Këtë vit Orkestra e te rinjve të Kosovës, aktivitetin e saj po e zhvillon në një mënyrë shumë më ndryshe nga ato që ka pasur kjo orkestër. Tash e një javë orkestra ndodhet në bjeshkët e bukura të Rugovës, ku çdo ditë në tri termine, ata bëjnë prova intensive. Arsyeja e këtij angazhimi intensiv të Orkestrës së të rinjve të Kosovës, është koncerti që do të mbahet në Prizren, ditën e sotme në Shtëpinë e Kulturës, në orën 16:00.
Në një prononcim për KultPlus, udhëheqësi i kësaj orkestre, Kushtrim Gashi, tha se afër 50 të rinj janë pjese e këtij kampingu muzikor, duke përfshirë studentë, nxënës e të tjerë nga pjesë të ndryshme të Kosovës si: Gjilani, Gjakova, Prishtina, e qytete të tjera.
“Në program janë vepra që janë sfiduese për orkestra me përvojë të gjatë e tepër profesionale, e lëre më për ne, por kemi arritur që me të vërtetë t’ia dalim. Një ndër këto vepra do të jetë edhe Simfonia numër 8 nga Schubert, por ajo edhe me sfiduese është Cello Concert nga Dvorak, i cili është njeri ndër koncertet më sfiduese qoftë për solist, por dhe për orkestër”, thotë Gashi.
Solist i këtij koncerti do të jetë Lukas Greiner, violoncellist nga Baseli i Zvicrës. I cili, jo vetëm që luan rolin e solistit, por është një ndër mbështetësit kryesor të këtij kampingu muzikor.
“Vepra tjera do jenë: Kur bie Fyelli Çiftelia, e angazhuar nga K.Gashi, pastaj W.A.Mozart, Simfonia Canocertante, me soliste: Albin Abazi, Oboe; Vehbi Shosholli, Klarinete; Bledar Bujupi, Horn dhe Yllzim Bytyqi, Fagot; pastaj A.Vivaldi, me koncertin për dy violoncello, me soliste: Arian Zherka dhe Blerta Hajdari; F.Schubert, Simfonia numër 8 dhe A.Dvorak, koncerti për violoncello dhe orkestër, me solist Lukas Greiner. Dirigjente janë: Hajrullah Syla, asistent i Orkestrës se te rinjve dhe unë si udhëheqës i Orkestrës” shtoj me tej ai.
Gashi me tej, falënderoj edhe instrumentistët, për kontributin e dhënë, duke premtuar në këtë mënyrë që edhe vitin e ardhëm të ketë aktivitete të kësaj natyre.
“Si nismë e mbarë e këtij kampingu, jep motiv që ky të zë vend edhe vitin e ardhshëm, por më shumë risi tjera, duke përfshirë masterklasë me profesor nga vende të ndryshme, duke ftuar dhe instrumentist nga Gjermania, Zvicra dhe mundësia e shkëmbimit te këtyre studenteve. Shpresojmë shumë të ndihmohemi më shumë, që këto ide të na realizohen. Pas kampingut, një ngjarje shumë e rëndësishme e Orkestrës së të rinjve do të jetë edhe udhëtimi afër 3 javorë që do bëjmë ne Bazel, pastaj Sicili, ku një numër afër 30 veta do jemi pjesë e turneut koncertal të radhës në këto vende” tha për fund udhëheqësi i Orkestrës së të rinjve të Kosovës, Kushtrim Gashi.