Filmi “Babai” i regjisorit Visar Morina, i cili edhe është zgjedhur për të qenë propozimi i Kosovës për Oscar, po vazhdon rrugëtimin e suksesshëm nëpër festivale evropiane e botërore.
Çelësin e suksesit duket se “Babai” e mori në edicionin e 50-të të Festivalit Ndërkombëtar të filmit, Karlovy Vary, ku triumfoi me 2 çmime për të vazhduar me 4 të tjera që i mori në Film Fest Munchen, e gjithashtu ky film u shfaq edhe në edicionin e 23-të të festivalit prestigjioz, The Hamptons, dy herë me radhë.
Pas suksesit që pati “Babai” në disa festivale, ai u prezantua edhe para publikut kosovar gjatë shtatorit në Prishtinë, e ekipi i tij u prit edhe nga ministri i Kulturës, Rinisë e Sportit, Kujtim Shala.
“Ndihem shumë i lumtur që filmi më në fund do të shfaqet në Kosovë, meqenëse edhe ka të bëjë me Kosovën dhe gati i gjithë ekipi i filmit është nga Kosova. Shpresoj që edhe publikut do t’i pëlqejë”, pat thënë për KosovaLive regjisori.
Tanimë janë paralajmëruar edhe disa prezantime të këtij filmi gjatë muajit tetor, nisur nga Belgjika, ku filmi do të shfaqet në festivalin e Genti më 15 e 16 tetor, për të vazhduar në Londër më 17 dhe 18 tetor në festivalin “BFI London Festival 2015” dhe për ta përfunduar muajin në “LA Screenings”, në SHBA.
Filmi shtjellon rrëfimin e Norit (Val Maloku) një fëmijë, i cili shet cigare në rrugë bashkë me të atin Gëzimin (Astrit Kabashi) në Kosovën e viteve të 90-ta. Kur babai dëshiron të gjejë një mënyrë për të emigruar në Gjermani, i biri bën çdo gjë për të qenë me të. Të zënë në mes të dëshirës për të qenë së bashku dhe nevojës për t’u ballafaquar me realitetin e vështirë, marrëdhënia babë – bir zhvillohet deri në pikën ku asgjë mes tyre nuk është më ashtu si ka qenë. /KosovaLive