Senati i Universitetit të Prishtinës “Hasan Prishtina”, në mbledhjen e cila ka përfunduar para pak çastesh, i ka rekomanduar ministrit të arsimit Ramë Buja, që të funksionalizojë Këshillin Drejtues të këtij institucioni. Kjo, në mënyrë që Këshilli më pas të mund të zgjedhte ushtruesin e detyrës së rektorit të UP-së. Ky do të mund të kryente këtë detyrë deri në zgjedhjen e rektorit të ri, sipas procedurave të rregullta ligjore.
Në mbledhjen të cilës i ka prirë anëtari më i vjetër i Senatit, Bajram Uka, dekan i Fakulteti Juridik është konstatuar se rekomandimet e Ministrit Buja për zgjidhjen e problemit në UP, nuk janë në përputhshmëri me dispozitat e statutit të UP-së, si dhe me dispozitat e Ligjit për Arsimin e Lartë në Kosovë.
Aktualisht Këshilli Drejtues i UP-së ka vetëm 5 anëtarë, pas dorëheqjes së Muharrem Nitajt dhe tre anëtarëve të tjerë të cilët i kishte emëruar ministri Buja. Për të emëruar ushtruesin e detyrës së rektorit të UP-së, Këshillit Drejtues i duhen së paku gjashtë anëtarë.
Para anëtarëve të KD të UP-së dorëheqje kishte dhënë edhe rektori Ibrahim Gashi dhe të gjithë prorektorët. Rektori Gashi ishte ngritur në grada shkencore duke paraqitur publikime shkencore në revista të rreme në Indi, e për këtë “Koha Ditore” kishte raportuar qysh në tetor të vitit të kaluar.