Komisioni parlamentar për Integrime Evropiane ka shqyrtuar Projektligjin për parandalimin e konfliktit të interesit në ushtrimin e funksionit publik, megjithëse nuk janë plotësuar të gjitha kërkesat apo të gjitha vërejtjet të cilat janë adresuar në Raportin e Progresit.
Deputetët me ironi theksuan se kolegët e tyre, koordinatorët e grupeve parlamentare Ismet Beqiri dhe Adem Grabovci, në bazë të nenit 6 të këtij projektligji, duhet të shkojnë në burg për ndikim të drejtpërdrejtë për të votuar e marrë vendime konkrete deputetët.
Kryetarja e Komisionit Teuta Sahatqija, tha se disa çështje të Projektligjit për Ndryshim-Plotësimin e Ligjit për Parandalimin e Konfliktit të interesit në ushtrimin e funksionit publik nuk ishin të rregulluara me legjislacionin e BE-së. Sipas saj, tanimë nuk janë në kundërshtim me këto specifika të BE-së.
“Çështjet e rregulluara dhe të adresuara në Projektligjin për ndryshimin plotësimin e Ligjit për Parandalimin e Konfliktit të Interesit në ushtrimin e funksionit publik nuk janë të rregulluara në mënyrë specifike me legjislacionin e BE-së. Legjislacioni i BE-së në këtë fushë përmban disa akte juridike”, tha Sahatqija.
Deputeti Arben Gashi, duke lexuar amendamentin numër 6 të këtij projektligjit për parandalimin e konfliktit të interesit në ushtrimin e funksionit publik, tha se kryetarët e Grupeve parlamentare për ndikim tek deputetët për marrjen e vendimeve duhet të japin përgjegjësi. Me mendimin e deputetit Gashi janë pajtuar të gjithë anëtarët e këtij Komisioni, transmeton KP.
“Edhe pse amendamenti nr. 6 është në kundërshtim me praktikën e ligjvënies, po më pëlqen, sepse Ismet Beqirin dhe Adem Grabovcin direkt në burg po i dërguaka. Te neni 4 i ligjit bazik ‘zyrtari i lartë publik, deputeti i Kuvendit, si dhe të gjithë personat të zgjedhur apo të emëruar nga Kuvendi…’ dhe nëse ndaj zyrtarit të lartë apo ndaj deputeti lidhur me ushtrimin e funksionit publik ushtrohet ndikim i drejtpërdrejt apo i tërthortë haptas apo në mënyrë anonime për të votuar merr vendim konkret… Pra kur doni Ismetin dhe Adem Grabovcin i dërgojmë në burg”, tha Gashi.
Anëtarja tjetër e Komisionit Vjosa Osmani tha se ky projektligj ka rëndësi të madhe për faktin se është në pakon e liberalizimit të vizave. Ajo tha se nga përgjegjësitë të cilat dalin nga projektligji përjashtohen këshilltarët politikë.
“Te neni tre dhe neni 4 katër, sa po e shoh, i përjashtojnë nga obligimet që dalin nga ky ligj këshilltarët, sepse thotë se në këtë kategori nuk hyjnë personat apo nëpunësit e emëruar ose zgjedhur nga zyrtarët e lartë e që janë të punësuar në kabinetet e zyrtarëve të lartë publik”, ka thënë ajo.
Anëtarët e Komisionit kanë miratuar me shumicë votash edhe Projektligjin për themelimin e fondit kosovar për garanci kreditore, si dhe ka shqyrtuar Projektligjin për Akademinë e Shkencave dhe të Arteve të Kosovës, me amendamentet e Komisionit funksional nga aspekti i përputhshmërisë me legjislacionin e BE-së. Po ashtu është miratuar edhe Projektligji për parandalimin dhe luftimin e trafikimit me njerëz dhe mbrojtjen e viktimave të trafikimit.