Kryetari i degës së Lidhjes Demokratike të Kosovës (LDK) në Prizren, Haxhi Avdyli ka thënë se vazhdimisht do ta ngre zërin përballë lajthitjeve që bëhen brenda partisë së tij.
Ai ka thënë për Telegrafin se ka preferuar që në garën për kryetar të LDK-së, të jetë edhe Vjosa Osmani.
“Unë besoj qe Osmani është një vlerë brenda LDK-së. Mirëpo për më tepër unë kam dëshiruar që në funksion të zhvillimit të demokracisë, gara për shefin e partisë të ketë më tepër se një kandidat”, ka theksuar Avdyli.
Ai ka shtuar se ai do të vazhdojë të jetë aktiv brenda degës së LDK-së në Prizren, duke shtuar se “qëllim kryesor mbetet përgatitja që të fitohen zgjedhjet e ardhshme lokale në Prizren”.
“Nuk jam pjesë e asnjë fraksioni, por do të jem kundër atyre që shkelin mbi vlerat e demokracisë dhe vlerat mbi të cilat është ndërtuar LDK-ja”, ka thënë Avdyli. Telegrafi/