Lëvizja Vetëvendosje ka parashtruar kërkesë në Kryesinë e Kuvendit të Kosovës, për ndryshimin e nënkryetarit Glauk Konjufca. Vetëvendosje do që në pozitën e nënkryetares ta emërojë deputeten Aida Dërguti.
Ky ndryshim bëhet për faktin se Glauk Konjufca ka marrë detyrën e shefit të Grupit Parlamentar të Lëvizjes Vetëvendosje, pozitë të cilën e la deputeti Visar Ymeri, kur mori drejtimin e partisë.
Lajmin e ka konfirmuar për portalin Koha.net, zëdhënësi i Vetëvendosjes, Erzen Vraniqi.
“Po, Aida Dërguti është propozimi ynë për nënkryetare të Kuvendit”, ka thënë Vraniqi.
Kërkesën e LVV-së, Kryesia e Kuvendit të Kosovës do ta shqyrtojë në mbledhjen e së hënës, derisa formalizimi i këtij ndryshimi pritet të bëhet në seancën e ardhshme plenare.