Në shkollën “ Besim Ndreca” të fshatit Lutogllavë për shkak të problemeve me ngrohje po mbahet orari i shkurtuar i mësimit, ndërsa nga mbrëmë është vënë në funksion sistemi i ngrohjes në objektin e ri të shkollës së mjekësisë “ Luciano Motroni”. Ditëve të fundit , në shkollën e fshatit Lutogllavë janë paraqitur probleme me ngrohjen e objektit dhe orari i mësimit është shkurtuar.
Lidhur me këtë çështje, zyrtari komunal për informim në Prizren, Ymer Berisha, thotë se në këtë institucion shkollor është duke u punuar në rregullimin e sistemit të ngrohjes, ndërsa aktualisht është duke u përdorur ngrohje alternative. Zyrtari Berisha, tha se si rrjedhojë e rregullimit të sistemit të ngrohjes, mësimi është duke u zhvilluar në orar të shkurtuar, dhe një gjë e tillë do të vijojë edhe gjatë dy ditëve në vijim deri kur të përfundojnë punimet në zgjidhjen e kësaj çështje nga menaxhmenti i shkollës.
Probleme saj përket çështjes së ngrohjes në institucione shkollore janë paraqitur edhe në objektin e ri të shkollës së mjekësisë , por nga mbrëmë ky problem është zgjidhur , bëri të ditur zyrtari për informim , Berisha. Ndryshe , rreth problemeve me ngrohjen në shkollën e Lutogllavës, mbrëmë përmes një postimi në Fejsbuk, ka reaguar zyrtari i degës së LDK-së nga ky lokalitet, Fatmir Memaj, i cili ka apeluar tek organet kompetente që të marrin masa të menjëhershme që të sigurohet ngrohje për nxënësit, të cilët përveç orarit të shkurtuar të mësimit janë përballur edhe më të ftohtin, kishte shkruar ai…/TV Prizreni/