Koalicioni për bashkëqeverisje, i lidhur ndërmjet dy partive më të mëdha në vend, Partisë Demokratike e Lidhjes Demokratike, nuk ka jetë të gjatë. “Ky koalicion po shkon drejt prishjes, ani pse nuk i ka më shumë se 6 muaj që kur u lidh”, kështu i tha Televizionit Rrokum një zyrtar i lartë PDK-së.
Telashet brenda koalicionit kanë nis, pasi që marrëveshjet e lidhura më 8 dhjetor në mes dy liderëve të këtyre partive, nuk po jetësohen.
Problemi i parë, sipas zyrtarit te PDK-së, është nisma e deputetëve të LDK-së që Gjykata Speciale t’i hetojë vrasjet e pasluftës. “E këtë nuk e pranon në asnjë mënyrë PDK”.
“Po ashtu, PDK është e pakënaqur me mosgatishmërinë e qeverisë së drejtuar nga Isa Mustafa, që sa më shpejt të nis punën për përpilimin e Ligjit për formimin e Ushtrisë së Kosovës, dhe fillimin e përgatitjes së amendamenteve kushtetuese për krijimin e ushtrisë”.
E LDK-ja, sipas këtij burimi, nuk ka heq dorë prej kërkesës që ushtria e Kosovës të quhet FARK e jo FAK.
Krejt këto nuk janë telashet e vetme te partnerëve te koalicionit.
Marrëveshjes se Mustafës e Thaçit, po i has sharra në gozhdë, te pajtimi i tyre, që me 2016, Hashim Thaçi të zë vendin e Atifete Jahjgës, si president i ardhshëm. Edhe pse marrëveshja e lidhur mes tyre ia garanton Thaçit postin e te parit te shtetit, kjo nuk po përkrahet nga deputetët e LDK-së. Disa deputetë të LDK-së hapur e kanë bërë me dije se kjo pikë nuk do të jetësohet.
“Krejt këto mospajtime, e në veçanti mosgatishmëria e deputetëve të LDK-s, për t’ia dhënë votën e tyre Thaçit për President, janë arsye që vendi të shkojë në zgjedhje të reja në vjeshtën e sivjetme”, tha burimi i TV Rrokum.
Sipas këtij zyrtari, Partia Demokratike tashëm e ka ndarë mendjen për mbajtjen e këtyre zgjedhjeve.
Para disa ditësh në Televizionin Rrokum, deputeti i LDK-së Armend Zemaj, deklaroi se LDK duhet të ketë kundërkandidat nëse Thaçi hyn në garë për president.
Po ashtu zyrtari i PDK-së ka thënë se tashmë kjo parti i ka nis bisedat me Nismën e Fatmir Limajt, duke paralajmëruar mundësinë që në këto zgjedhje të hyjnë me listë të përbashkët zgjedhore . /TV Rrokum/