Në Qendrën e Kulturës “Mensur Zyberaj” në Rahovec janë hapur debatet publike për Planin Rregullues të Hollësishëm “Qendra e Vjetër e Qytetit”. Debatet do të zgjasin një muaj.
Nënkryetari i Komunës, Xhemali Haxhimustafa, i cili mori pjesë në hapje të debatit, uroi punë të mbarë dhe suksese gjatë debateve njëmujore, me ç’rast qytetarët do të mbështesin projektin që qendrës së vjetër të qytetit t’i kthehet pamja e vjetër atraktive. Ai tha se presin që qytetarët do të kontribuojnë me sugjerime dhe rekomandime.
Visar Haxhibeqiri, arkitekt urbanist, shpjegoi hollësishëm Planin Rregullues para të pranishmëve, duke dhënë detaje për përmbajtjen, objektivat, planet, vizionin dhe hapësirat e kësaj pjese të qytetit.
Ai tregoi se Plani Rregullues “Qendra e Vjetër e Qytetit” në Rahovec përfshin një sipërfaqe prej 27.5 Ha. Në Rahovec janë evidentuar 29 objekte të trashëgimisë kulturore, nga ky numër 9 janë në mbrojtje të shtetit.
Haxhibeqiri theksoi se Plani Rregullues do të përfshijë edhe rregullimin e shesheve në parqe të gjelbëruara, ndërsa me këtë do të avancohen edhe zejet e vjetra artizanale, me ç’rast zejtarët, por edhe Komuna, do të kenë përfitime ekonomike.