Sipas njoftimit të QRTK-së, ky memorandum përfshin një angazhim të dyanshëm për menaxhimin, administrimin dhe ruajtjen e aseteve të trashëgimisë kulturore nën mbrojtje, si dhe për realizimin e veprimeve restauruese dhe konservuese me respektimin e standardeve profesionale.
Drejtor i DKRS-së, Adem Morina ka shprehur bindjen se ky memorandum do të shënojë një hap të rëndësishëm në mbrojtjen e trashëgimisë kulturore të Prizrenit.
“Me mbështetje financiare dhe bashkëpunim të ngushtë, do të mundësojmë restaurimin e pasurive tona kulturore dhe promovimin e vlerave që na lidhin me të kaluarën”, është shprehur ai, thuhet në njoftimin e QRTK-së.
Drejtori i Qendrës Rajonale për Trashëgimi Kulturore, Samir Hoxha ka pohuar se kjo është një mundësi e mirë për të kontribuar për zhvillimin lokal.
“Përmes këtij bashkëpunimi, ne do të sigurojmë që ndërtesat dhe objektet e trashëgimisë kulturore të ruajnë vlerën e tyre historike dhe të jenë pjesë e identitetit të qytetit. Ky projekt është një mundësi e shkëlqyer për të kontribuar në zhvillimin e qëndrueshëm të Prizrenit”, ka deklaruar Hoxha.
Memorandumi, , sipas njoftimit të QRTK-së, synon krijimin e kushteve të favorshme për menaxhimin dhe ruajtjen e objekteve të trashëgimisë kulturore në Prizren, duke përfshirë ndërhyrjet restauruese në ndërtesa të cilat kanë vlera për historinë dhe kulturën e qytetit. /Telegrafi/
