Shërbimi Zjarrfikës dhe i Shpëtimit në Komunën e Prizrenit vazhdon veprimtarinë me burime të kufizuara njerëzore dhe teknike.
Një gjë e tillë ka bërë që qytetarët, në raste të caktuara të intervenimit, të adresojnë kritika sa i përket efikasitetit të kësaj brigade, shkruan sot “Koha Ditore”.
Zyrtarët komunalë pranojnë se në këtë shërbim ka sfida të shumta, ku si çështje kryesore veçojnë numrin e pamjaftueshëm të zjarrfikësve dhe pajisjet e automjetet e vjetruara. Por këshilltarë të Kuvendit të Komunës nga radhët e subjekteve opozitare theksojnë se përgjegjësinë për këtë situatë të rënduar nuk mund ta mbajë ky shërbim, por Komuna e Prizrenit që nuk është angazhuar mjaftueshëm që me nivelin qendror të ofrojë kushte të duhura për punën e zjarrfikësve.
Anëtari i KK-së nga Lëvizja Vetëvendosje, Arbër Rexhaj, në disa raste gjatë seancave plenare të organit më të lartë vendimmarrës lokal ka ngritur shqetësimin rreth kapaciteteve të kufizuara të zjarrfikësve.