Gjatë shqyrtimit të ankesës së prokurorisë për Rastin “Kleçka” Fatmir Limaj kërkoi drejtësi nga Gjykata e Apelit.
“I përkrahi qëndrimet e avokatëve të mi mbrojtës dhe kam për të shtuar vetëm një gjë – drejtësi dhe vetëm drejtësi dhe mjaft më pasigurisë juridike. Ju e dini që drejtësia e vonuar është sikurse drejtësi e mohuar,” tha ai.
Ankesën e prokurorisë për “Kleçkën” gjatë inkuadrimit me anë të video-lidhjes e quajti qëllimkeqe avokati i Limajt Karim Khan, ndërsa kërkoi që ajo të hedhet poshtë.
kërkoi që të hedhet poshtë ankesa e prokurorisë duke e quajtur atë qëllimkeqe.
Khan mes tjerash deklaroi se Fatmir Limaj që nga përfundimi i luftës në Kosovë është i shoqëruar me akuza dhe me një përpjekje të vazhdueshme për ta pastruar emrin e tij. I njëjti i ka humbur 33 muaj në Tribunalin e Hagës që nuk do t’i kthehen kurrë.
Po ashtu, Khan tha se Limajt lufta i ka lënë vragë dhe ende nuk ka pasur mundësi për t’i shëruar ato.
Khan përmendi edhe dëshmitarin e “Kleçkës” Agim Zogaj, duke thënë se ai nuk ishte mirë me shëndet, prandaj dëshmia e tij nuk mund të jetë e besueshme.
“Pavarësisht faktit që në vitin 2007 kishte deklaruar që ishte në trajtim mjekësor, këtë e ka thënë edhe bashkëshortja e tij dhe mu kur e ka marrë në pyetje në prezencë të prokurorit Salustro, nuk i ka kundërshtuar provat që i ka paraqitur bashkëshortja e tij se ai nuk është mirë më shëndet, andaj një dëshmi e një dëshmitari të tillë nuk mund të jetë kredibile,” tha Khan.
Khan tha se me një dëshmitar të tillë Gjykata Themelore e Prishtinës nuk ka mundur ta dënojë Limajn dhe kjo gjykatë ka marrë vendim të drejtë.
Dhjetë ish-ushtarët e UÇK-së u shpallën të pafajshëm nga akuzat për krime lufte më 17 shtator 2013.
Përveç Karim Khanit, edhe dy avokatët e Limajt, Tahir Rrecaj dhe Tomë Gashi kërkuan nga trupi gjykues i Gjykatës së Apelit që ta hudhë poshtë ankesen e prokurorisë dhe ta vërtetojë aktgjykimin e shkallës së parë.
Hedhjen poshtë të ankesës dhe vërtetimin e aktgjykimit të Gjykatës Themelore të Prishtinës për “Kleçkën” e kërkuan pastaj edhe avokatët e të akuzuarve të tjerë.
Pas seancës për KALLXO.com foli avokati tjetër i Limajt, Tahir Rrecaj.
“Ne presim që Gjykata e Apelit ta refuzojë ankesën e prokurorit Salustro të paraqitur kundër aktgjykimit lirues të Gjykatës Themelore në Prishtinë ku Limaj dhe të tjerët u patën liruar nga të gjitha akuzat. Ne mbrojtja e Z. Limaj dhe të tjerët i kemi dhënë argumentet e mjaftueshme me të cilat në bazë ligjore dhe praktike e kemi kundërshtuar ankesën e prokurorit Salustro të paraqitur kundër aktgjykimit dhe kemi propozuar që ai aktgjykim të vërtetohet,” tha Rrecaj.