Me homazhe dhe vendosje të buqetave me lule, te vendi i rënies mbi fshatin Opterushë dhe te varrezat e dëshmorëve në qytetin e Rahovecit dhe përmendoreve të heronjve Xhelal Hajda-Toni dhe Selajdin Mullabazi-Mici, kanë filluar të dielën aktivitetet për shënimin e 18-vjetorit të rënies së tyre.
Pas homazheve dhe vendosjes së buqetave me lule në sallën e Qendrës kulturore “Mensur Zyberaj” në Rahovec, është mbajtur akademia përkujtimore kushtuar rënies së heronjve Xhelal Hajda-Toni dhe Selajdin Mullabazi-Mici.
Kryetari i Komunës së Rahovecit, Idriz Vehapi, ka folur për veprën e dy heronjve të Kosovës, Tonit dhe Micit. “Jemi bashkë sot që t’i përkujtojmë dy trima, Xhelal Hajda- Tonin dhe Selajdin Mullabazi-Micin dhe dëshmorët nga komuna e Vushtrrisë. Po i përkujtojmë këta dy trima që ishin me karakter të fortë, inteligjencë të lartë, këmbëngulës në idealin e tyre dhe kërkesën për t’i shijuar të drejtën elementare, e që është liria. Të gjitha këto cilësi që i përmenda, Toni dhe Mici i zbatonin në shumë beteja kundër okupatorit serb deri në ditën e rënies heroike. Ata janë krenaria jonë dhe drejtimi jonë se si duhet jetohet dhe mbrohet vendi. Siç kanë qenë bashkë deri në vdekje, ata janë bashkë edhe sot në të njëjtin oborr, ku dy shkolla të mesme në qytet mbajnë emrin e tyre”, ka thënë Vehapi.
Në akademi kanë folur edhe Vajdin Berisha, kryetar i Degës së OVL-së në Rahovec, si dhe Remzije Shehu- Cana, drejtoreshë e shkollës së mesme ” Xhelal Hajda-Toni”.