Policia e Kosovës, më 04 prill 2025, ka realizuar një kontroll në shtëpinë e një të dyshuari për posedim të paautorizuar të armëve. Hetimet janë zhvilluar nga Njësiti i Hetimeve të Stacionit Policor në Prizren, pas informacioneve operative që tregonin se i dyshuari, N.T., mashkull kosovar, i lindur në vitin 1977, ishte në posedim të armëve pa leje, përcjell PrizrenPress.
Policia ka bërë të ditur se, pas pranimit të informacionit, është njoftuar Prokurori i Shtetit, dhe me lejen e tij, është realizuar kontroll në shtëpinë dhe objektet përcjellëse të të dyshuarit.
“Gjatë kontrollit, janë gjetur dhe sekuestruar në cilësinë e provave materiale: Një (1) pistoletë e tipit AREX, kalibri 9×19, Një (1) pushkë gjysmë automatike e tipit Crvena Zastava, Një (1) karikator i pistoletës, Gjashtë (6) fishekë të kalibrit të panjohur, Dy (2) fishekë me gaz, Dyzet e një (41) fishekë të armëve të gjata, Një (1) karikator i pushkës gjysmë automatike, Një (1) palë dylbi të tipit ZRAK ON-M76”, njofton PK-ja.
Policia ka njoftuar se ndaj të dyshuarit do të ngritet kallëzim penal për veprën penale “Mbajtje në pronësi, kontroll, posedim të paautorizuar të armëve”, ndërsa hetimet për këtë çështje janë në vazhdim./PrizrenPress.com
