Kryetari i Komunës së Rahovecit, Smajl Latifi, ka përkujtuar sot dëshmorët dhe martirët e fshatit Retijë, të cilët dhanë jetën për lirinë e Kosovës.
Në këtë ngjarje solemne, së bashku me familjarë, bashkëluftëtarë dhe bashkëpunëtorë, u nderuan 3 dëshmorët, 17 martirët dhe 2 të zhdukurit nga ky fshat, të cilët me sakrificën e tyre u bënë gurthemel i lirisë së Kosovës.
“Në Retijë, dhimbja dhe krenaria bashkohen në kujtim të atyre që ranë për lirinë e Kosovës”, tha Latifi.
Ai theksoi gjithashtu se “Serbia fashiste përdori taktikat e saj mizore, duke vrarë, masakruar dhe dëbuar të gjithë: pleq e të rinj, gra e fëmijë, pa kursyer askënd”.
Latifi shprehu nderimin e thellë për ata që dhanë jetën.
“Sakrificat e tyre u bënë gurthemel i lirisë sonë dhe do të mbeten përherë në kujtesën e popullit tonë.”, shtoi ai./PrizrenPress.com
