Dega e LDK-së në Prizren, akuzon pushtetin komunal se ujësjellësin në Gernqar, po e realizon vetëm për mëhallën e kryetarit të nëndegës së PDK-së në këtë fshat.
“Me shqetësim reagojmë ndaj mënyrës së keqqeverisjes dhe keqpërdorimit me paranë publike, paratë e taksapaguesve të qytetarëve të Komunës tonë nga ana e pushtetit komunal në Prizren, ku këto ditë është duke u implementuar një projekt i ujësjellësit të fshatit Gernqar të Prizrenit, ku konkretisht ky projekt po implementohet kryekëput për interesa personale të kryetarit te nëndegës të PDK-së nga ky fshat. Pra, po implementohet projekti në vlerë mbi 53.000 euro për të furnizuar me ujë shtëpinë e kryetarit të nëndegës së fshatit Gernqar, dhe 2-3 shtëpive të tjera të familjareve të tij, ndërsa për banorët e tjerë të fshatit as që qan kokën ky pushtet, edhe pse gjatë zgjedhjeve ua ka marre votën në mënyrë mashtruese dhe me premtime e blerje votash”, thuhet në një komunikatë të LDK-së.
“LDK-ja nuk e mbështet këtë mënyrë të selektimit dhe diferencimit të njerëzve në baza partiake, por synon të punojë në të mirë të gjithë qytetarëve pa dallim të përkatësisë partiake, etnike apo përkatësisë tjetër, dhe do të jetë jetësisht e përkushtuar për të punuar ekskluzivisht në interes e të gjithë qytetarëve”.
“Ka qindra projekte komunale si shkolla, ujësjellës, kanalizime, rrugë etj që kanë mbetur në gjysmë dhe po zvarriten në pafundësi në mungesë fondesh atëherë ku abuzim me paranë publike po merr formë të korrupsionit politik”.
“Ftojmë qytetarët e fshatit Gernqar, dhe te gjithë qytetarët tjerë qe në të ardhmen, mos të bien pre e mashtrimeve te këtij pushteti, i cili më shumë interesohet për militantin se për qytetarin e ndershëm” .
“Është koha fundit që ky pushtet në ikje të ndal abuzimin me paranë dhe pasurinë tonë të përbashkët në të mirë të gjithë qytetarëve e jo vetëm të bashkëpartiakëve . Por fatmirësisht koha kur sovrani do vendos me votë për fatin e kësaj klase të papërgjegjshme po afron”./PrizrenPress.com/