre mjekë psikiatër, të cilët e kanë bërë analizën e dokumentacionit mjekësor tëAgim Zogajt i njohur si dëshmitari “X”.

Sot seanca e radhës për rastin “Kleçka”

Në Gjykatën e Apelit në Prishtinë, sot në orën 10:00, do të vazhdojë rigjykimi i Fatmir Limajt dhe nëntë ish-bashkëluftëtarëve të tij në rastin “Kleçka”. Nëpërmjet videolinkut pritet të dëshmojnë arkeologia e forenzikës, Sesilia Kropa dhe patologu Marek Gasior.

Avokati i Limajt, Tomë Gashi, ka thënë se në këtë seancë gjyqësore nëpërmjet videolinkut do të dëshmojnë arkeologia e forenzikës, Sesilia Kropa dhe patologu Marek Gasior.

“Këta dy ekspertë janë propozuar nga kryetari i trupit gjykues në rastin ‘Kleçka’”, ka thënë Gashi.

Sipas Gashit, këta dy ekspertë nuk kanë çfarë të deklarojnë për Fatmir Limajn më shumë sesa në gjykimin e kaluar, ku Limaj ishte shpallur i pafajshëm.

“Në raport me Fatmir Limajn, dëshmia e këtyre dy ekspertëve nuk mund të ndryshojë për shkak se ata janë marrë me gjendjen faktike në terren”, ka thënë për ”Epokën e re” avokati Gashi.

Në këtë kontekst, Gashi ka thënë se sot (e martë) mund edhe të përfundojë marrja në pyetje e dëshmitarëve dhe në shtator të përfundojë i tërë procesi gjyqësor kundër Limajt dhe të tjerëve.

“Nëse këta dy dëshmitarë e përfundojnë dëshminë e tyre nëpërmjet videolinkut, atëherë kjo do të jetë seanca e fundit para shtatorit, kur pritet vazhdimi dhe përfundimi i këtij rigjykimi. Dhe nëse eventualisht është e nevojshme edhe një ditë për t’u marrë në pyetje këta dëshmitarë, atëherë do të vazhdohet më 18 korrik”, ka deklaruar Gashi.

Ai ka thënë se nuk e ka idenë se për çfarë arsye i ka ftuar për të dëshmuar këta dy ekspertë kryetari i trupit gjykues. “Nuk mund ta dijë se çfarë ka në tru kryetari i trupit gjykues”, ka thënë avokati Gashi.

Reagojnë organizatat e dala nga lufta

Organizatat e dala nga lufta kanë reaguar ndaj vendimit për masë të arrestit shtëpiak ndaj Fatmir Limaj dhe bashkëluftëtarëve të tij, duke e konsideruar si process të montuar politik.

“Rasti Kleçka”, është vazhdimësi e luftës psikologjike të EULEX-it kundër luftëtarëve të UÇK-së. EULEX po tregon vendosmëri të madhe, kur është në pyetje lufta kundër vlerave të shenjta të kombit shqiptar, thuhet në deklaratën e e OVL UÇK-së.

“Degradimi i një misioni ndërkombëtar, nga mision për sundim të ligjit në mision kundër Ushtrisë Çlirimtare të Kosovës dhe bartësve të saj, është i papranueshëm dhe i patolerueshëm. Ky degradim, ka kapluar edhe deputetët dhe qeveritarët e Kosovës, para syve të të cilëve ndodh kjo maskaradë e EULEX-it.

Ne kemi dërguar kërkesë, para më shumë se një muaji, të gjithë deputëtëve, Kryesisë dhe Kryetarit të Kuvendit, për mbajtjen e një seance të jashtëzakonshme ku do të duhej të ndërpritej mandati ekzekutiv i EULEX-it. Por deri më tani, në Kuvendin e Republikës së Kosovës, nuk u diskutua një gjë e tillë. Ne vlerësojmë se deputetët nuk janë duke vepruar në bazë të mandatit që kanë, në mbrojtje të interesave të qytetarëve dhe mbrojtjen e vlerave kombëare, siç është lufta çlirimtare dhe bartësit e saj.

Përderisa ne u akuzuam se po bëjmë presion ndaj deputetëve të Kuvendit dhe ndërhyrje në “drejtësi”, veprimet e EULEX-it po tregojnë se pikërisht ata po bëjnë presion e shantazh ndaj deputetëve të Kuvendit të Kosovës dhe po e degradojnë drejtësinë. Ne i përkujtojmë deputetët dhe qeveritarët se votat i marrin nga populli e jo nga ambasadat e huaja e as nga EULEX-i”, thuhet në reagim.

Qytetarët e Kosovës nuk mund të marrin azil nëpër vendet e Bashkimit Evropian përkundër një fluksi në rritje të migrimeve ilegale që është vërejtur kohët e fundit. Austria është një prej atyre vendeve që ka rikthyer së fundit 18 persona dhe të cilët pritet të riathesohen në Kosovë. Ndaj azilkërkuesve në Austri mund të shqiptohen masa ndëshkuese duke u ndaluar hyrjen në këtë vend për 18 muajt e ardhshëm dhe duke i gjobitur deri në shumën prej 7.500 euro.

Shumë kosovarë, po marrin rrugën e migrimit ilegal duke shfrytëzuar kalimin nëpër Serbi e më pas edhe në Hungari prej nga mëtojnë të shkojnë në vendet tjera, kryesisht në Gjermani, por edhe Austri, Zvicër e deri te vendet skandinave.

Mbi 4 mijë kosovarë, ka kohë që po mbahen në një kamp në Hungari dhe të cilët pritet të rikthehen në Kosovë duke dështuar në rrugën e marrë për azil apo qëndrim dhe punësim ilegal.

Por, pavarësisht këtij fakti, çdo ditë ka migrime tjera.

Ministrja e Integrimeve Evropiane, Vlora Çitaku u ka bërë thirrje të gjithë kosovarëve që mendojnë të largohen, që të ndryshojnë mendje, pasi që shtetasit e Kosovës nuk mund të gëzojnë të drejtën e azilit në asnjë vend të Bashkimit Evropian.

“Përkundër vështirësive, përkundër sfidave dhe problemeve që kemi në shtetin tonë të ri. azili nuk është më opsion për qytetarët e tanë. Kushdo që mësyn Evropën me idenë se mund të përfitojë nga azili ekonomik, politik apo ndonjë forme tjetër do të kthehet prapa në Republikën e Kosovës”, ka deklaruar Çitaku, transmeton REL.

Ministrja Çitaku ka thënë po ashtu se rritja e fluksit të migrimeve ilegale është shënuar pas marrëveshjes së arritur me Serbinë për lirinë e lëvizjes.

Hapja e vijës qarkulluese përmes Serbisë, është shfrytëzuar nga trafikantët të cilët u premtojnë kosovarëve se do t’i qojnë në vendet perëndimore kundrejt një pagese tejet të majme.

Migrimet dhe azili, sipas ministres Vlora Çitaku, janë pasojë e gjendjes dhe kushteve të rënda ekonomike në të cilat po jetojnë shumë qytetarë të Kosovës.

Sidoqoftë, ajo u ka bërë me dije të gjithëve se rruga e migrimit do t’u kushtojë me rreziqe e shpenzime dhe kthim prapa për në Kosovë.

“Ne e kemi thënë edhe më heret se jemi te vetëdijshëm se azili dhe migrimi ilegal janë pasojë e gjendjes së vështirë në të cilën jetojnë shumë qytetarë të Republikës së Kosovës. Ne tashmë kemi nënshkruar marrëveshje për ripranim me shumicën e vendeve anëtare të BE-së, dhe për më tepër ne njëanshëm kemi miratuar ligjin për ripranim dhe çdo shtetas i Republikës së Kosovës që gjendet ilegalisht në vendet e BE-së do të kthehet mbrapa”, ka thënë Çitaku.

Austria është një prej atyre vendeve që ka rikthyer së fundit 18 persona dhe të cilët pritet të riathesohen në Kosovë.

Ambasadori austriak në Prishtinë, Johann Brieger u ka bërë thirrje qytetarëve të Kosovës që të mos bijnë pre e premtimeve të rrejshme të trafikantëve se do të gjejnë punë në vendet e zhvilluara evropiane.

“Është një shqetësim i madh për ne që njerëzit në Kosovë po bien në vazhdimësi pre e premtimeve të rrejshme të grupeve, mbase kriminale të agjencive të trafikimit”, ka thënë ambasadori Brieger.

“Austria e konsideron Kosovën dhe vendet e tjera të Ballkanit perëndimorë si vende te sigurta dhe kërkesa për azil do të refuzohet”, ka sqaruar ai.

Sipas tij, të gjithë ata që mund të mbërrijnë në Austri, qoftë legalisht apo ilegalisht me qëllim të marrjes së azilit, me procedura të shpejtuara do të kthehen në Kosovë brenda dy javëve.

Po ashtu, ndaj tyre mund të shqiptohen masa ndëshkuese duke u ndaluar hyrjen në këtë vend për 18 muajt e ardhshëm dhe duke i gjobitur deri në shumën prej 7.500 euro.

Në anën tjetër, ministrja Vlora Çitaku ka apeluar edhe tek organet e rendit si edhe misioni i EULEX-it që t’i shtojnë angazhimet dhe t’i kapin dhe sjellin para drejtësisë trafikantët të cilët po e shfrytëzojnë gjendjen e rëndë ekonomike të qytetarëve për t’i mashtruar dhe nisur për në rrugën e migrimit, rrugë kjo që po u kushton shtrenjtë edhe atyre, por edhe shtetit të Kosovës.

Një trend në rritje i migrimit dhe azil-kërkimit, vlerësohet se do ta largonte edhe më tutje Kosovën nga procesi i liberalizimit të vizave.

Duke pritur qëndrimin përfundimtar të Qeverisë së Serbisë për daljen e serbëve e në zgjedhjet lokale të Kosovës më 3 nëntor, serbë nga veriu i Kosovës kanë mendime të ndryshme për pjesëmarrje në këto zgjedhje.

Kryetari i komunës (ilegale) të Zubin Potok Stevo Bozhoviq (DSS) ka thënë se qytetarët e kësaj komune nuk do të votojnë në zgjedhjet e 3 nëntorit..

“Në emrin tim, në emrin e Kuvendit të komunës dhe në emrin e qytetarëve të Kollashinit porosis se nuk do të marrim pjesë në zgjedhje sepse ato nuk do t’i sjellin asgjë të mirë popullit serb në Kosovë”, ka thënë Bozhoviq për agjencinë Beta, citon Koha

Ai ka shtuar se ajo që e “e propagandon shteti i Serbisë se është mirë të dilet në zgjedhje, është farsë dhe rrenë “.

“Nëse pranojmë të dalim në zgjedhje me ligjet e shtetit të panjohur të Kosovës, pa marrë para sysh se ato i organizon OSBE dhe bashkësia ndërkombëtare, pasi që ato i shpall Kuvendi i Kosovës, do të rrezikohen interesat tona dhe do të vihet në pikëpyetje ekzistenca jonë në Kosovës”, vlerëson Bozhoviq.

Sipas fjalëve të tij, mesazhi se do të votohet me dokumente të Serbisë është mashtrim i popullit që të dalë sa më shumë në votime.

Kryetari i komunës (ilegale) të Mitrovicës Dragisha Vlashkoviq (SNS) ka thënë se qëndrimi i tij personal nuk ka ndërruar dhe se nuk do të votojë në zgjedhjet e Kosovës.

“në nuk dua të ndikoj në askënd, si të vendos populli ashtu dhe do të bëhet, por qëndrimi im është i qartë – unë nuk do të marr pjesë në zgjedhjet që i organizon Prishtina dhe do të doja që vendimi i qytetarëve për këtë çështje të jetë unik”, ka thënë Vlashkoviq.

Kryetari i komunës (ilegale) të Leposaviqit Dragisha Vasiq (SNS) pret që pas këshillimeve me autoritetet e Beogradit serbët të merren vesh dhe të marrin qëndrim të përbashkët rreth djalleve në zgjedhje.

“Do të marrim vendim unik në nivel të katër komunave në veri të Kosovës dhe për këtë do të bisedojmë e përfaqësues të shtetit të Serbisë”, u ka thënë Vasiq gazetarëve.

Sipas fjalëve të tij, nëse interesat e shtetit përputhen me interesat e serbëve në Kosovë, atëherë ata do të dalin në zgjidhje.

Kryetari i t ashtuquajtur “kuvend krahinor i Kosovë e Metohisë Slavko Stevanoviq (SPS) ka vlerësuar se serbët e Kosovës nuk duhet të dalin në zgjidhjet.

“Qëndrimi i popullit serb dhe të gjitha minoritetet që shtetin e Serbisë e njohin si të vetin në zgjedhje nuk mund të dalin me ligjet e shtetit të panjohur të Kosovës”, ka thënë Stevanoviq dhe ka shtuar se për serbët në Kosovë është e pranueshme të dalinin vetëm në zgjedhjet që i shpall Serbia .

“Për ne është e paditur me cilët dokumente do të dalim në zgjedhje e kusht për të dalë në zgjedhje është edhe kthimi i më shumë se 200.000 të shpërngulur nga Kosova”, ka thënë ai.

Suhareka është binjakëzuar të martën me qytetin Lilburn të shtetit Georgia të SHBA-së. Në ceremoninë e binjakëzimit kanë morë pjesë përfaqësuesit më të lartë të regjionit të Gëinnet dhe qytetarë të këtij qyteti.

Kryetari i qytetit të Lilburn-it, Johnny Crist, deklaroi publikisht shpalljen e aktit të binjakëzimit në mes të qytetit të Lilburn-it dhe Komunës së Suharekës.

Në këtë solemnitet kryetarit të Komunës së Suharekës, Blerim Kuçi, ndërkaq i’u dhurua ‘Qelesi i artë i qytetit’ nga kryetari Johnny Crist.

“Akti i binjakëzimit në mes të dy qyteteve i ka paraprirë një aktivitet i gjerë i shkëmbimeve kulturore – shkëmbimi i nxënësve, aktivitetet e kampeve verore dhe vizitave zyrtare të përfaqësuesve të të dyja qyteteve”, tha Kuçi.
Të dyja palët vlerësuan se lartë binjakëzimi e këtyre qyteteve.

Pjesa tjetër ajo finale, e kësaj marrëveshje do të bëhet në Komunën e Suharekës. Për këtë kryetari Kuçi, i ka bërë ftesë zyrtare, kryetarit të Lilburnit Crist që së bashku me bashkëpunëtorë të vizitojë Suharekën, gjatë festës së “Festari 2013”.

Gjatë kësaj feste e cila do të organizohet në frymën e miqësisë amerikano-shqiptare, solemnisht do të bëhet edhe nënshkrimi zyrtar, nga ana e komunës së Suharekës të aktit final të marrëveshjes ndërkombëtare të binjakëzimit të qyteteve Lilburn-Suhareke./PrizrenPress.com/

Kryetari i Suharekës, Blerim Kuçi është shpallë qytetar nderi i qytetit Lilburn të shtetit Georgia të SHBA-së.

Kuçi së bashku me një delegacion të Komunës së Suharekës, është duke qëndruar në shtetin e Georgia të SHBA-së. Ai me një ceremoni rasti në këtë shtet u shpall qytetar nderi i qytetit Lilburn.

Në këtë ceremoni, përveç qytetarëve të shumtë të Lilburnit, kanë marrë pjesë edhe banorë të shumtë nga qytetet përreth dhe nga regjioni i Gëinnett.

Përveç kryetarit Kuçi si udhëheqës i delegacionit, qytetar nderi janë shpallur edhe anëtarët e delegacionit që po qëndrojnë në këtë vend./PrizrenPress.com/