Policia e Kosovës, Njësiti i Realizimit të Urdhëresave i Stacionit Policor Prizren-Veri, ka arrestuar një person të shpallur në kërkim, i cili ishte i dënuar me burg efektiv për veprën penale “Vjedhje e rëndë”.
“Sot, më 03.03.2025, pas veprimeve operative-hetimore, Policia e Kosovës ka arritur të identifikojë, lokalizojë dhe të arrestojë të dyshuarin E. M., mashkull, 50 vjeçar nga Krusha e Vogël, Prizren”, thuhet në njoftimin e policisë, përcjell PrizrenPress.
Sipas autoriteteve, i njëjti kishte qenë në kërkim pasi ndaj tij ishte shqiptuar një dënim me 8 muaj burg efektiv nga Gjykata Themelore në Prizren me vendim të plotfuqishëm.
“I arrestuari fillimisht është sjellë në Stacionin Policor Prizren-Veri dhe më pas është dërguar në burg për vuajtjen e dënimit”, konfirmon më tej policia./PrizrenPress.com/
