Një histori sa interesante ashtu edhe e dhimbshme. Historia e Mimit, një të moshuari nga Tirana, erdhi përmes filmit të shkurtër të titulluar “Mimi”, nga regjisori i ri, Eneos Çarka, në natën e katërt të festivalit të filmit të shkurtër dhe dokumentar DokuFest.
“Mimi”, kishte kaluar të 80-at, kishte një pension të vogël dhe me gruan e tij kishin herë disa debate.
Mimi dukej se vuante nga diabeti pasi që duart e tij ishin të qara, por që kjo nuk e ndalonte Mimin të hante edhe nëse duhej fshehtazi gruas së tij.
Mimi kishte një radio të vogël, të cilën e merrte pas vetes sa herë që dilte në parkun e qytetit dhe takohej me shokët e vet. E krejt për fund Mimi, ishte edhe gjyshi i regjisorit Eneos Çarka i cili morri shumë duartrokitje nga audienca pas shfaqjes së filmit.
“Jam shumë i lumtur që jam pjesë e DokuFest këtë vit”, tha fillimisht Eneosi, i cili vazhdoi të tregonte se pse e ka bërë këtë film dokumentar i cili zgjati 15 minuta, plot emocion e duke shpalosur një tablo personale brenda fokusit të kamerës e filmit.
“Kisha detyrë shkolle dhe duhej të bëhej një dokumentar portret, dhe gjëja më e lehtë për mua si student që isha pa përvojë ishte të merresha me dikë që kam më shumë qasje dhe një subjekt që e njoh më mirë, dhe gjëja më e bukur për të cilën kam më shumë histori e më shumë gjëra për të treguar ishte gjyshi im”, pohoi para të pranishmëve regjisori Çarka.
“Mimi”, është një film dokumentar që përpos vetë jetës së Mimit, tregon edhe jetët e të gjithë të moshuarve në vend. Ky film dokumentar është në garë në kategorinë e filmave të shkurtër kombëtarë në festivalin DokuFest. /KultPlus.com