Deputeti i Nismës për Kosovën, Enver Hoti, ka kërkuar shpërbërjen e Kuvendit të Kosovës dhe krijimin e një qeverie teknike e cila, sipas tij, duhet ta përgatiste vendin për zgjedhjet e ardhshme të lira, të cilat do t’i jepnin një drejtim të ri Qeverisë.
“Në Kosovë është krijuar një sistem i banditizmit dhe nuk mund të flasim vetëm për një qeveri, prandaj kemi revoltën qytetare e cila po do ta rrënojë atë. Ky sistem që ka ngulfatur vendin në të gjitha institucionet, duhet të largohet sa më shpejt”, ka thënë Hoti në emisionin “Kontakt” në Tribuna Channel.
Deputeti ka komentuar edhe takimin e presidentes Jahjaga me disa nga liderët e partive politike.
“Ka pasë takime nga opozita në të cilat janë paraqitur arsyeje pse nuk duhet të shkohet në takim dhe pse Haradinaj ka vendosur të shkojë në të. Ajo tashmë është e kaluar dhe mendoj që nuk ka asnjë përçarje të bllokut opozitar”, ka thënë Hoti.