Në një përgjigje të Rektoratit të Universitetit të Prishtinës, dërguar ministrit të Arsimit, Shkencës dhe Teknologjisë, Arsim Bajrami, insistohet se UP nuk mund të bëjë regjistrimin e studentëve jashtë kritereve të konkursit dhe në kundërshtim me vendimet e organeve të tij.
“Ashtu siç ju kemi informuar, në mbledhjen e mbajtur më 16.10.2014, Senati i Universitetit ka marrë vendim të pranohen të gjithë kandidatët nga familjet e dëshmorëve që kanë arritur pragun minimal të kalueshmërisë, gjithsej 79 studentë. Ndërkaq, në afatin e dytë të konkursit, Senati i Universitetit ka vendosur që tu jepen nga 5 pikë bonus të gjithë kandidatëve nga familjet e dëshmorëve dhe 50 kandidatë dhe 50 kandidatë janë regjistruar duke e shfrytëzuar këtë privilegj”, thuhet në letrën e Rektorit të UP-së, Ramadan Zejnullahu, dërguar ministrit të Arsimit, Arsim Bajrami, transmeton Telegrafi.
Më tej në letër thuhet se, “Universiteti i Prishtinës nuk mund të bëjë regjistrimin e studentëve jashtë kritereve të konkursit dhe në kundërshtim me vendimet e organeve të tij, dhe tanimë i ka mbështetur kandidatët nga kategoritë e dala nga lufta, madje duke u dhënë bonus dhe duke regjistruar 129 kandidatë nga këto kategori”.