Gjykata Themelore në Prishtinë ka konfirmuar përmes një komunikate se ka marr vendim që dy deputetëve të opozitës Ismajl Kurteshi (VV) dhe Shqipe Pantinës (VV) t’iu shqiptojë masën prej 30 ditësh arrest shtëpiak, kurse për deputetin e AAK-së, Bali Muharremaj, shqiptohet masa e paraqitjes në stacionin policor.
“Departamenti i Krimeve të Rënda, duke vendosur lidhur me kërkesën e Prokurorisë Themelore – Departamenti për krime të rënda, për caktimin e masës Arrest shtëpiak kundër të pandehurit Ismajl Kurteshi dhe caktimin e masës Paraqitje në stacion policor kundër të pandehurit Bali Muharremaj, për shkak të dyshimit të bazuar se të njëjtit, secili veç e veç kanë kryer veprën penale Përdorimi i armës apo mjetit të rrezikshëm nga neni 375 par.1 të KPK, dhe veprën penale Pengimi i personit zyrtar në kryerjen e detyrave zyrtare nga neni 409 par.1 të KPK, ndërsa kundër te pandehurës Shqipe Pantina për caktimin masës arrest shtëpiak, për shkak se ekziston dyshimi i bazuar se ka kryer veprën penale”, thuhet në komunikatë.
“Kundër të pandehurit Ismajl Kurteshi shqiptohet masa e arrestit shtëpiak e cila do të llogaritet që nga data e ndalimit të tij, gjegjësisht prej datës 26.02.2016, deri me datën 26.03.2016, në kohëzgjatje prej një (1) muaji”, ka bërë të ditur Gjykata Themelore.
Ndërsa kundër të pandehurit Bali Muharremaj, Gjkyata ka thënë se shqiptohet masa e paraqitjes në stacionin policor e cila do të llogaritet në kohëzgjatje prej një (1) muaji, duke filluar që nga data 26.02.2016, deri me datën 26.03.2016.
“Kundër të pandehurës Shqipe Pantina shqiptohet masa e arrestit shtëpiak e cila llogaritet që nga data e arrestimit të saj, gjegjësisht prej datës 26.02.2016, deri me datën 26.03.2016, në kohëzgjatje prej një (1) muaji”, thuhet në komunikatë.
Gjykata Themelore ka bërë të ditur se, “ekziston dyshimi i bazuar se të njëjtit kanë kryer veprat penale Përdorimi i armës apo mjetit të rrezikshëm nga neni 375 par.1 të KPK, veprën penale Pengimi i personit zyrtar në kryerjen e detyrave zyrtare nga neni 409 par.1 të KPK , veprën penale Mbajtja në pronësi, kontroll ose posedim të paautorizuar të armëve nga neni 374 par.1 të KPK, dhe veprën penale Sulmi i personave zyrtar gjatë kryerjes së detyrës zyrtare nga neni 410 par.1 të KPK”.