Gjykimi ndaj drejtorit të gjimnazit “Remzi Ademaj” në Prizren, Sali Ademajt dhe Hamdi Zymerajt, të akuzuar për korrupsion, nuk ka nisur të enjten ashtu siç ishte paraparë. Kjo sepse kjo lëndë ende gjendet në Gjykatën e Apelit.
Lënda penale e këtij rasti është dërguar në Apel, për shkak të ankesës së mbrojtësve ndaj aktvendimit për refuzimin e kërkesës së tyre për hudhjen e aktakuzës dhe kundërshtimin e provave.
Kryetari i trupit gjykues, Xheladin Osmani, ka njoftuar se lënda penale është dërguar me ankesë në Apel para më shumë se 20 ditësh, por ende nuk ka përgjigje. Andaj, në këto rrethana, ka shtyrë fillimin e gjykimit për 6 mars 2017, me fillim në ora 09:00.
Për këto rrethana, palët në procedurë dhe gjashtë dëshmitarë, janë njoftuar direkt nga gjyqtari në kohën kur ishte paraparë të fillonte seanca.
Në shqyrtimin e dytë, Sali Ademaj, përmes mbrojtësit të tij, avokatit Hazër Susuri, ka kërkuar që aktakuza të hudhet poshtë si e pabazë sepse nuk mbështetet në prova konkrete..
Një gjë të tillë ka kërkuar edhe i akuzuari tjetër, Hamdi Zymeraj, përmes avokatit të tij, Asman Hoxha, me arsyetimin se klienti i tij asnjëherë nuk ka qenë person zyrtar, dhe nuk ka punuar në arsim apo në ndonjë shkollë.
Prokuroria Themelore në Prizren, me 31 tetor 2016, ka ngritur aktakuzë ndaj Sali Ademajt dhe Hamdi Zymerajt, të cilët i akuzon se duke qenë anëtarë të komisionit për përzgjedhjen e ofertave për ekskursion të maturantëve të shkollës “Remzi Ademaj”, kanë zgjedhur ofertuesin më të shtrenjtë.
Sipas aktakuzës, me këtë veprim, të akuzuarit kanë shkelur Udhëzimin Administrativ 3/2015, sipas të cilit duhej të zgjidhej operatori me i përshtatshëm ekonomik.
Andaj, sipas organit të akuzës, me këtë rast nxënësit janë dëmtuar për rreth 4.500 euro dhe njëkohësisht u kanë shkelur të drejtat operatorëve tjerë konkurrues, të cilët kanë qenë më të lirë në çmim./betimiperdrejtesi/