Sfidë e madhe për Qeverinë e Kosovës në vitin e ardhshëm nuk do të jenë vetëm paralajmërimet e sindikatave për greva e protesta, mirëpo ajo mund të përballet edhe me një pakënaqësi tjetër, raporton KTV.
Qëndrimet e ministrit të Arsimit, Arsim Bajrami, se Qeveria e Kosovës nuk mund të ofrojë një zgjidhje konkrete në kontestin tashmë disa mujor në mes të Universitetit të Prishtinës dhe Shoqatave të dala nga lufta, këto të fundit nuk i zmbraps nga kërkesat e tyre, transmeton Koha.net.
Madje, nëse brenda pak ditëve atyre nuk u ofrohet një zgjidhje, cak i protestave të tyre nuk do të jetë vetëm Rektorati, mirëpo edhe ekzekutivi i vendit.
Xhavit Jashari, kryetar i shoqatës së familjeve të dëshmorëve thotë se pas takimeve të fundit me ministrin Bajrami, u është premtuar se deri të mërkurën përfundimisht do t’u jepet një përgjigje.
Sipas tij, një vendim në favor të tyre nuk do të ishte i vonshëm, pasi që ai thotë se shumica e studentëve që nuk janë pranuar sipas listës së tyre, i kanë ndjekur ligjëratat në vazhdimësi.
Ndërsa, rektori i UP-së, Ramadan Zejnullahu, vazhdon të heshtë, duke mos dhënë deklarata rreth kësaj çështjeje.