Policia e Kosovës ka ekzekutuar një urdhër arresti ndaj një personi të kërkuar nga drejtësia, i cili ishte dënuar me burg efektiv për veprën penale “kanosje”, raporton PrizrenPress.
Sipas njoftimit zyrtar të Policisë, njësiti për realizimin e urdhëresave pranë Stacionit Policor Prizren-Veri ka arrestuar H.B., 22 vjeç, banor i fshatit Lubizhdë të komunës së Prizrenit. I riu ishte në kërkim, pas një vendimi të formës së prerë të Gjykatës Themelore në Prizren, me të cilin ishte dënuar me nëntë muaj burgim efektiv.
Arrestimi u realizua si rezultat i veprimeve operative dhe hetimore të ndërmarra nga njësitë policore. Pas lokalizimit dhe kapjes, i dënuari është shoqëruar fillimisht në Stacionin Policor Prizren-Veri dhe më pas është dërguar në institucionin korrektues për vuajtjen e dënimit.
“I arrestuari H.B. (22 vjeçar) fillimisht është sjellë në stacionin Policor Prizren-Veri dhe më pas është dërguar në burg në vuajtje të dënimit”, thuhet në njoftimin e Policisë së Kosovës./PrizrenPress.com
