Ka përfunduar takimi mes Ministrisë së Kulturës dhe Komunës së Prizrenit, i thirrur urgjentisht pas ngjarjes tragjike, ku si pasojë e shembjes së murit të një shtëpie të vjetër në qendër të Prizrenit, ka humbur jetën një fëmijë 3-vjeçare.
Vjollca Aliu, drejtoreshë e Departamentit të Trashëgimisë Kulturore në MKRS, i ka thënë Insajderit, se takimi që ka përfunduar në orën 22:45 ka rezultuar me kërkesën për demolim të shtëpive të vjetra, në rrugën “Marin Barleti” në të cilën gjendet edhe shtëpia e rrënuar sot pasdite.
Në këtë takim nuk ka marrë pjesë Ramadan Muja, edhe pse e kishte paralajmëruar pjesëmarrjen në të.
“Komuna e Prizrenit ka kërkuar që qysh sonte të demolohet shtëpia në fjalë dhe shtëpitë e tjera në atë rrugë për shkak se paraqesin rrezik të madh, por unë dhe MKRS jemi kundër këtij vendimi, sepse nuk mund të merret si arsye tragjedia e sotme për të shkatërruar trashëgiminë pa e dokumentuar”, ka thënë Aliu, për Insajderin.
Ajo e ka përshkruar si mjaft të tensionuar takimin me Komunën e Prizrenit, për shkak se ata e kanë hedhur fajin tek MKRS-ja për mos lejimin e prishjes së këtyre shtëpive.
“Ne ua kemi bërë të qartë se përgjegjësinë për sigurinë publike e mban komuna, ndërsa për shtëpinë si objekt i trashëgimisë ne si Ministri. Ata po insistojnë në demolimin e shtëpive të vjetra në rrugën Marin Barleti por kjo nuk mund të ndodhë”, ka thënë Aliu, për Insajderin.
Insajderi merr vesh se një vendim në lidhje me këtë propozim pritet të merret gjatë ditës së nesërme. /Insajderi.com/