Dega e Gruas Demokratike të Kosovës (GDK) në Prizren, me rastin e festës së fundvitit, të martën në mbrëmje organizoi një darkë për të gjitha gratë e kryesisë duke e elaboruar punën e bërë gjatë vitit 2015. Kryesia e GD-së në Prizren premtoi angazhime më të shumta gjatë vitit të ardhshëm.
Kryetarja e degës së Gruas Demokratike në Prizren, Laura Guguli tha se mundi i femrës asnjëherë nuk shpërblehet, ajo jo vetëm që mund të jetë nënë dhe bashkëshorte e mirë dhe udhëheqëse e familjes, femra di edhe të udhëheqë shtet, duke aluduar në atë se tashmë femra është me e përfaqësuar në vendimmarrje.
“Femra kosovare në çdo kohë diti të jetë e organizuar për sfidat e jetës dhe rrethanat që kaloi vendi ynë, në asnjë moment nuk mungoi angazhimi dhe prezenca e saj edhe në momentet më kyçe për Kosovën”, tha ajo.
Guguli tha se nuk duhet anashkaluar faktori femër në vendimmarrje dhe se sipas saj PDK-ja në Prizren nuk bënë dallime në këtë drejtim, madje sipas saj asgjë nuk ndërmerret pa u ndier edhe zëri i femrës.
Në këtë takim të Gruas Demokratike në Prizren u përmendën edhe aktivitetet e përmasave të mëdha të cilat u organizuan gjatë këtij viti duke e veçuar “Javën e biznesit”, të panaireve, pastaj fushatën sensibilizuese kundër kancerit të gjirit të cilat ishin nën organizimin e GD-së në Prizren.
Kryesia e GD-së në Prizren ndërkaq shprehi gatishmërinë se edhe gjatë viteve në vijim kjo kryesi do të dalë me projekte të cilat do të jenë në të mirën e qytetarëve pa dallim partiak, projekte këto të cilat do të mbështeten nga dega e PDK-së në Prizren. /PrizrenPress.com