Shkolla e Muzikës “Lorenc Antoni” në Prizren, po ballafaqohet me mungesë të hapësirave të nevojshme për klasa dhe salla koncertale.
Objekti në të cilin punon sot kjo shkollë është ndërtuar në vitin 1937, i cili fillimisht kishte shërbyer si qendër e mësimit artizanal, e më pas në vitin 1948 u shndërrua në shkollën e parë të muzikës në Kosovë.
Në zgjedhjet e fundit, kryetari i Komunës së Prizrenit, Ramadan Muja, kishte premtuar se do të ndërtojë shkollë të re të muzikës në Prizren. Mirëpo, tani dy vjet pas asgjë nuk është ndërmarrë në këtë drejtim, përderisa numri i nxënësve në këtë shkollë sa vjen e shtohet.
“Shkolla jonë për momentin ka 475 nxënës, nevojat e shkollës për nxënësit ka nevojë sepse numri i nxënësve po rritet dita – ditës. Kështu që, kemi nevojë për hapësirë më të madhe”, thotë drejtori i kësaj shkolle, Vesel Krasniqi.
Në fund të dhjetorit të vitit të kaluar, Ambasada Amerikane ka ndarë donacion në vlerë prej 84 mijë euro për restaurimin e shkollës së muzikës në Prizren. Nga ky donacion është bërë fasadimi i shkollës, ndërrimi i dyerve dhe dritareve, rregullimi i tualeteve, si dhe rregullimi i ngrohjes së shkollës.
Ndërsa Komuna e Prizrenit, që kishte premtuar ndërtim të ri për shkollën e muzikës, tani ka ndarë një objekt i cili deri më tani është shfrytëzuar si restorant, me të cilin po pretendon t’i mbulojë nevojat e shkollës.
Zëdhënësi i Komunës, Ymer Berisha, i cili njëherësh është edhe këshilltar politik i kryetarit Muja, tha se objekti në fjalë mund të jetë ekuivalencë e premtimit elektoral.
“Komuna e Prizrenit vitin e kaluar ka dhënë edhe një objekt për shfrytëzim për shkollën e muzikës, që ndoshta mund të jetë ekuivalencë me premtimin elektoral për ndërtimin e një shkolle të re, por jo e një përmase e objektit çfarë është. Është objekti te “Qafa e Kishës”, tha zëdhënësi i Komunës, Ymer Berisha.
Drejtori i shkollës së muzikës, thotë se objekti shtesë i dhënë nga komuna, do t’i zbusë sadopak nevojat e nxënësve, mirëpo sërish do të ketë nevojë për një shkollë të re.
Ai thotë se pas premtimit të kryetarit të Komunës për ndërtimin e shkollës së re të muzikës, ka qenë disa herë në zyrën e tij për t’u interesuar si drejtor i shkollës se kur do të ndërtohet shkolla e re dhe thotë se ende shpreson që kryetari Muja do ta realizojë premtimin e dhënë.
“Po bisedimet kanë qenë edhe më herët… E di që ka premtu kryetari, po shpresoj që këtë premtim do ta realizojë në të ardhmen”, shfaqet optimist drejtori i shkollës.
Zëdhënësi i Komunës së Prizrenit, Ymer Berisha, thotë se nëse objekti i dhënë nga komuna do t’i plotëson nevojat e kësaj shkolle, atëherë nuk ka nevojë të shpenzohet buxheti i taksapaguesve për një premtim elektoral të cilin ai e quajti “fiktiv”.
“Nëse ky objekt do t’i përmbush të gjitha kërkesat dhe nevojat e shkollës së muzikës, gjithçka është në rregull. Nëse do të ketë nevojë për kërkesa të reja, ne jemi këtu dhe normalisht që do të përmbushim me kënaqësi të gjitha obligimet, dhe jo vetëm për shkollën e muzikës, por ne e kemi top prioritet politikat arsimore, politikat shëndetësore edhe të ambientit”, tha zëdhënësi Ymeri. /Kallxo.com/