20 C
Prizren
E diel, 14 Shtator, 2025

Xhamia e Mesxhidit në Prizren do t’i nënshtrohet restaurimit – projekti do të financohet nga MKRS

Xhamia e Mesxhidit, e cila ndodhet brenda kufijve të Qendrës Historike të Prizrenit dhe është e regjistruar në Listën e Trashëgimisë Kulturore për Mbrojtje, së shpejti do t’i nënshtrohet një procesi të plotë restaurimi.

Projekti është hartuar nga punonjësit e Qendrës Rajonale për Trashëgimi Kulturore në Prizren dhe do të mbikëqyret nga ky institucion, ndërsa financimi do të sigurohet nga Ministria e Kulturës, Rinisë dhe Sportit.

Drejtori i Qendrës Rajonale për Trashëgimi Kulturore në Prizren, Samir Hoxha, theksoi rëndësinë që ky projekt ka për komunitetin lokal dhe trashëgiminë kulturore të qytetit.

“Gjatë takimit me Hoxhë Sazer Mitrovicën, imam i kësaj xhamie, diskutuam për detajet teknike të projektit të restaurimit dhe për rëndësinë që ka ky objekt për besimtarët e lagjes Mesxhid. Ky është një hap i rëndësishëm për ruajtjen e vlerave historike dhe shpirtërore të kësaj zone,” u shpreh Hoxha.

Sipas dëshmive gojore të ruajtura nga besimtarët, objekti fillimisht ishte një shtëpi banimi e ndërtuar në stil tradicional, e cila rreth vitit 1918 u adaptua në funksion të xhamisë. Kjo ndodhi pas shpërnguljes së Perandorisë Osmane, kur Xhamia e Xhumasë në Prizren u rikthye në kishë, duke lënë kështu komunitetin mysliman të kësaj lagjeje pa një vend të përshtatshëm për falje.

Restaurimi i këtij objekti është pjesë e përpjekjeve të vazhdueshme për të ruajtur dhe promovuar trashëgiminë kulturore të Prizrenit, një qytet që përfaqëson një mozaik të pasur historik dhe fetar./PrizrenPress.com

Më Shumë

Prizreni përfiton internet publik falas përmes projektit evropian WiFi4WB

Kryetari i  Prizrenit, Shaqir Totaj, ka bërë të ditur se Komuna e Prizrenit është përzgjedhur për të përfituar nga iniciativa WiFi4WB, që do të...

Hardh Fest 2025 mbyllet me sukses, Rahoveci kryeqendra e festës së rrushit

Pas tri ditësh e netësh festive, përfundoi me sukses edicioni i radhës i Hardh Fest 2025, festivali tradicional i vjeljes së rrushit, që tashmë...

Lajmet e Fundit